Баптисч Иоханы тунхаглал
(Мт 3:1–12; Мк 1:1–8; Иох 1:19–28)
3 1 Цезарь Тиберийн хаанчлалын арван тавдугаар онд, Понти Пилат Иудейн захирагч, Херод нь Галилын захирагч, дүү Филип нь Итурае болон Трахонитын захирагч, Лусан нь Абилений захирагч, 2 Аннас болон Каиаф нар тэргүүн тахилч байх үед цөлд буй Захариагийн хүү Иоханд Бурханы үг ирэв. 3 Тэрээр нүгэл уучлагдах гэмшлийн баптисмыг тунхаглан Йордан хавийн бүх нутгаар явлаа. 4 Энэ нь эш үзүүлэгч Исаиагийн үгтэй номд*
“Цөлд хашхирагч нэгний дуу
«Эзэний замыг бэлтгэцгээ,
Жимийг нь шулуун болгогтун.
5 Гуу жалга бүр дүүрч,
Уул, толгод бүр намсаж,
Тахир нь шулуун болж,
Энхэл донхол зам тэгшрэх бөгөөд
6 Махбодтой бүхэн Бурханы авралыг үзнэ» гэх болно”
хэмээн бичигдсэнчлэн болжээ. 7 Тиймээс тэр өөрөөр нь баптисм хүртэх гэж байсан ард олонд
—Хорт могойн удам аа, ирэх уур хилэнгээс зугтахыг хэн та нарт сануулав?* 8 Тийм бөгөөс гэмшилд зохистой үр жимсийг гарга. “Абрахам бидний эцэг” гэж дотроо бүү хэл. Би та нарт хэлье. Бурхан энэ чулуунуудаас ч Абрахамд хүүхдүүд босгож чадна.* 9 Моддын үндсэнд сүх хэдийн зоогджээ. Иймээс сайн үр жимс ургуулдаггүй аливаа мод цавчигдан галд хаягдах болно гэв.* 10 Цугласан олон түүнээс
—Тэгвэл бид юу хийх ёстой юм бэ? гэж асууцгаав. 11 Тэр тэдэнд
—Хоёр цамцтай нь цамцгүй нэгэндээ илүүчил. Хоолтой нэг нь үүний адил үйлдэгтүн гэлээ. 12 Татвар хураагчдын зарим нь баптисм хүртэхээр бас ирж, түүнээс
—Багш аа, бид яах болж байна? гэхэд*
— 13 Та нар тогтоогдсоноос илүүг бүү ав гэв. 14 Зарим цэргүүд
—Бид яах болж байна, бид яах ёстой юм бэ? гэсэнд тэр
—Хэнээс ч хүчээр мөнгө бүү ав. Хэнийг ч хилсээр бүү гүтгэ. Авдаг хөлсөндөө сэтгэл хангалуун бай гэлээ.
15 Ард олон Христийг хүлээн, Иоханы тухай бүгд зүрхэндээ түүнийг Христ мөн эсэхийг эргэцүүлж байлаа. 16 Иохан бүгдэд
—Би та нарт усаар баптисм хүртээдэг. Харин надаас илүү хүчирхэг Нэгэн ирж байна. Би Түүний шаахайн үдээсийг ч тайлах зохисгүй. Тэр та нарт Ариун Сүнс хийгээд галаар баптисм хүртээнэ. 17 Үтрэмээ гүйцэд цэвэрлэн буудайгаа саравчинд овоолохын тулд Түүний гарт шигшигч байна. Харин хальсыг нь унтаршгүй галаар шатаана гэж хэлэв. 18 Тийнхүү өөр олон зүйлийг хэлж сэнхрүүлэн, тэр ард олонд сайнмэдээг тунхаглаж байлаа. 19 Харин захирагч Херод, дүүгийнхээ эхнэр Херодиагийн хэргээс болж Иоханд зэмлүүлсэн бөгөөд үйлдсэн бузар муу бүхэн дээрээ* 20 нэмээд тэрээр Иоханыг бас шоронд хориулжээ.
Есүс баптисм хүртэв
(Мт 3:13–17; Мк 1:9–11)
21 Ард олон бүгдээрээ баптисм хүртэж байх үед Есүс мөн баптисм хүртээд залбирч байв. Тэр зуур тэнгэр заагдан, 22 Ариун Сүнс Түүн дээр тагтаа мэт биет хэлбэрээр буун иртэл, тэнгэрээс дуун гарч
—Хайрт Хүү минь Чи билээ. Таалал минь Чамд оршдог гэв.*
Есүсийн гарваль
(Мт 1:1–17)
23 Есүс гучаад настайдаа үйлчлэлээ эхэлсэн бөгөөд хүмүүсийн боддогоор Тэр бол Иосефын хүү, Иосеф нь Елигийн, 24 Ели нь Маттатын, Маттат нь Левийн, Леви нь Мелхигийн, Мелхи нь Ианнайн, Ианнай нь Иосефын, 25 Иосеф нь Маттатиагийн, Маттатиа нь Амосын, Амос нь Нахумын, Нахум нь Хеслийн, Хесли нь Наггайн, 26 Наггай нь Маатын, Маат нь Маттатиагийн, Маттатиа нь Семейний, Семейн нь Иосехын, Иосех нь Иодагийн, 27 Иода нь Иоананы, Иоанан нь Ресагийн, Реса нь Зеруббабелын, Зеруббабел нь Шеалтиелын, Шеалтиел нь Неригийн, 28 Нери нь Мелхигийн, Мелхи нь Аддийн, Адди нь Косамын, Косам нь Елмадамын, Елмадам нь Ерийн, 29 Ер нь Иошуагийн, Иошуа нь Елиезерийн, Елиезер нь Иоримын, Иорим нь Маттатын, Маттат нь Левийн, 30 Леви нь Симеоны, Симеон нь Иудагийн, Иуда нь Иосефын, Иосеф нь Ионамын, Ионам нь Елиакимын, 31 Елиаким нь Мелеагийн, Мелеа нь Меннагийн, Менна нь Маттатагийн, Маттата нь Натаны, Натан нь Давидын, 32 Давид нь Иессийн, Иесси нь Обедын, Обед нь Боазын, Боаз нь Салмоны, Салмон нь Нахшоны, 33 Нахшон нь Амминадабын, Амминадаб нь Админы, Админ нь Арнигийн, Арни нь Хезроны, Хезрон нь Перезийн, Перез нь Иудагийн, 34 Иуда нь Иаковын, Иаков нь Исаакийн, Исаак нь Абрахамын, Абрахам нь Терагийн, Тера нь Нахорын, 35 Нахор нь Серугийн, Серуг нь Реугийн, Реу нь Пелегийн, Пелег нь Хеберийн, Хебер нь Шелагийн, 36 Шела нь Кайнаны, Кайнан нь Арфаксадын, Арфаксад нь Шемийн, Шем нь Ноагийн, Ноа нь Ламехын, 37 Ламех нь Метуселагийн, Метусела нь Енохын, Енох нь Иаредын, Иаред нь Махалалелын, Махалалел нь Кайнаны, 38 Кайнан нь Еношийн, Енош нь Сетийн, Сет нь Адамын, Адам нь Бурханы хүү болой.
- 3:4–6 Иса 40:3–5 (LXX)
- 3:7 Мт 12:34, 23:33
- 3:8 Иох 8:33
- 3:9 Мт 7:19
- 3:12 Лк 7:29
- 3:19–20 Мт 14:3–4; Мк 6:17–18
- 3:22 Эх 22:2; Дуу 2:7; Иса 42:1; Мт 3:17; Мк 1:11; Лк 9:35