Мосегийн дуу
15 1 Тэгээд Мосе ба Израилын хөвгүүд ЭЗЭНд энэ дууг дуулжээ.*
ЭЗЭНдээ би дуулнам
Хүлэг морийг унаачтай нь далайд хаяж
Үлэмж өргөмжлөлийг Өөртөө Тэр авчээ.
2 Миний хүч, Миний магтуу болсон ЭЗЭН минь
Миний аврал болсон билээ, Та.
Тэр бол миний Бурхан, Түүнийг би магтнам
Эцгийн минь Бурхан, Түүнийг би өргөмжилнө*
3 ЭЗЭН бол дайчин, Түүний нэр ЭЗЭН билээ.
4 Фараоны зэвсэгт тэргийг цэрэгтэй нь далайд хаягч нь Тэр билээ.
Шилдэг дарга нар нь бас Улаан тэнгист живж
5 Их ус тэднийг бүрхсэн юм.
Гүн рүү тэд чулуу мэт живэн одсон юм.
6 Аяа, ЭЗЭН, баруун мутар тань юутай хүчтэй.
Аяа, ЭЗЭН, баруун мутар тань дайсныг нам даржээ.
7 Агуу их сүр жавхлан тань тэрслэгчдийг дарав.
Асгарах хилэнгийн тань цогонд тэд сүрэл мэт шатав.
8 Хамрын тань амьсгал усыг бөөгнөрүүлж,
Овоо мэт болсон давлагаа урсахаа умартан,
Оёоргүй гүн далайд өтгөрөв.
9 “Хөөж бариад, олзоо хуваая.
Хүсэл бахаа тэднээр хангая.
Сэлэм юугаа сугалъя,
Тэд гарт маань сөнөг” гэж дайсан сайрхахад
10 Салхиа Та үлээн, далайг тэдэнд нөмөргөв.
Их усанд тэд тугалга мэт живэв.
11 Аяа, ЭЗЭН, бурхдаас хэн нь Тан лугаа адил
Ариун нь үлэмжийн,
Алдар нь аймшигтай,
Үйлс нь гайхамшигтай вэ?
12 Баруун мутраа Та сунгасанд газар тэднийг залгив.
13 Бат хайр тань биднийгээ авран хөтлөв.
Хүч чадал тань биднийгээ ариун гэрт тань авч ирлээ
14 Ард түмнүүд сонсоод чичирч байна
Филистийн оршин суугчид айж байна
15 Едомын тэргүүлэгчид түгшиж
Моабын удирдагчид дагжицгааж
Канааны суугчид бүгд мохож байна.
16 Айдас хүйдэс, аймшигт цочрол тэднийг нөмөрчээ.
Аяа, ЭЗЭН, ард түмэн тань дайран өнгөртөл
Зольсон ард түмэн тань дайран өнгөртөл
Таны мутрын агуу хүч тэднийг чулуу мэт чимээгүй байлгана.
17 Та тэднийг авчран Өөрийн өв болох ууланд тарина.
Аяа, ЭЗЭН, энэ бол Та Өөрөө суухаар бэлтгэсэн газар билээ.
Аяа, Эзэн, энэ бол Та Өөрийн гараараа байгуулсан ариун газар билээ.
18 ЭЗЭН үүрд мөнх хаанчилна.
19 Фараоны морь, тэрэгт цэрэг ба морин цэргүүд нь далай руу ороход, ЭЗЭН тэдний дээр далайн усыг эргүүлж буулгасан юм. Харин Израилын хөвгүүд далай дундуур хуурай газраар гаталсан билээ.
Мириамын дуу
20 Аароны эгч, эш үзүүлэгч Мириам гартаа хэнгэрэг авахад эмэгтэйчүүд бүгд түүнийг даган хэнгэрэг авч бүжиглэв. 21 Мириам тэдэнд дуулан
ЭЗЭНд дуулъя!
Тэр өндөрт өргөмжлөгдлөө.
Хүлэг морийг унаачтай нь далайд Тэр хаялаа
гэв.
Гашуун усыг амтлаг болгов
22 Мосе израилчуудыг удирдаж, тэд Улаан тэнгисээс Шурын цөл рүү оров. Тэд цөлөөр гурван өдөр явсан бөгөөд ус олсонгүй. 23 Марад ирээд тэд Марагийн усыг ууж чадсангүй. Учир нь ус шорвог байв. Тийм учраас энэ газар Мараэ гэж нэрлэгджээ. 24 Ард түмэн Мосе руу гонгинолдож
—Бид юу уух вэ? гэцгээв. 25 Мосе ЭЗЭНд хашхирсанд ЭЗЭН түүнд нэг модыг үзүүлэв. Тэр түүнийг усанд хаясанд ус амтлаг болов. Тэнд Тэр тэдний төлөө зарлиг, шийдвэрийг өгч, тэднийг сорив. 26 Тэр
—Хэрэв та нар ЭЗЭН Бурханыхаа дуу хоолойг анхааралтай сонсож, Түүний мэлмийд зөв зүйтэйг үйлдэж, Түүний тушаалуудад чих тавьж, бүх зарлигийг нь сахивал Би египетчүүдэд буулгасан өвчнүүдээс нэгийг нь ч та нарт буулгахгүй. Учир нь ЭЗЭН Би та нарыг эдгээгч билээ гэв. 27 Тэд Елимд ирэхэд тэнд усны арван хоёр ундарга, далан далдуу мод байсан бөгөөд тэнд усны дэргэд тэд буудаллав.
- 15:1: Илч 15:3
- 15:2: Дуу 118:14; Иса 12:2э15:23 Мара: евр. “гашуун” гэсэн утгатай.