Хоёр хоригдлын зүүд
40 1 Түүнээс хойно Египетийн хааны сөнч, талхчин хоёр өөрсдийн эзэн Египетийн хаанд нүгэл үйлджээ. 2 Фараон өөрийнхөө хоёр албат ахлах сөнч, ахлах талхчин хоёрт уурлаж, 3 тэднийг хамгаалагчдын захирагчийн байшин доторх Иосефын хоригдож байсан шоронд хийв. 4 Хамгаалагчдын захирагч Иосефыг тэдэн дээр нэмж оруулсанд Иосеф тэдэнд үйлчилжээ. Тэд хэсэг хугацаанд хорионд байв.
5 Шоронд хоригдож байсан Египетийн хааны сөнч, талхчин хоёр нэгэн шөнө хоёулаа зүүдэлсэн бөгөөд тэр хоёрын зүүдний совин өөр өөр байлаа. 6 Иосефыг өглөөгүүр тэдэн дээр орж ирээд харахад, үзэгтүн, тэд их гунигтай байв. 7 Иосеф эзнийхээ байшинд өөртэй нь хамт хорионд байгаа Фараоны хоёр албатаас
—Өнөөдөр та хоёрын царай яагаад ийм дүнсгэр муу харагдана вэ? гэж асуусанд 8 тэд
—Бид хоёулаа зүүд зүүдэллээ, харин түүнийг тайлах хүн алга гэсэнд Иосеф тэдэнд
—Тайлал нь Бурханых биш үү? Надад яриач дээ! гэв.
9 Тэгээд ахлах сөнч зүүдээ Иосефт ярьсан нь
—Миний зүүдэнд, харагтун, өмнө минь усан үзмийн мод байв. 10 Тэр мод гурван мөчиртэй бөгөөд ургаж дэлгэрээд усан үзэм боловсорчээ. 11 Тэгээд миний гар дээр Фараоны аяга байх ба би усан үзэм авч, Фараоны аяганд шүүсийг нь шахаж хийгээд, тэр аягаа Фараоны гарт өгч байлаа гэв. 12 Иосеф түүнд
—Түүний тайлал нь гэвэл, гурван мөчир нь гурван өдөр юм. 13 Фараон гурван өдрийн дотор тэргүүнийг тань өргөж, хуучин албанд тань дахин оруулна. Тэгээд та урьд түүний сөнч байх үедээ хийдэг байсан ёсоор Фараоны аягыг дахин гарт нь барих болно. 14 Бүх юм чинь сайн болбол намайг дурсан санаарай. Надад нинжин сэтгэл гарган Фараонд миний тухай дурдаж энэ газраас намайг гаргаж өгнө үү? 15 Үнэнээ хэлэхэд, би еврейчүүдийн нутгаас хулгайлагдсан. Тэд намайг гянданд суулгах ямар ч хэрэг би хийгээгүй гэжээ.
16 Түүнийг сайнаар тайлахыг ахлах талхчин хараад, Иосефт
—Харагтун, бас миний зүүдэнд толгой дээр минь цагаан талхтай гурван сагс байсан. 17 Дээд талын сагсанд нь Фараонд зориулагдсан янз бүрийн жигнэсэн хүнс байлаа. Гэтэл шувууд миний толгой дээрх сагснаас түүнийг авч идэж байсан гэсэнд 18 Иосеф
—Түүний тайлал гэвэл, гурван сагс нь гурван өдөр юм. 19 Гурван өдрийн дотор Фараон тэргүүнийг тань биеэс чинь авч модонд өлгөхөд шувууд махыг чинь идэх болно гэв.
20 Гурав дахь өдөр нь Фараоны төрсөн өдөр байв. Фараон бүх зарц нартаа зориулсан найран дээр ахлах сөнч, ахлах талхчин хоёрынхоо толгойг зарц нарынхаа дунд дээш өргүүлэв. 21 Тэгээд тэр ахлах сөнчийг сөнчийнх нь албанд дахин оруулав. Тэрээр Фараоны гарт аягыг нь барьж өгчээ. 22 Бас Иосефын тэдэнд тайлсан ёсоор ахлах талхчныг дүүжилжээ. 23 Харин ахлах сөнч Иосефыг эргэж саналгүй түүнийг мартав.