Иаковынхан Египет явсан нь
46 1 Тэгээд Израил хамаг хөрөнгө хогшлоо авч хөдлөөд, Беершебад ирж эцэг Исаакийнхаа Бурханд тахил өргөв. 2 Шөнө нь Бурхан Израилд үзэгдэж
—Иаков аа! Иаков аа! гэж дуудахад Иаков
—Би энд байна гэж хариулав. 3 Бурхан
—Би Бурхан байна. Чиний эцгийн Бурхан байна. Чи Египет рүү явахаасаа бүү ай. Би тэнд чамайг агуу үндэстэн болгоно. 4 Би чамтай хамт Египетэд очоод, чамайг заавал буцааж авчирна. Иосеф өөрийн гар дээр чамайг нүд аниулах болно гэжээ.
5 Иаков Беершебагаас хөдөлжээ. Израилын хөвгүүд эцгийг нь авчруулахаар Фараоны илгээсэн тэргэнд эцэг Иаков болон эхнэр хүүхдүүдээ суулгажээ. 6 Тэд бас мал сүргээ, Канаан нутагт хуримтлуулсан эд хөрөнгөө авав. Иаков болон түүний үр удам бүгдээрээ Египетэд очлоо.* 7 Ийнхүү Иаков хөвгүүд, ач хөвгүүд, охид, ач охид болон бүх үр удмаа дагуулаад Египетэд очжээ.
8 Египетэд очсон Израилын гэр бүлийнхний нэр ийм билээ. Иаков болон Иаковын ууган хүү Реубен. 9 Реубений хөвгүүд Ханох, Паллу, Хезрон, Карми. 10 Симеоны хөвгүүд Иемуел, Иамин, Охад, Иахин, Зохар, канаан эмэгтэйгээс төрсөн Шаул. 11 Левийн хөвгүүд Гершон, Кохат, Мерари. 12 Иудагийн хөвгүүд Ер, Онан, Шела, Перез, Зера нар бөгөөд харин Ер, Онан хоёр Канааны нутагт үхжээ. Перезийн хөвгүүд Хезрон ба Хамул. 13 Иссахарын хөвгүүд Тола, Пува, Иов болон Шимрон. 14 Зебулуны хөвгүүд Серед, Елон, Иахлеел билээ. 15 Эд бүгд Паддан-Арамд Леагийн Иаковт төрүүлж өгсөн хөвгүүд бөгөөд түүний охин Дина, түүний охид, хөвгүүд бүгд нийлээд гучин гурван хүн байв.
16 Гадын хөвгүүд нь Зифион, Хагги, Шуни, Езбон, Ери, Ароди, Арели билээ. 17 Ашерын хөвгүүд нь Имна, Ишва, Ишви, Бериа, тэдний охин дүү нь Сера болой. Бериагийн хөвгүүд нь Хебер, Малхиел хоёр. 18 Эдгээр нь Лабан өөрийн охин Леад авч өгсөн Зилпагийн Иаковт төрүүлж өгсөн арван зургаан хүн билээ.
19 Иаковын эхнэр Рахелын хүүхдүүд нь Иосеф, Бениамин хоёр юм. 20 Оны тахилч Потиферагийн охин Асенатаас Египет нутагт Иосефт төрүүлж өгсөн Манассе, Ефраим хоёр.* 21 Бениамины хөвгүүд нь Бела, Бехер, Ашбел, Гера, Нааман, Ехи, Рош, Муппим, Хуппим, Ард билээ. 22 Эд бүгд Иаковт Рахелын төрүүлж өгсөн хөвгүүд билээ. Бүх хүн нийлээд арван дөрвүүл юм.
23 Даны хүү нь Хушим. 24 Нафталийн хөвгүүд нь Иахзеел, Гуни, Иезер, Шиллем. 25 Эдгээр нь Лабан өөрийн охин Рахелд авч өгсөн Билхагаас Иаковт төрүүлж өгсөн хөвгүүд бөгөөд бүгд долоон хүн юм. 26 Египетэд Иаковтай хамт ирсэн хүмүүс нь түүний бэрүүдээс гадна жаран зургаан хүн байв. Эдгээр нь бүгд Иаковаас гарсан хүмүүс юм. 27 Египетэд төрсөн, Иосефын хөвгүүн хоёр бөгөөд Египетэд ирсэн Иаковынхан бүгд далан хүн болой.*
Иаков Гошенд суурьшив
28 Иаков Гошен руу замчлуулахаар Иудаг урьдаар Иосефт илгээж, улмаар тэд Гошен нутагт хүрэлцэн иржээ. 29 Иосеф сүйх тэргээ бэлтгэж, эцэг Израилтайгаа уулзахаар Гошенд хүрч очоод, түүнийг хармагцаа хүзүүдэн авч, хүзүүгээр нь тэврээд удтал уйлав. 30 Израил Иосефт
—Чиний амьд байгааг харж, царай зүсийг чинь үзсэнээс хойш би одоо үхсэн ч яах вэ гэв. 31 Иосеф өөрийн ах дүү нар болон эцгийнхэндээ
—Би очиж Фараонд хэлье. Би түүнд “Канаанд байсан ах дүү нар болон эцгийнхэн маань над дээр хүрч ирлээ. 32 Тэд бол хоньчид, угаасаа мал малласаар ирсэн улс. Тэд мал сүргээ, хамаг эд хөрөнгөө авч иржээ” гэе. 33 Фараон та нарыг дуудаж “Та нар юу хийдэг улс вэ?” гэж асуухаар нь, 34 египетчүүдэд хоньчид жигшүүртэй байдаг тул та нар “Таны зарц нар болон бидний эцэг өвгөд хар багаасаа өдий хүртэл мал малласаар ирлээ” гэж хэлээрэй. Тэгвэл та нарыг Гошен нутагт байлгах болно гэв.
- 46:6 Үйл 7:15
- 46:20 Эх 41:50–52
- 46:27 Үйл 7:14