Хүн төрөлхтний гэм
6 1 Газар дээр хүмүүс олширч эхлэн тэдэнд охид төрөх болсон үед* 2 Бурханы хөвгүүд хүний охидын гоо үзэсгэлэнг үзээд, тэднээс сонгосон болгоноо эхнэр болгов. 3 Тэгэхэд ЭЗЭН
—Хүн өөрөө махбод тул Миний Сүнс хүнтэй мөнхөд байгаад байхгүй. Харин тэдний өдрүүд нь нэг зуун хорин жил болог гэжээ.
4 Тэр үед газар дэлхий дээр Нефилим байсан бөгөөд түүний дараа ч бас Бурханы хөвгүүд хүний охидыг авч, хүүхэд төрүүлжээ. Тэдгээр нь хүчтэй, баатарлаг, эрт цагийн алдарт хүмүүс байжээ.* 5 ЭЗЭН, дэлхий дээрх хүмүүсийн хорлонт муу нь үлэмж их бас зүрхнийх нь хамаг бодол санаархал ямагт муу муухай болсныг хараад,* 6 Өөрөө хүнийг газар дээр бүтээсэндээ харамсан зүрхэндээ ихэд халаглав. 7 ЭЗЭН
—Би тэднийг бүтээсэндээ харамсаж байгаа учир Өөрийн бүтээсэн хүнийг газрын хөрснөөс арчин зайлуулахдаа хүнээс авхуулаад мал адгуус, мөлхөгчид, жигүүртэн шувуудыг ч хүртэл үлдээхгүй гэж хэлэв. 8 Харин Ноа, ЭЗЭНий мэлмийд тааллыг олжээ.
Ноаг ЭЗЭН таашаав
9 Ноагийн удам угсаа ийм билээ. Ноа бол зөвт, үеийнхнийхээ дунд гэм зэмгүй агаад Бурхантай хамт явдаг хүн байв.* 10 Тэрээр гурван хүү төрүүлсэн ба тэдгээр нь Шем, Хам, Иафет билээ.
11 Тэр цагт Бурханы өмнө газар дэлхий завхарч, дэлхий хүчирхийллээр дүүрэв. 12 Газар дээрх махбодтой бүхний зам завхарч газар дэлхий завхралд автсаныг Бурхан харлаа. 13 Бурхан, Ноад
—Газар дэлхий бие махбодтой бүхнээс болж хүчирхийллээр дүүрч байгаа учир тэдний эцсийнх нь өдөр Миний өмнө болж, Би тэднийг газартай нь сүйрүүлнэ. 14 Чи говорa модоор өөртөө нэгэн хөвөгч онгоц хийж, үүн дотроо тасалгаанууд гарган, дотор гадаргүй давирхай түрх. 15 Чи үүнийг ийнхүү хий. Хөвөгч онгоцны урт нь гурван зуун тохой, өргөн нь тавин тохой, өндөр нь гучин тохой байх ёстой. 16 Оройгоос нь нэг тохой зайд гэгээвч хийж, хөвөгч онгоцны хажуу талд үүд гаргах ба хөвөгч онгоцонд доод, дунд, дээд давхар гарга. 17 Би газар дэлхийд үер буулгаж, тэнгэрийн доорх амин амьсгаатай, бие махбодтой бүхнийг устгана. Газар дээр байгаа бүхэн үхнэ. 18 Харин Би чамтай гэрээ байгуулна. Чи хөвгүүд, эхнэр, бэрүүдтэйгээ хамт тэр хөвөгч онгоцонд орох болно. 19 Чи өөртэйгөө хамт амьд үлдээхийн тулд бие махбодтой амьтан бүхнээс эр, эмийг хосоор нь тэрхүү хөвөгч онгоцонд аваачиж оруул. 20 Амьд үлдэхийн тулд жигүүртэн шувуудын төрөл, адгуус амьтдын төрөл, газраар мөлхөгч бүхний төрөл төрлөөс хосоороо чамд очих болно. 21 Чи идэх бүх хоол хүнсээ өөртөө авч хадгал. Тэр нь чиний болон тэдгээрийн хоол болно гэжээ. 22 Ноа тийнхүү үйлдэж, өөрт нь Бурханы тушаасан ёсоор бүхнийг гүйцэтгэжээ.*
- 6:1–4 Иов 1:6, 2:1
- 6:4 Тоо 13:33
- 6:5–8 Мт 24:37; Лк 17:26; 1Пт 3:20
- 6:9 2Пт 2:5
- a6:14 говор: иш шулуун, мөчир цөөн, ац салаагүй модыг хэлнэ. Эх бичвэрт “гофээр мод” гэжээ.
- 6:22 Евр 11:7