Шавь нарынхаа төлөө залбирав
17 1 Ингэж хэлээд Есүс тэнгэр өөд мэлмий өргөн
—Аав аа, цаг нь ирлээ. Хүү нь Таныг алдаршуулахын тулд Хүүгээ Та алдаршуулаач. 2 Таны Надад өгсөн бүх хүнд мөнх амийг өгөхийн тулд аливаа махбодоос дээгүүрх эрхийг Та Надад өгсөн билээ. 3 Цорын ганц үнэн Бурхан Таныг болон Таны илгээсэн Есүс Христийг мэдэх нь мөнх амь мөн. 4 Хий гэж Надад өгсөн ажлыг тань гүйцэтгэн Би Таныг газар дээр алдаршуулав. 5 Аав аа, ертөнцөөс өмнө Тантай хамт Надад байсан сүр жавхлангаар одоо Та Намайг Өөрийнхөө өмнө алдаршуулаач.
6 Ертөнцөөс Таны Надад өгсөн хүмүүст Би нэрийг тань илчилсэн. Тэд Таных байсан бөгөөд Та тэднийг Надад өгсөн. Тэд үгийг тань сахисан юм. 7 Таны Надад өгсөн алив бүхэн нь Танаас гэдгийг одоо тэд мэдэв. 8 Учир нь Надад өгсөн үгсийг тань Би тэдэнд өгсөн. Тэдгээрийг тэд хүлээн авч, Намайг Танаас гарч ирснийг үнэхээр ойлгоод, Та Намайг илгээсэн гэдэгт итгэсэн юм. 9 Тэдний төлөө Би гуйж байна. Би ертөнцийн төлөө бус харин Таны Надад өгсөн хүмүүсийн төлөө гуйж байна. Учир нь тэд Таных билээ. 10 Миний бүх юм Таных, Таных бас Минийх. Би тэднээр алдаршуулагдлаа. 11 Цаашид Би ертөнцөд байхгүй, харин тэд ертөнцөд байна. Би Танд очно. Ариун Эцэг минь, Надад өгсөн нэрээрээ тэднийг хамгаалж, Бидний адил тэднийг нэг байлгаач.a 12 Тэдэнтэй хамт байхдаа Надад өгсөн нэрээр тань Би тэднийг хамгаалж байсан.b Би тэднийг харгалзсан бөгөөд мөхлийн хүүгээс өөр тэдний нэг нь ч эс мөхөв. Энэ нь Бичвэр биелэгдэхийн тулд ажээ.* 13 Харин одоо Би Танд очно. Тэдний дотор баяр баясгалан минь дүүрэн байхын тулд энэ бүхнийг Би ертөнцөд байхдаа ярьж байна. 14 Би Таны үгийг тэдэнд өгсөн. Би энэ ертөнцийнх биш адил тэд бас энэ ертөнцийнх биш тул ертөнц тэднийг үзэн ядсан юм. 15 Тэднийг Та ертөнцөөс аваач гэж Би гуйхгүй, харин муу нэгнээс хамгаалахыг гуйж байна. 16 Би ертөнцийнх биш адил тэд бас ертөнцийнх биш. 17 Үнэнээр тэднийг ариусгаач. Таны үг үнэн мөн. 18 Та Намайг ертөнцөд илгээсний адилаар Би мөн тэднийг ертөнцөд илгээв. 19 Тэд бас үнэнээр ариусгагдахын тулд Би Өөрийгөө тэдний төлөө ариусгана.
20 Би зөвхөн тэдний төлөө бус, тэдний үгээр дамжуулан Надад итгэх хүмүүсийн төлөө мөн гуйж байна. 21 Энэ нь Аав Та Миний дотор, Би Таны дотор байгаатай адил, тэд бүгд нэг байхын тулд бөгөөд мөн тэд Бидний дотор байж, Та Намайг илгээсэн гэдэгт ертөнцийг итгүүлэхийн тулд билээ. 22 Бид нэг байдгийн адил тэднийг нэг байлгахын тулд Надад өгсөн сүр жавхланг тань Би тэдэнд өгсөн билээ. 23 Би тэдний дотор, Та Миний дотор. Ингэснээр тэд бүрэн төгс нэг болж, Та Намайг илгээсэн, Намайг хайрласны адилаар тэднийг хайрласныг ертөнц мэдэх болно. 24 Аав минь, Надад өгсөн хүмүүс тань Миний байдаг газарт Надтай хамт байж, сүр жавхланг минь үзээсэй гэж Би хүсэж байна. Тэр сүр жавхланг Та Надад өгсөн билээ. Учир нь ертөнцийн сууриас өмнө Та Намайг хайрласан. 25 Зөвт Аав минь, ертөнц Таныг мэдэхгүй боловч Би Таныг мэддэг. Түүнчлэн Та Намайг илгээснийг тэд мэддэг билээ. 26 Би нэрийг тань тэдэнд мэдүүлсэн бөгөөд мэдүүлэх болно. Ингэснээр Намайг хайрласан Таны хайр тэдний дотор, Би ч бас тэдний дотор байх юм гэлээ.
- a17:11 Зарим гар бичмэлд: Надад өгсөн эд бүгдээ нэрийнхээ хүчээр хамгаалаач
- b17:12 Зарим гар бичмэлд: Таны Надад өгсөн тэднийг би нэрийн тань хүчээр хамгаалж байсан
- 17:12 Дуу 41:9; Иох 13:18