Хойд Канааны хаад ялагдав
11 1 Хазорын хаан Иабин үүнийг сонсоод Мадоны хаан Иобаб мөн Шимрон ба Ахшафын хаанд, 2 бас Хиннеротын өмнө талын Араба, өрнө зүгийн нам газрууд ба Дорын өндөрлөгт байгч хойд зүгийн уулархаг нутгийн хаадад буюу 3 өрнө ба дорно зүгт байгч канаанчууд, мөн аморичууд, хитчүүд, перизчүүд, уулархаг нутгийн иебусчууд болон Мизпе нутгийн Хермоны хормойд орших хивичүүдэд хэл хүргүүлэв. 4 Тэд өөрсдийн бүх цэрэг буюу далайн эргийн элс шиг тоо томшгүй хүн, их хэмжээний морьд ба тэрэгт цэрэгтэй хөдлөв. 5 Тийнхүү эдгээр бүх хаад уулзан, Израилын эсрэг дайтахаар Меромын усны хажууд ирж, хамтдаа буудаллав.
6 ЭЗЭН, Иошуад
—Тэднээс бүү айгтун. Учир нь маргааш өдийд Би Израилын өмнө тэднийг бүгдийг нь үхдэл болгоно. Та нар тэдний морьдын шөрмөсийг тасалж, тэрэгнүүдийг нь галд шатаах болно гэлээ. 7 Ийнхүү Иошуа дайчин эрсийн хамт Меромын усны дэргэд тэдний дээрээс гэнэт орж ирж, довтлов. 8 ЭЗЭН тэднийг Израилын гарт өгч, Израил тэднийг цохиж, агуу Сидон, Мисрефот-Маим болон Мизпагийн хөндий хүртэл тэднийг дорно зүгт мөшгөн хөөж, зугтаалган алдалгүйгээр цохив. 9 ЭЗЭН өөрт нь айлдсаныг Иошуа тэдэнд үйлдэж, морьдынх нь шөрмөсийг таслан, тэрэгнүүдийг нь галд шатаалаа.
10 Тэр цагт Иошуа буцаж, Хазорыг эзлэн авч, хааныг нь илдээр цохив. Тэр үед Хазор эдгээр бүх хаанчлалын тэргүүн нь байв. 11 Тэд хот доторх амьтай бүгдийг устган, амьтай бүгдээс нэгийг нь ч үлдээлгүй илдний ирээр цохив. Хазорыг Иошуа галдан шатаав. 12 Мөн Иошуа тэдгээр хаадын бүх хотыг хаадтай нь хамт эзлэн авч, тэднийг илдний ирээр цохин, ЭЗЭНий зарц Мосегийн тушаасанчлан хүйс тэмтрэв. 13 Гэхдээ Иошуагийн шатаасан хот болох Хазораас бусад, толгод дээрх хотуудаас нэгийг нь ч Израил шатаагаагүй юм. 14 Израилын хөвгүүд эдгээр хотуудын бүх олз хийгээд мал сүргийг өөрсдөдөө дээрэмдэн авлаа. Харин бүх хүнийг нь дуустал илдний ирээр цохижээ. Тэд амьтай нэг ч хүнийг эс үлдээв. 15 ЭЗЭН өөрийн зарц Мосед тушаасны адил Мосе Иошуад тушааж, Иошуа ч ёсоор үйлдэв. Мосед ЭЗЭНий тушаасан бүхнээс Иошуа нэг ч зүйлийг хийлгүйгээр орхисонгүй.
Иошуагийн эзэлсэн нутгууд
16 Ингээд Иошуагийн эзэлсэн бүх газар нутгийг тоочвол: уулархаг нутаг, бүх Негев, Гошены бүх нутаг, нам дор газар, Араба мөн Израилын уулархаг нутаг болон нам дор газрууд, 17 Сеир лүү өгссөн Халак уулаас авхуулаад Хермон уулын хормой дахь Ливаны хөндийн Баал-Гад хүртэлх нутаг юм. Тэр мөн бүх хаадыг нь олзолж, тэднийг алав. 18 Иошуа эдгээр бүх хаадтай урт хугацаагаар дайн хийв. 19 Гибеоны оршин суугч хивичүүдээс өөр Израилын хөвгүүдтэй энхийн гэрээ тогтоосон хот нэг ч байсангүй. Тэд бүх хотыг тулалдан авчээ. 20 Учир нь ЭЗЭН тэдний зүрхийг хатууруулаад, Израилтай дайтуулахаар ирүүлсэн нь Мосед ЭЗЭНий тушаасан ёсоор Израил тэднийг ямар ч өршөөлгүйгээр, бүрмөсөн устгахын тулд байв.*
21 Тэр цагт Иошуа ирж, Хеброн, Дебир, Анаб, Иудагийн бүх уулархаг нутаг болон Израилын бүх уулархаг нутгуудаас анакчуудыг таслан устгав. Иошуа тэднийг хотуудтай нь хамт бүрмөсөн устгасан билээ. 22 Израилын хөвгүүдийн нутагт нэг ч анак үлдсэнгүй. Зөвхөн Газ, Гат болон Ашдодод зарим нь амьд үлджээ. 23 Тийнхүү Мосед ЭЗЭНий айлдсанчлан Иошуа бүхэл нутгийг аваад, үүнийгээ овгийн хуваарилалтынх нь дагуу Израилд өвлүүлэн өгөв. Ийнхүү тэр нутаг дайн дажнаас амсхийв.
- 11:20 Дх 7:16