Иошуа

Йорданыг гатлав

3 ¹ Ингээд Иошуа өглөө эртлэн босоод, Израилын бүх хөвгүүдийн хамт Шиттимээс хөдлөн Йорданд ирээд, гатлахынхаа өмнө тэндээ хонов. ² Гурав хоногийн эцэст захирагчид хуаран дундуур явж ³ ард олонд тушаан
—Та нар өөрсдийн Бурхан ЭЗЭНий гэрээний авдрыг Левийн тахилч нар дамнан явахыг хараад байрнаасаа хөдөлж араас нь даган явагтун. ⁴ Харин авдар ба та нарын хооронд хоёр мянга орчим тохой зай байх ёстой. Түүнд бүү ойртогтун. Та нар урьд нь энэ замаар хэзээ ч явж үзээгүй учраас түүнийг дагаж явбал аль замаар явахаа мэдэж авах болно гэв. ⁵ Тэгээд Иошуа хүмүүст
—Өөрсдийгөө ариусгацгаа. Учир нь маргааш ЭЗЭН та нарын дунд гайхамшигт зүйлсийг хийх болно гэв. ⁶ Иошуа тахилч нартай ярин
—Гэрээний авдрыг дамнан өргөөд, хүмүүсийн өмнө голыг гатлан яв гэсэнд тэд гэрээний авдрыг дамнан өргөөд, ард олны түрүүнд явав. ⁷ ЭЗЭН, Иошуад
—Би Мосетой хамт байсан шигээ чамтай хамт байх болно гэдгээ тэдэнд мэдүүлэхийн тулд өнөөдөр Би чамайг бүх Израил дахины нүдэн дээр өргөмжилж эхлэх болно. ⁸ Харин чи гэрээний авдрыг дамнан яваа тахилч нарт тушаан “Та нар Йорданы усны зах руу ороод Йордан дотор зогсож байгтун” гэж хэл гэлээ. ⁹ Тэгээд Иошуа Израилын хөвгүүдэд
—Нааш ирж, ЭЗЭН Бурханыхаа үгийг сонс гэж хэлэв. ¹⁰ Иошуа хэлэхдээ
—Үүгээр дамжуулан амьд Бурхан та нарын дунд байгаа бөгөөд Тэр та нарын өмнө канаанчууд, хитчүүд, хивичүүд, перизчүүд, гиргашчууд, аморичууд болон иебусчуудыг заавал хөөн зайлуулах болно гэдгийг та нар мэдэх болно. ¹¹ Харагтун, бүх газар дэлхийн Эзэний гэрээний авдар та нарыг тэргүүлэн гатлахаар Йордан руу орж байна. ¹² Тиймд одоо Израилын овог тус бүрээс нэг хүн байхаар арван хоёр хүнийг өөрсдөдөө сонгон ав. ¹³ Бүх газар дэлхийн Эзэн болох ЭЗЭНий авдрыг дамнан яваа тахилч нарын хөлийн ул Йорданы усанд тавигдан зогсмогц, Йорданы урсгал нь таслагдаж, дээрээс урсаж байгаа ус овоорон тогтох болно гэв.
¹⁴ Ингээд ард олон Йорданыг гатлахаар майхнаа буулган хөдөлж, гэрээний авдрыг дамнан яваа тахилч нар ард түмний өмнө тэргүүлэн явлаа. ¹⁵ (Ургац хураалтын өдрүүдэд Йордан бүх эргээ халин үерлэдэг байв.) Авдрыг дамнан яваа тахилч нар Йорданд орж хөлөө усны захад дүрмэгц, ¹⁶ дээрээс урсаж байгаа ус Заретаны ойролцоо орших Адам хотын хавьд, нэлээд хол зайд тогтон овоороод, Давст тэнгис буюу Арабагийн тэнгис рүү урсаж байгаа ус бүрэн тасарчээ. Тэгээд хүмүүс Иерихогийн эсрэг талаас гатлан гарав. ¹⁷ Бүх Израил, үндэстэн даяараа Йорданыг хуурай газраар гаталж дуустал ЭЗЭНий гэрээний авдрыг дамнан яваа тахилч нар Йордан голын тэхий дунд хуурай газар дээр бат зогссоор байлаа.