Ханнагийн залбирал
2 1 Тэгээд Ханна залбиран
ЭЗЭН тандаа зүрх минь баярлана
ЭЗЭНийхээ дотор эвэр минь бас өргөгдөнө
Авралд тань баярлан баяссан би
Ам юугаа дайснуудынхаа эсрэг чинээгээр нь ангайна.*
2 ЭЗЭНтэй адил ариун нь үгүй
Эгээ л Тан шиг нь хаа ч үгүй
Бидний Бурхантай адил хад гэж байхгүй
3 Ихэд олон үг бардамнаж бүү ярьтугай
Ихэмсэг үгс амнаас чинь бүү гартугай
Хамгийг мэдэгч нь Бурхан ЭЗЭН тул
Хамаг үйлийг дэнслэгч нь чухамдаа Тэр билээ.
4 Дийлэгч агсны нум хугарахад
Дийлдэгч нэгэн нь харин хүчийг агсдаг
5 Цатгалан байсан нь талх хайн хөлсний хүн болоход
Өлсгөлөн байсан нь хайхаа нэгэнт болино
Хүүсэр эмэгтэй тэр бүү хэл долоо төрж байхад
Хүүхэд олонтой байсан эмэгтэй хоосрон зовно
6 Үхүүлдэг нь ч бас амилуулдаг нь ч ЭЗЭН,
Үхэгсдийн оронд унагадаг нь бас өргөж босгодог нь Тэр юм.
7 Үгүйрүүлдэг бас баяжуулдаг нь ЭЗЭН,
Дордуулдаг бас дээрдүүлдэг нь Тэр юм.
8 Өчүүхэн нэгнийг шорооноос босгохдоо
Үгээгүй ядууг үнс хогноос өргөхдөө
Өргөмжлөн тэднийг дээдсийн дунд суулгаад
Өндөр алдрын суудлыг тэдэнд Тэр өвлүүлдэг
Газар дэлхийн тулгуур багана нь ЭЗЭНийх тул
Гагц үүнийхээ дээр ЭЗЭН ертөнцийг тэгнэжээ.
9 Хүч чадлаар гагцхүү хүн эс дийлэхийн учир
Итгэмжит хүмүүсийнхээ хөлийг Тэр хамгаалдаг.
Элдэв буруу явдалтнууд харанхуйд дуугүй болгогддог
10 Түүнтэй тэрсэлдэгчид нам дарагдана.
Тэгээд тэднийг ЭЗЭН тэнгэрээс бас ниргэнэ.
Дэлхийн хязгаар хүртэл ЭЗЭН шүүх болно.
Сонгосон хаандаа хүчийг өгнө.
Тослогдсон хүнийхээ эврийгa өргөнө гэв.
Елигийн нүгэлт хөвгүүд
11 Тэгээд Елкана Рамад байдаг гэртээ харив. Харин хөвгүүн нь тахилч Елигийн дор ЭЗЭНд үйлчлэв. 12 Елигийн хөвгүүд нь үл бүтэх хүмүүс байсан бөгөөд тэд ЭЗЭНийг мэддэггүй байлаа. 13 Тиймээс хэн нэгэн хүн өргөл өргөн, мах чанаж байх үед тахилчийн зарц гурван салаа сэрээ бариад хүрч ирдэг байв. Тахилч нар ард олонд ийнхүү хандах нь зуршил болсон байжээ. 14 Түүгээрээ тогоо сав, хайруулын тогоо, ваар сав руу хатгаж, сэрээнд зоогдож гарч ирсэн бүхнийг тахилч авдаг байв. Тэд Шилод ирсэн бүх израилчуудад ингэдэг байлаа. 15 Түүнээс гадна хүмүүсийг өөх шатаахаас өмнө тахилчийн зарц ирээд, өргөл өргөж буй хүнд
—Тахилч нарт шарах мах өг. Тахилч чамаас чанасныг авахгүй, зөвхөн түүхий мах л авна гэдэг байв. 16 Хэрэв тэр хүн түүнд
—Эхлээд бүх өөх шатаг, дараа нь сэтгэлдээ хүссэнээ авагтун гэж хэлбэл тахилчийн зарц
—Үгүй, чи үүнийг надад одоо өг! Эс тэгвээс би хүчээр авна гэдэг байв. 17 Ийнхүү эдгээр залуусын нүгэл нь ЭЗЭНий өмнө асар их байсан агаад тэд ЭЗЭНий өргөлийг үл тоомсорлож байлаа.
Шило дахь Самуел хүү
18 Харин балчир хөвгүүн Самуел маалинган ефод зүүгээд ЭЗЭНий өмнө үйлчилж байв. 19 Самуелын эх нь түүнд зориулан бяцхан хувцас хийж, жил бүр тахил өргөхөөр нөхрийнхөө хамт ирэхдээ түүнийгээ авчирч өгдөг байв. 20 Тэгэхэд Елкана болон түүний эхнэрийг Ели ерөөн
—ЭЗЭНд зориулсан гуйлтын чинь оронд ЭЗЭН энэ эмэгтэйгээс чамд үр хүүхдүүдийг соёрхох болтугай! гэжээ. Тэгээд тэд гэр лүүгээ буцаж явав.
21 ЭЗЭН Ханнад айлчлан ирж, тэрээр жирэмслэн ахиад гурван хөвгүүн, хоёр охин төрүүлжээ. Балчир хөвгүүн Самуел ЭЗЭНий өмнө өсөж торнив.
Елигийнхний эсрэг эш үзүүллэг
22 Ели өндөр настай болжээ. Өөрийнх нь хөвгүүд бүх Израилд юу үйлдэж байгааг, тэд бас чуулганы асрын үүдэнд үйлчилдэг эмстэй унтаж хэвтдэг тухай Ели сонсдог байв. 23 Тэрээр хөвгүүддээ
—Би энэ ард олноос ёрын муу хэргийг чинь сонслоо. Та нар ийм хэрэг юунд үйлдэнэ вэ? 24 Ингэж болохгүй, хүүхдүүд минь. ЭЗЭНий хүмүүсийн дунд яригдаж буй, надад сонсогдсон энэ сураг сайн юм огт биш. 25 Хэрэв нэг хүн нөгөө хүнийхээ эсрэг нүгэл үйлдвэл Бурхан түүний төлөө зуучилна. Харин хүн ЭЗЭНий эсрэг нүгэл үйлдвэл хэн түүний төлөө зуучлах вэ? гэж сургамжлав. ЭЗЭН тэднийг үхүүлэхээр шийдсэн тул тэд эцгийнхээ үгийг сонссонгүй.
26 Балчир хөвгүүн Самуел улам өсөж торнин, ЭЗЭНий бас хүмүүсийн тааллыг олов.*
27 Тэгтэл Бурханы хүн, Елид ирж
—ЭЗЭН айлдахдаа “Чиний эцгийн гэр Египетэд Фараоны гэрт байхад Би Өөрийгөө тэдэнд илэрхийлсэн бус уу? 28 Миний тахилчид байж, Миний тахилын ширээн дээр тахил өргөж, утлага уугиулж, Миний өмнө ефод зүүлгэхийн тулд Би Израилын хамаг овгоос тэднийг сонгосон бус уу? Израилын хөвгүүдийн бүх галан тахилыг Би чиний эцгийн гэрт өгсөн бус уу?* 29 Миний орших газарт Миний тушааснаар Надад өргөсөн өргөл, тахилууд дээр харин та нар яагаад дэвсэлж бас Миний ард түмэн Израилын өргөсөн тахил бүрийн дээжээр өөрсдийгөө таргалуулан хөвгүүдээ Надаас илүү дээдэлж байна вэ?” гэлээ. 30 Тиймээс Израилын Бурхан ЭЗЭН ийнхүү тунхаглаж байна. “Чиний гэр болон чиний эцгийн гэр Миний өмнө мөнхөд явна хэмээн Би айлдсан билээ.” Харин одоо ЭЗЭН тунхаглан “Тэгэх нь Надаас хол байг! Намайг хүндэтгэгчдийг Би хүндэтгэнэ. Харин Намайг үл тоомсорлогсдыг Би үл хайхарна. 31 Харагтун, Би чиний тэнхээг, чиний эцгийн гэрийн тамирыг тасалж, гэрт чинь өвгөн настан үгүй болох өдөр айсуй. 32 Израилд сайнаар соёрхдог бүхний дунд Миний орших газар гамшиг болохыг чи үзнэ. Чиний гэрт настай хүн үүрд үгүй болно. 33 Гэсэн ч нүдийг чинь нулимсаар сохолж, сэтгэлийг чинь гансруулахын тулд Би танай бүх хүнийг Өөрийн тахилын ширээнээс зайлуулахгүй. Чиний гэрийн бүх үрс ид залуугаараа үхнэ. 34 Чиний хоёр хүү Хофни, Финехас нарт тохиолдох зүйл нь чамд тэмдэг болно. Тэр хоёр нэг өдөр үхнэ. * 35 Харин сэтгэл зүрх, санаа бодлын минь дагуу үйлдэх үнэнч тахилчийг Би Өөртөө гаргаж ирнэ. Би түүнд бат үнэн гэрийг барьж өгнө. Тэр үргэлж Миний тосолсон хүний өмнө алхах болно. 36 Чиний гэрт амьд үлдэгсэд бүгд задгай мөнгөн зоос, үмх талхны төлөө түүнд сөгдөхөөр ирж, «Үмх талхтай болмоор байна, тахилчийн ямар нэг албанд намайг тавьж өгөөч» гэж гуйх болно” гэсэн гэв.
- 2:1–10 Лк 1:46–55
- a2:10 эврийг: Эрх сүр гэсэн утгатай.
- 2:26 Лк 2:52
- 2:28 Гэт 28:1–4; Лев 7:35–36
- 2:34 1См 4:11