4 1 Ийнхүү Самуелын үг Израил даяар тархав.
ЭЗЭНий авдар булаагдав
Израил филистчүүдтэйa тулалдахаар гарч, Ебенезерийн дэргэд хуарагнан, харин филистчүүд Афект хуарагнан буув. 2 Филистчүүд Израилтай тулалдахаар жагсаж ирсэн бөгөөд тулаан газар авахад Израил филистчүүдэд цохигдон филистчүүд хээр талд тэдний цэргээс дөрвөн мянга орчим хүнийг алав. 3 Ард олныг хуаранд буцаж ирэхэд Израилын ахмадууд
—ЭЗЭН яагаад өнөөдөр биднийг филистчүүдэд цохиулсан бэ? Шилогоос ЭЗЭНий гэрээний авдрыг өөрсдөдөө авчиръя. Тэгвэл Тэрb бидний дунд ирж, биднийг дайснуудын гараас аврах юм гэж хэлжээ. 4 Тиймээс ард олон Шило руу хүмүүсийг илгээж, херүбүүдийн дээр орших түг түмдийн ЭЗЭНий гэрээний авдрыг тэндээс авч ирэв. Елигийн хоёр хөвгүүн Хофни, Финехас нар Бурханы гэрээний авдрын хамт тэнд ирлээ.*
5 ЭЗЭНий гэрээний авдрыг хуаранд оруулж ирэхэд бүх Израил газар доргион хүнгэнүүлсэн их дуугаар уухайлан хашхирав. 6 Филистчүүд тэр дуу чимээг сонсоод
—Еврейчүүдийн хуаранд юун сүртэй уухай гарах нь энэ вэ? гэлцэв. Тэгээд ЭЗЭНий гэрээний авдрыг хуаранд оруулж ирснийг тэд мэдлээ. 7 Филистчүүд
—Бурхад тэдний хуаранд залран ирлээ хэмээлдэн түгшицгээв. Тэгээд
—Урьд нь ийм юм тохиолдож байгаагүй тул бид золгүй еэ! 8 Бид золгүй еэ! Хэн биднийг энэ агуу хүчит бурхдын мутраас мултлан аврах вэ? Эдгээр нь египетчүүдийг элдэв төрлийн гамшгаар цөлд цохисон бурхад мөн билээ. 9 Филистчүүд ээ, зоригтой, эрэлхэг байгтун. Эс тэгвээс еврейчүүд та нарын боол байсны адил та нар еврейчүүдийн боол болно. Эрэлхэг байж, тулалдагтун гэлцэв.
10 Тэгээд филистчүүд тулалдсанд Израил цохигдон хүн бүр майхан руугаа зугтав. Израилаас гучин мянган явган цэрэг хөсөр унасан нь аймшигтай том ялагдал байлаа. 11 Бурханы авдар булаагдаж, Елигийн хоёр хөвгүүн Хофни, Финехас нар ч алуулав.
Елигийн үхэл
12 Нэгэн бениамин хүн тулалдааны тэргүүн шугамаас зугтан тэр өдрөө Шилод ирэв. Тэр хувцсаа урж, толгойдоо шороо цацсан байлаа. 13 Түүнийг ирэхэд Ели замын хажуу талын сандал дээр суун зүрх нь Бурханы авдрын төлөө түгшиж байсан учир анхааран харуулдаж байлаа. Өнөөх хүн хот руу орж мэдээг дуулгахад хотынхон бүгд бархиран хашхиралдав. 14 Ели уйлалдах дууг сонсоод
—Энэ юун дуу шуугиан бэ? гэсэнд өнөөх хүн яаравчлан ирж Елид мэдүүлэв. 15 Ели ерэн найман настай бөгөөд нүд нь харанхуйлан юм үзэхээ больсон байв. 16 Өнөөх хүн Елид
—Би тулалдаанаас ирээд байгаа хүн байна. Өнөөдөр тулалдааны талбараас зугтаж ирлээ гэсэнд Ели
—Юу болсон бэ? Хүү минь гэж асуув. 17 Тэгэхэд мэдээ хүргэгч
—Израил филистчүүдээс зугтааж, ард олны эсрэг их хядлага болов. Таны хоёр хүү Хофни, Финехас нар үхэж, Бурханы авдар булаагдсан гэж хариуллаа. 18 Түүнийг Бурханы авдрын тухай дурдахад Ели хаалганы хажууд буй сандал дээрээсээ гэдрэг унан хүзүүгээ хугалж үхэв. Учир нь тэр өтөл настай лагс биетэй хүн байжээ. Тэрээр дөчин жил Израилыг шүүжээ.
19 Түүний бэр, Финехасын эхнэр жирэмсэн, төрөх дөхсөн байлаа. Бурханы авдар булаагдаж, хадам эцэг болон нөхөр нь үхсэн тухай мэдээг сонсонгуут төрөх өвдөлт нь эхэлж, тэрээр сөхөрч суун хүүхдээ төрүүлэв. 20 Тэр эмэгтэйг үхэх гэж байхад тэнд байсан эмэгтэйчүүд
—Чи хөвгүүн төрүүлсэн тул бүү ай гэж хэлсэн боловч тэр юу ч хариулсангүй, зүрх сэтгэл нь ч хөдөлсөнгүй. 21 Бурханы авдар булаагдсанаас болон хадам эцэг бас нөхрийнхөө улмаас тэр эмэгтэй
—Алдар нь Израилаас салж одов гээд хөвгүүнээ Ихабодc гэж нэрлэв. 22 Тэрээр
—Бурханы авдар булаагдсанаас болж алдар нь Израилаас салж одов гэжээ.
- a4:1 Эх бичвэртээ энэ үг байхгүй.
- b4:3 эсвэл энэ
- 4:4 Гэт 25:22
- c4:21 Ихабод: евр. “алдаргүй” гэсэн утгатай.