Ахабын хөвгүүдийг хядав
10 1 Самарид Ахаб далан хүүтэй байв. Иехү захидлууд бичиж, тэдгээрийг Самари руу, Иезреелийнa захирагчид болох ахмадуудад мөн Ахабын үрсийн асрамжлагчдад илгээн
— 2 Та нарт эзний тань хөвгүүд, тэрэг, морьд, бэхлэгдсэн хот болон зэвсгүүд байгаа тул энэ захидал та нарт очингуут 3 өөрийн эзний хөвгүүдээс хамгийн сайн, хамгийн зохистойг сонгож, эцгийнх нь хаан ширээнд залаад, эзнийхээ гэрийн төлөө тулалдагтун гэжээ. 4 Харин тэд ихэд айн
—Харагтун, хоёр хаан түүний өмнө тэсэж чадаагүй юм. Тэгвэл бид хэрхэн тэсэж чадах вэ? гэцгээв. 5 Ордны даамал, хотын захирагч, ахлагчид болон асрамжлагч нар Иехүд үг илгээн
—Бид таны боолууд билээ. Бидэнд хэлсэн бүгдийг тань бид гүйцэтгэнэ. Бид ямар ч хүнийг хаанаар өргөмжлөхгүй. Өөрийн таалалд нийцсэн зүйлийг үйлдэгтүн гэв. 6 Тэгэхэд Иехү хоёр дахь удаагаа тэдэнд захидал бичиж
—Хэрэв та нар миний талд бөгөөд миний дууг сонсох бол өөрсдийн эзний хөвгүүд болох эрчүүдийн толгойг авч, маргааш яг өдийд над руу Иезреелд ирэгтүн гэжээ. Тэр үед хааны хөвгүүд болох далан хүн өөрсдийг нь өсгөж буй хотын хүндэт хүмүүсийн хамт байв. 7 Тэдэнд захидал ирэхэд тэд хааны хөвгүүд болох далан хүнийг барьж алаад, тэдний толгойнуудыг сагснуудад хийн, Иезреелд буй Иехү рүү илгээв. 8 Элч ирээд, түүнд
—Тэд хааны хөвгүүдийн толгойнуудыг авчирлаа гэж мэдэгдэхэд Иехү
—Тэдгээрийг гулдан хаалганы үүдэнд өглөө болтол хоёр хэсэг болгон овоологтун гэв. 9 Өглөө Иехү гадагшаа гарч зогсоод, бүх ард түмэнд
—Та нар гэмгүй. Үзэгтүн, би эзнийхээ эсрэг хуйвалдан түүнийг алсан, харин энэ бүгдийг хэн алсан бэ? 10 Ахабын гэрийн тухайд ЭЗЭНий айлдсан Түүний үгээс юу нь орхигдож үлдээгүйb гэдгийг мэдэгтүн. Учир нь ЭЗЭН Өөрийн боол Елиагаар дамжуулан айлдсанаа гүйцэтгэсэн юм гэв. 11 Ингээд Иехү нь Ахабын гэрийнхнээс Иезреелд үлдсэн бүгдийг, тухайлбал түүний хүндэт хүмүүс, дотнын хүмүүс, тахилч нарыг нэгийг ч үлдээлгүй бүгдийг нь хороов.*
12 Тэгээд Иехү босон хөдөлж, Самари руу явав. Замд түүнийг хоньчдын Бет-Екед байх зуур 13 Иудагийн хаан Ахазиагийн төрөл садныхантай Иехү тааралдаж
—Та нар хэн бэ? гэв. Тэд
—Бид Ахазиагийн төрөл садан юм. Бид хааны хөвгүүд болон эх хатны хөвгүүдийн мэндийг асуух гэж яваа гэж хариулав. 14 Иехү
—Тэднийг амьдаар нь баригтун гэж тушаахад тэднийг амьдаар нь барьж, дөчин хоёр хүнийг Бет-Екедийн нүхэнд хороов. Тэднээс хэнийг ч үлдээсэнгүй.
15 Тэрээр тэндээс холдохдоо өөртэй нь уулзахаар ирж буй Рехабын хүү Иехонадабтай уулзжээ. Иехү түүнтэй мэндлээд, түүнд
—Миний зүрх чамд үнэнчийн адил чинийх ч бас надад тийм байна уу? гэхэд Иехонадаб
—Тийм байна гэж хариулав.
—Хэрэв тийм бол гараа өгөгтүн гэхэд тэрээр түүнд гараа өгсөнд Иехү түүнийг тэргэнд оруулав. 16 Иехү
—Надтай хамт явж, ЭЗЭНий төлөөх миний зүтгэлийг харагтун гэв. Ингээд Иехү түүнийг тэргэндээ суулган явлаа. 17 Иехү Самарид ирээд тэнд байсан, Ахабынхнаас үлдсэн бүх хүнийг дуустал нь хядсан бөгөөд ийнхүү Елиад айлдсан ЭЗЭНий үг ёсоор болжээ.
Баалд мөргөгчдийг хядав
18 Дараа нь Иехү бүх ард түмнийг цуглуулаад, тэдэнд
—Ахаб, Баалд бага зэрэг үйлчилдэг байсан бол Иехү түүнд маш их үйлчилнэ. 19 Одоо Баалын бүх эш үзүүлэгчийг, бүх мөргөгч болон бүх тахилчийг нь цуглуул. Би Баалд үлэмж их тахил өргөх тул нэгийг нь ч бүү үлдээ. Үлдсэн хэн боловч амьд үлдэхгүй гэв. Харин Иехү, Баалыг шүтэн бишрэгчдийг устгахын тулд ингэж залилан хэлжээ. 20 Иехү
—Баалд зориулан тусгай чуулааныг ариусгагтун гэсэнд тэд тунхаглав. 21 Тэгээд Иехү Израил даяар хүн илгээсэн бөгөөд Баалын бүх мөргөгчид иржээ. Ирэлгүй үлдсэн нэг ч хүн байгаагүй юм. Тэд Баалын сүмд ороход Баалын сүм нэг захаас нөгөө зах хүртлээ дүүрсэн байв. 22 Иехү хувцасны агуулахыг хариуцсан хүнд
—Баалын бүх мөргөгчдөд хувцас авчрагтун гэж тушаасанд өнөөх хүн тэдэнд хувцас авч ирэв. 23 Иехү, Рехабын хүү Иехонадабын хамт Баалын сүм рүү ороод, Баалын мөргөгчдөд
—Энд та нарын хамт ЭЗЭНий зарц нараас нэг ч хүн байхгүй, гагцхүү Баалд мөргөгчид л байгаа эсэхийг олж харагтун гэв. 24 Тэгээд тэд өргөл болон шатаалт тахилуудыг өргөхөөр дотогш оров. Иехү өөртөө зориулж наян хүнийг гадаа байрлуулан зогсоогоод
—Та нарын гарт оруулж буй хүмүүсээс нэгийг нь ч болов зугтаалгах аваас тэр хүн оронд нь өөрийнхөө амийг өгнө шүү гэж анхааруулав. 25 Тэгээд шатаалт тахил өргөж дуусмагц Иехү харгалзагч ба хааны түшмэдэд
—Дотогш ороод тэднийг хөнөө. Нэг ч хүн зугтах ёсгүй гэв. Тэд илдний ирээр тэднийг хядав. Тэгээд харгалзагчид ба хааны түшмэд бүгдийг нь гарган хаяж, Баалын сүмийн дотоод өрөөнд оров. 26 Тэд Баалын сүмийн хөрөгт багануудыг гаргаад шатаав. 27 Түүнчлэн Баалын багануудыг хугалан Баалын сүмийг нурааж, жорлон болгож орхисон нь энэ өдрийг хүртэл байгаа билээ.
28 Иехү ингэж Израилаас Баалыг устгав. 29 Гэсэн хэдий ч Бетел ба Дан дахь алтан тугалууд буюу Израилаар гэм нүгэл хийлгэсэн Небатын хүү Иеробоамын нүглүүдээс Иехү салж ангижирсангүй.* 30 ЭЗЭН, Иехүд
—Чи Миний мэлмийд зөв зүйтэй гэгдэх зүйлийг хийж, Миний бодсоны дагуу Ахабын гэрийнхэнд үйлдсэн тул чиний дөрвөн үеийн хөвгүүд Израилын хаан сэнтийд заларна гэж айлджээ. 31 Гэвч Израилын Бурхан, ЭЗЭНий хууль дотор бүх зүрх сэтгэлээсээ алхахыг Иехү анхаарсангүй. Израилаар нүглийг үйлдүүлсэн Иеробоамын нүглүүдээс тэрээр салж ангижирсангүй.
Иехү өөд болов
32 Тэр өдрүүдэд ЭЗЭН, Израилыг бутраан тасалж эхэлсэн юм. Израилын бүх газар нутагт Хазаел тэднийг ялж байв. 33 Йорданы зүүнтээд Гилеадын бүх нутгийг буюу гадчууд, реубенчүүд, манассечуудыг мөн Арноны хөндий дэх Ароераас Гилеад, Башан зэргийг хүртэл ялав.
34 Иехүгийн бусад үйл хэрэг, түүний хийсэн бүхэн мөн түүний хүч чадал зэрэг нь Израилын Хаадын шастир номд бичигдсэн бус уу? 35 Иехү эцэг өвгөдийнхөө хамт нойрссон бөгөөд тэд түүнийг Самарид нутаглуулсан юм. Түүний хүү Иехоахаз оронд нь хаан болов. 36 Самарид Израилыг захирсан Иехүгийн хугацаа нь хорин найман жил байлаа.
- a10:1 ЭЗО: хотын
- b10:10 евр. газарт унаагүй
- 10:11 Хос 1:4
- 10:29 1Ха 12:28–30