Иосиагийн шинэчлэл
(2Шс 34:3–7,29–33)
23 1 Тэгээд хаан, хүн илгээж, тэд түүн дээр Иуда болон Йерусалимын бүх ахлагчдыг цуглуулав. 2 Хаан болон Иудагийн бүх эрчүүд, Йерусалимын бүх оршин суугч мөн тахилч нар, эш үзүүлэгчид болон их, бага гэлтгүй бүх ард түмэн түүнтэй хамт ЭЗЭНий өргөө рүү явсан бөгөөд ЭЗЭНий өргөөнөөс олдсон гэрээний номын бүх үгийг тэр тэдний сонорт уншив.
3 Хаан баганын хажууд зогсоод тэрээр ЭЗЭНийг дагаж, өөрийн бүх зүрх, бүх сэтгэлээрээ Түүний тушаал, гэрчлэл, зарлигуудыг сахиж, энэ номд бичигдсэн гэрээний үгсийг гүйцэлдүүлнэ гэж ЭЗЭНий өмнө гэрээ байгуулав. Бүх ард түмэн уг гэрээнд нэгджээ.
4 Тэгээд Баал, Ашера болон тэнгэрийн бүх эрхэст зориулан хийгдсэн бүх эдлэлийг ЭЗЭНий сүмээс гаргахыг тэргүүн тахилч Хилкиа, удаах зэргийн тахилч нар болон хаалгач нарт хаан тушаав. Тэр тэдгээрийг Йерусалимын гадна Кидрон гуунд шатаан, үнсийг нь Бетелд аваачжээ.* 5 Иудагийн хотууд болон Йерусалимын ойр орчимд мөргөлийн өндөрлөгүүд дээр утлага уугиулахаар Иудагийн хаадын томилсон шүтээнүүдийн тахилч нарыг мөн Баал, нар, сар, оддын ордууд болон тэнгэрийн бүх эрхэст утлага уугиулагчдыг тэр бас хөөн зайлуулав. 6 Тэрээр Ашераг ЭЗЭНий өргөөнөөс Йерусалимын гадна гарган, Кидроны гуунд аваачаад, Кидрон гуунд түүнийг шатаан, үнс болгон буталж, үнсийг нь ард олны булшин дээр цацжээ. 7 Тэр бас ЭЗЭНий өргөөний дэргэдэх дуганы янхан эрчүүдийнa байрыг нураав. Тэнд эмэгтэйчүүд Ашерад зориулан хөшиг нэхдэг байсан юм. 8 Тэрээр Иудагийн хотуудаас бүх тахилч нарыг авчран, тахилч нар утлага уугиулж байсан мөргөлийн өндөрлөгүүдийг Гебагаас Беершеба хүртэл бузарлав. Тэрээр хотын захирагч Иошуагийн гулдан хаалганы үүдэнд буюу хотын гулдан хаалганы зүүн гар талд байсан хаалганы мөргөлийн өндөрлөгүүдийг ч нураан хаясан юм. 9 Мөргөлийн өндөрлөгүүдийн тахилч нар Йерусалим дахь ЭЗЭНий тахилын ширээ рүү очоогүй боловч тэд өөрсдийн ах дүүсийн дунд исгээгүй талх иджээ. 10 Мөн ямар ч хүн өөрийн хүү эсвэл охиноо Молехт зориулан гал дундуур гаргахгүй байхын тулд тэр бас Бен-Хинномын хөндийд буй Тофетыг бузарлажээ.* 11 Мөн наранд зориулан Иудагийн хаадын өргөсөн, ЭЗЭНий өргөөний үүдэнд, Натан-Мелех тайганы хашаан дахь танхимын ойролцоо байсан морьдыг зайлуулав. Тэрээр нарны тэрэгнүүдийг галдан шатаав. 12 Ахазын танхимын дээвэр дээр буй, Иудагийн хаадын бүтээсэн тахилын ширээнүүд болон ЭЗЭНий өргөөний хоёр хашаан дотор Манассегийн бүтээсэн тахилын ширээнүүдийг хаан нурааж, тэндээс нь буулган, үнсийг нь Кидрон гуунд асгажээ.* 13 Сидончуудын бузар болох Ашторэт, Моабын бузар болох Хемош, Аммоны хөвгүүдийн бузар болох Милком нарт зориулан Израилын хаан Соломон, Йерусалимын зүүнтээд Мөхлийн уулынb өмнө талд босгосон мөргөлийн өндөрлөгүүдийг хаан бузарлажээ.* 14 Тэрээр онго багануудыг хэсэг болгон хагалж, Ашерагийн модон шонг цавчиж, тэр газруудыг хүний ясаар дүүргэв.
15 Түүнчлэн Бетел дэх тахилын ширээ, Израилаар нүгэл үйлдүүлсэн, Небатын хүү Иеробоамын барьсан мөргөлийн өндөрлөгийн тухайд, тэр тахилын ширээ болон мөргөлийн өндөрлөгийг аль алийг нь нураан,c мөргөлийн өндөрлөгийг шатааж, үнс болгож бутлаад, Ашераг шатаажээ.* 16 Иосиа эргэж уулан дээрх булшнуудыг хараад, хүн илгээн булшнаас яснуудыг авчруулж, тахилын ширээн дээр шатаан, Бурханы хүний тунхагласан ЭЗЭНий үгийн дагуу түүнийг бузарлажээ.* 17 Тэгээд тэр
—Миний харж буй энэ хөшөө юу вэ? гэж асуусанд тэр хотын хүмүүс түүнд
—Иудагаас ирж, Бетелийн тахилын ширээнд таны хийсэн энэ зүйлсийг тунхагласан Бурханы хүнийх гэцгээв.* 18 Хаан
—Түүнийг орхи. Түүний ясыг хэн ч бүү хөндөг гэв. Ингээд тэд түүний ясыг Самариас ирсэн эш үзүүлэгчийн ясны хамт хөндөлгүй орхив. 19 Түүнчлэн Самарийн хотуудад Израилын хаад ЭЗЭНийг уурлуулахаар босгосон мөргөлийн өндөрлөгүүдийн бүх байрыг Иосиа бас зайлуулж, Бетелд үйлдсэнийхээ адилаар тэнд тийнхүү үйлджээ. 20 Тахилын ширээнүүд дээр мөргөлийн өндөрлөгүүдийн бүх тахилч нарыг алж, тэдний дээр хүний ясыг шатаав. Тэгээд тэрээр Йерусалим руу буцав.
Алгасалыг тэмдэглэв
(2Шс 35:1–19)
21 Тэгээд хаан бүх ард түмэнд
—Гэрээний энэ номд бичигдсэн ёсоор өөрийн Бурхан ЭЗЭНд Алгасалыг тэмдэглэгтүн гэж тушаав. 22 Израилыг шүүдэг байсан шүүгчдийн өдрүүдээс ч, Израил болон Иудагийн хаадын бүх өдрүүдэд ч энэ мэтээр Алгасалыг тэмдэглэж байгаагүй билээ. 23 Харин Иосиа хааны арван наймдугаар онд Йерусалим хотноо ЭЗЭНд Алгасалыг сахисан юм. 24 Түүнчлэн ЭЗЭНий өргөөнөөс тахилч Хилкиагийн олсон номд бичигдсэн хуулийн үгсийг гүйцэлдүүлэхийн тулд сүнс дуудагчид, шидтэнүүд, терафим, шүтээнүүд болон Иудагийн газарт ба Йерусалимд үзэгдсэн бүх л бузрыг Иосиа хөөн зайлуулжээ. 25 Мосегийн бүх хуулийн дагуу өөрийн бүх зүрх, бүх сэтгэл, бүх хүч чадлаараа ЭЗЭН өөд эргэсэн түүн шиг хаан түүний өмнө ч байгаагүй, түүнээс хойш ч гарсангүй. 26 Хэдий тийм боловч, Өөрийг нь хилэгнүүлсэн Манассегийн бүх өдөөлтүүдээс болж Иудагийн эсрэг шатсан уур хилэнгийнхээ хатуу ширүүнээс ЭЗЭН эргэсэнгүй. 27 ЭЗЭН айлдахдаа
—Би Израилыг зайлуулсан шиг Иудаг ч мөн Өөрийн мэлмийн өмнөөс зайлуулж, Өөрийн сонгосон хот Йерусалим болон “Миний нэр тэнд байна” гэж айлдсан өргөөгөө Би хөсөр хаях болно гэв.
Иосиа тулаанд алагдав
(2Шс 35:20—36:1)
28 Иосиагийн бусад үйл хэрэг болон түүний хийсэн бүхэн нь Иудагийн Хаадын шастир номд бичигдсэн бус уу?
29 Түүний өдрүүдэд Египетийн хаан Фараон Неко, Ассирийн хаан руу довтлохоор Евфрат мөрөн тийш очих үеэр Иосиа хаан түүнийг амдан очлоо. Тиймээс Фараон түүнтэй Мегиддод тулгарч алжээ. 30 Түүний зарц нар шарилыг нь тэргээр Мегиддогоос Йерусалим руу авч ирээд, өөрийнх нь булшинд оршуулав. Тэр газрын ард түмэн Иосиагийн хүү Иехоахазыг тосолж, эцгийнх нь оронд хаан болгов.
Иехоахазын хаанчлал ба олзлогдол
(2Шс 36:2–4)
31 Иехоахаз хаан болохдоо хорин гурван настай байсан бөгөөд тэрээр Йерусалимд гурван сар хаанчилжээ. Түүний эхийг Либнагийн Иеремиагийн охин Хамутал гэдэг байв. 32 Тэрээр эцэг өвгөдийнхөө үйлдсэн бүхний дагуу ЭЗЭНий мэлмийд ёрын мууг үйлджээ. 33 Түүнийг Йерусалимд захирч чадахгүй болгохын тулд Фараон Неко түүнийг Хамат газар дахь Риблад хорьсон бөгөөд зуун талант мөнгө, нэг талант алтны хэмжээтэй торгуулийг уг газарт ногдуулав. 34 Фараон Неко Иосиагийн хүү Елиакимыг эцгийнх нь оронд хаан болгож, түүний нэрийг Иехоиаким болгон өөрчлөв. Харин Иехоахазыг Египетэд аваачсанд тэр тэндээ үхэв.* 35 Ингээд Иехоиаким Фараонд алт, мөнгийг өгчээ. Гэхдээ Фараоны тушаалаар мөнгө өгөхийн тулд тэрээр уг нутгаас татвар авчээ. Фараон Некод өгөхийн тулд тэрээр тэр нутгийн ард түмнээс хүн бүрийн хөрөнгийн хэмжээний дагуу алт мөнгийг авав.
Иудаг Иехоиаким хаанчлав
(2Шс 36:5–8)
36 Иехоиаким хаан болохдоо хорин таван настай байсан бөгөөд Йерусалимд арван нэгэн жил хаанчлав. Түүний эхийг Румагийн Педаиагийн охин Зебида гэдэг байв.* 37 Тэрээр эцэг өвгөдийнхөө үйлдсэн бүхний дагуу ЭЗЭНий мэлмийд ёрын мууг үйлджээ.
- 23:4–6 2Ха 21:3; 2Шс 33:3
- a23:7 дуганы янхан: Канаанчуудын үржил шимийн бурхны мөргөлд янхан болж үйлчилдэг эмс, эрс.
- 23:10 Лев 18:21; Иер 7:31, 19:1–6, 32:35
- 23:12 2Ха 21:5; 2Шс 33:5
- b23:13 ЭЗО: Чидун уул эсвэл Мөхлийн буюу Нүглийн уул
- 23:13 1Ха 11:7
- c23:15 ЭЗО: чулуун тавцанг хэсэг болгон буталжээ эсвэл тахилын ширээг шатаажээ.
- 23:15 1Ха 12:33
- 23:16 1Ха 13:2
- 23:17 1Ха 13:30–32
- 23:34 Иер 22:11–12
- 23:36 Иер 22:18–19, 26:1–6, 35:1–19