Хезекиа Исаиатай зөвлөв
(Иса 37:1–7)
19 1 Хезекиа хаан үүнийг сонсмогц хувцсаа урж, таар нөмрөн ЭЗЭНий өргөөнд оров. 2 Тэрээр ордны даамал Елиаким, гүүш Шебна нарыг тахилчдын ахмадуудын хамт таар нөмөргөөд Амозын хүү эш үзүүлэгч Исаиа руу явуулав. 3 Тэд Исаиад
—Хезекиа ингэж хэлэв. “Энэ өдөр зовлон шаналан, зэмлэл, гутамшгийн өдөр юм. Учир нь төрж буй хүүхэд умайн амсарт ирсэн боловч төрүүлэх чадал алга. 4 Амьд Бурханыг доромжлохоор өөрийн эзэн Ассирийн хаанаас илгээгдсэн Рабшакегийн үгийг ЭЗЭН Бурхан тань сонссон биз. Таны Бурхан ЭЗЭН сонссон үгийнхээ төлөө түүнийг зэмлэнэ биз. Тиймээс үлдсэн амьд хүмүүсийн төлөө залбирлаа өргөөч” гэжээ. 5 Ингээд Хезекиа хааны зарц нар Исаиа дээр ирэв. 6 Исаиа тэдэнд
—Та нар эзэндээ ингэж хэлэгтүн. “ЭЗЭН айлдахдаа «Намайг доромжилсон Ассирийн хааны боолуудын үгс буюу чамд сонсогдсон тэдгээр үгсээс бүү айгтун. 7 Үзэгтүн, Би түүний дотор нэг сүнс тавихад тэр нэг мэдээ сонсоод, нутагтаа буцна. Би түүнийг нутагт нь илдээр унагана» гэлээ” хэмээв.
Сеннахерибын занал
(Иса 37:8–20)
8 Тэгтэл Рабшаке буцаж ирээд, Лахишийг Ассирийн хаан орхисныг сонсоод, түүнийг Либнагийн эсрэг дайтаж байгааг нь мэдэв. 9 Мөн Кушийн хаан Тирхакагийн тухайд
—Үзэгтүн, тэр чиний эсрэг дайтахаар хөдөлсөн гэхийг хаан сонсоод, тэрээр Хезекиад элч нарыг илгээж
— 10 Иудагийн хаан Хезекиад та нар ингэж хэл. “Чиний итгэдэг Бурхан «Йерусалим Ассирийн хааны гарт орохгүй» гэж чамайг бүү мэхлэг. 11 Үзэгтүн, Ассирийн хаад бүх газрыг бүрэн устгаж, юу хийснийг нь чи сонссон билээ. Тэгэхээр чи аврагдана гэж үү? 12 Гозан, Харан, Резеф болон Телассарт байсан Едений хөвгүүд буюу миний эцэг өвгөдийн устгасан үндэстнүүдийн бурхад тэднийг аварсан уу? 13 Хаматын хаан, Арпадын хаан, Сефарваимын хотын хаан болон Хена, Иввагийн хаад хаана байна?” гээрэй гэв.
Хезекиагийн залбирал
14 Ингээд Хезекиа, элч нарын гараас захидлыг авч уншаад, ЭЗЭНий өргөө рүү явж, уг захидлыг ЭЗЭНий өмнө дэлгэв. 15 ЭЗЭНий өмнө Хезекиа залбиран
—Херүбүүдийн дээр залрагч, Израилын Бурхан ЭЗЭН! Зөвхөн Та дэлхий дээрх бүх хаанчлалын ганц Бурхан мөн. Та тэнгэр ба газрыг буй болгосон билээ.* 16 ЭЗЭН, чих тавин сонсооч. ЭЗЭН, мэлмийгээ нээн хараач. Амьд Бурханыг доромжлохоор Сеннахерибын илгээсэн үгийг сонсооч. 17 ЭЗЭН, Ассирийн хаад үнэхээр үндэстнүүдийг болон газар нутгийг нь сүйтгээд, 18 бурхдыг нь галд хаясан. Учир нь тэдгээр нь бурхад бус, харин хүний гарын бүтээл, мод чулуу байв. Тиймээс тэд устсан билээ. 19 Тиймээс бидний Бурхан ЭЗЭН минь ээ, биднийг түүний гараас авраач гэж би гуйж байна. Тэгвэл газар дэлхийн бүх хаанчлалууд Таныг ЭЗЭН, ганц Бурхан гэдгийг мэдэх болно гэв.
20 Тэгтэл Амозын хүү Исаиа, Хезекиад үг илгээн
—Израилын Бурхан ЭЗЭН ингэж айлдаж байна. “Ассирийн хаан Сеннахерибын талаар чиний Надад залбирсныг Би сонслоо” гэв. 21 Түүний тухайд ЭЗЭНий айлдсан үг:
“Онгон охин Сион минь чамайг тэр басамжлан элэглэв.
Йерусалим охин минь чиний араас толгойгоо тэр сэгсрэв.
22 Хэнийг чи басамжлан доромжлов?
Хэний эсрэг дуугаа өндөрсгөн,
Ихэмсгээр нүдээ өргөв?
Израилын Ариун Нэгэний эсрэг!
23 Чи элч нараараа дамжуулан Эзэнийг доромжилж,
«Би тэрэгнийхээ олноор уулсын өндөрлөгүүдэд,
Ливаны хамгийн алслагдсан хэсгүүдэд хүрлээ.
Тэндхийн өндөр хуш, шилмэл майлс моддыг би тас цавчлаа.
Түүний хамгийн алс хязгаар, хамгийн өтгөн ойд би нэвтрэн орлоо.
24 Би малтаж, харийн усыг ууж,
Хөлийнхөө улаар Египетийн бүх голыг хатаасан билээ» гэв.
25 Чи сонсоогүй юм уу?
Өнө эртнээс Би үүнийг төлөвлөж,
Эрт цагт үүнийг хийсэн юм.
Чамаар бэхлэгдсэн хотуудыг нуранги балгас болгохыг
Одоо Би биелэл болголоо.
26 Иймээс тэдний оршин суугчид хүчин мөхөсдөж,
Айн түгшиж, ичгүүрт орсон билээ.
Тэд хээр талын өвс, ургамал ногоо шиг,
Дээвэр дээр ургаад нахиалахаасаа өмнөa сүйтгэгддэг өвс мэт болов.
27 Харин Би чиний суух болон гарах орохыг
Миний өөдөөс шазруун байгааг чинь ч мэднэ.
28 Чи Миний эсрэг уурлаж,
Чиний маадгар зан чихэнд минь хүрсэн учраас
Би хамарт чинь дөр юугаа зүүж,
Амыг чинь хазаарлаж,
Ирсэн замаар чинь чамайг буцаана.
29 Тэгээд энэ нь чамд тэмдэг болно. Энэ жил чи юу ургасныг нь идэж, хоёр дахь жилд мөн түүнээс юу гарсныг нь идэж, харин гурав дахь жил нь тарьж хураан, усан үзэм тариалж, түүнийхээ үр жимсийг идэх болой. 30 Иудагийн гэрийн амьд үлдэгсэд дахин доогуураа үндэслэн, дээгүүрээ үр жимс гаргах болно. 31 Учир нь Йерусалимаас үлдэгсэд, Сион уулаас аврагдагсад гарч ирнэ. Түг түмдийн ЭЗЭНий зүтгэл үүнийг гүйцэлдүүлнэ. 32 Тиймээс Ассирийн хааны тухайд ЭЗЭН ингэж айлдаж байна. «Тэр энэ хотод ирэхгүй, нум сумаар ч харвахгүй. Хотын өмнө тэрээр бамбайтай ирэхгүй, бүслэлт овоо ч босгохгүй. 33 Тэр ирсэн замаараа буцах бөгөөд энэ хотод орж ирэхгүй» гэж ЭЗЭН айлдаж байна. 34 Учир нь Би Өөрийнхөө төлөө болон зарц Давидынхаа төлөө энэ хотыг аврахаар хамгаалах болно” гэлээ.
Сеннахерибын ялагдал ба үхэл
35 Тэгтэл тэр шөнө нь ЭЗЭНий тэнгэрэлч гарч ирээд, ассиричуудын хуаранд зуун наян таван мянган хүнийг цохив. Хүмүүс өглөө эрт босоод харахад тэд бүгд үхдэл болсон байжээ. 36 Ингээд Ассирийн хаан Сеннахериб хөдөлж, буцаж очоод Ниневед амьдрав. 37 Түүнийг Нисрох бурхныхаа дуганд мөргөл үйлдэж байхад нь хүү Адраммелех, Шарезер нар нь түүнийг илдээр алаад өөрсдөө Арарат нутаг руу зугтав. Түүний оронд хүү Есархаддон нь хаан болжээ.
- 19:15 Гэт 25:22
- a19:26 эсвэл дорнын халуун салхинд цохиулж