12 1 Дараа нь ЭЗЭН, Натаныг Давид руу илгээсэнд тэр Давид дээр ирж
—Нэгэн хотод хоёр хүн байжээ. Нэг нь баян, нөгөө нь ядуу зүдүү хүн байв.* 2 Баян хүн нь үлэмж их хонь болон үхэр сүрэгтэй байжээ. 3 Харин ядуу нь өөрөө худалдан авч тэжээсэн нэг бяцхан охин хурганаас өөр юу ч үгүй юмсанж. Хурга түүнтэй болон хүүхдүүдтэй нь хамт өсөн бойжиж, талхнаас нь идэж, аяганаас нь ууж, өвөрт нь унтаж, тэр хүнд яг л охины нь адил байв. 4 Гэтэл баян хүнийд аянчин иржээ. Өөр дээр нь ирсэн аянчинд зориулан хонь болон үхэр сүргээсээ төхөөрөхийг баян хүн хүссэнгүй. Харин тэрээр ядуу хүний охин хургыг авч, өөр дээр нь ирсэн хүнд зориулан төхөөрчээ гэв. 5 Тэгэхэд Давид тэр хүнд ихэд хилэгнэж Натанд
—ЭЗЭН амьд! Үүнийг үйлдэгч нь үхэг. 6 Тэр хүнд өрөвдөх сэтгэл байсангүй. Ийм хэрэг үйлдсэн учраас охин хурганы төлөө тэрээр дөрөв нугалж төлөх ёстой гэв.
7 Тэгэхэд Натан, Давидад
—Тэр хүн нь та билээ! Израилын Бурхан ЭЗЭН айлдахдаа “Би чамайг Израилын хаанаар тослон томилсон. Саулын гараас аварч гаргасан нь ч Би. 8 Эзний чинь гэрийг Би чамд өгч, түүний эхнэрүүдийг чиний гарт оруулсан. Израил болон Иудагийн гэрийг Би чамд даатгасан. Хэрэв энэ нь дэндүү багадсан бол Би чамд энэ мэт зүйлсийг илүү ихээр нэмж өгөх байсан! 9 Гэтэл чи юунд ЭЗЭНий мэлмийд ёрын мууг үйлдэн, Түүний үгийг үл тоомсорлов? Чи хит хүн Уриаг илдээр алсан бөгөөд эхнэрийг нь өөрийн эхнэр болгон авч, өөрийг нь Аммоны хөвгүүдийн илдээр алуулжээ. 10 Тиймээс одоо чиний гэрээс хэзээ ч илд салахгүй. Учир нь чи Намайг үл тоомсорлож, хит хүн Уриагийн эхнэрийг өөрийн эхнэр болгон авсан” гэлээ. 11 Бас ЭЗЭН ингэж айлдаж байна. “Үзэгтүн, Би гэрийнхний чинь дотроос чиний эсрэг бузар мууг гаргуулна. Чиний нүдэн дээр эхнэрүүдийг чинь авч хөршид чинь өгнө. Тэр хүн гэгээн цагаан өдөр чиний эхнэрүүдтэй унтах болно.* 12 Чи энэ явдлыг нууцаар үйлдсэн бол, харин Би хамаг Израилын өмнө, гэгээн цагаан өдөр үүнийг гүйцэлдүүлнэ” гэж байна хэмээн хэлэв.
13 Тэгэхэд Давид, Натанд
—Би ЭЗЭНий эсрэг нүгэл үйлдлээ гэв. Натан, Давидад
—ЭЗЭН чиний нүглийг хэлтрүүлсэн тул чи үхэхгүй. 14 Гэлээ ч хийсэн энэ хэргээрээ чи ЭЗЭНий дайснуудад доромжлох боломжийг өгсөн тул чиний хүү заавал үхнэ гэлээ. 15 Ингээд Натан гэр өөдөө буцав.
Батшебагийн хүүхэд үхэв
Уриагийн бэлэвсэн эхнэрийн Давидад төрүүлсэн хүүг ЭЗЭН цохисонд тэр хөвгүүн хүнд өвчинд нэрвэгдэв. 16 Тиймээс Давид тэр хүүхдийн төлөө Бурханаас гуйж, мацаг барьсаар гарч орж, шөнөжингөө газар хэвтэв. 17 Түүний гэрийн ахмадууд дэргэд нь зогсон, түүнийг газраас босгох гэсэн боловч Давид босохыг хүссэнгүй мөн тэдэнтэй хамт хоол ч идсэнгүй. 18 Долоо дахь өдөр хөвгүүн нь өөд болжээ. Давидын зарц нар “Харагтун, хөвгүүнийг амьд байхад бид хааныг ятгасан ч тэр бидний дуу хоолойг сонсоогүй. Хөвгүүн нь өөд болсныг одоо хэлбэл хаан өөртөө хор хүргэж магадгүй тул хаанд яаж хэлэх вэ?” гэлцэж, хөвгүүнийг өөд болсныг Давидад хэлэхээс айж байв. 19 Харин Давид зарц нарынхаа шивнэлдэхийг хараад, хөвгүүн өөд болсныг ойлголоо. Ийнхүү Давид зарц нараасаа
—Хөвгүүн өөд болсон уу? гэж асуухад тэд
—Тийм ээ, тэр өөд болов гэв. 20 Ингээд Давид газраас босож, угаал үйлдэн биеэ тослоод, хувцсаа солив. Тэр ЭЗЭНий өргөөнд орж хүндэтгэн мөргөлөө. Дараа нь гэртээ хариад хоол хийлгэж идэв. 21 Тэгтэл зарц нар нь
—Таны үйлдсэн энэ хэрэг ямар учиртай юм бэ? Хөвгүүн амьд байхад та мацаг барьж, уйлж байсан, харин хөвгүүн өөд болоход та босож, хоол идлээ гэлцэв. 22 Давид
—Хөвгүүнийг амьд байх үед би мацаг барин, уйлж байсан нь “ЭЗЭН намайг нигүүлсэж, хөвгүүнийг амьдруулж магад” хэмээн санасны учир юм. 23 Гэтэл одоо тэр өөд болчихлоо. Би юунд мацаг барих ёстой билээ? Би түүнийг дахин эргүүлж авчирч чадах бил үү? Би өөрөө түүн дээр очих болно. Харин тэр над дээр эргэж ирэхгүй гэв.
Соломон төрөв
24 Тэгээд Давид өөрийн эхнэр Батшебаг тайтгаруулан түүн дээр орж, түүнтэй унтав. Тэр эмэгтэй хүү төрүүлээд түүнийг Соломон гэж нэрлэжээ. ЭЗЭН түүнийг хайрласан бөгөөд 25 эш үзүүлэгч Натаны гараар мэдээ илгээн ЭЗЭНий төлөө Иедидиаa гэж түүнийг нэрлэлээ.
Аммончуудыг нухчин дарав
(1Шс 20:1–3)
26 Тэр үед Иоаб, Аммоны хөвгүүдийн Раббагийн эсрэг тулалдан хаан хотыг эзэлж авахад тулав. 27 Иоаб, Давидад элч нарыг илгээн
—Би Раббагийн эсрэг дайтаад усны хотыг нь эзэлж авлаа. 28 Тиймээс одоо, ард олноос үлдсэн хүмүүсийг хамтад нь цуглуулж, энэ хотын эсрэг хуарагнан, эзэлж авагтун. Эс тэгвээс би өөрөө энэ хотыг эзэлж аван энэ хот миний нэрээр нэрлэгдэх болно гэж хэлүүлэв. 29 Иймээс Давид бүх ард олноо цуглуулж Рабба руу очоод хотын эсрэг дайтан, эзэлж авчээ. 30 Тэгээд тэрээр тэдний хааныb титмийг толгойноос нь авав. Титэм нэг талант жинтэй алт бөгөөд эрдэнийн чулуу суулгасан байв. Тэр титмийг Давидын толгойд өмсгөжээ.c Тэр хотоос Давид маш их хэмжээний олз омог авчрав. 31 Давид бас тэр хотод байсан хүмүүсийг авчран хөрөө, ирт төмөр зээтүү ба төмөр сүхээр хийх ажилд тавьж,d тоосго цохиулав. Аммоны хөвгүүдийн бүх хотод Давид энэ мэтээр үйлдэв. Тэгээд Давид болон бүх ард олон Йерусалимд буцаж иржээ.
- 12:1 Дуу 51 (гарчиг)
- 12:11–12: 2См 16:22
- a12:25 Иедидиа: евр. “ЭЗЭНд хайрлагдсан” гэсэн утгатай.
- b12:30 эсвэл Аммончуудын шүтээн Молехын
- c12:30 эсвэл Давид титмийн эрдэнэсийг авч өөрийнхдөө шигтгэжээ.
- d12:31 эсвэл 1Шс 20:3 үз.