Иш-Бошетыг хороов
4 1 Абнерыг Хебронд өөд болсныг Саулын хүү сонсоод, гар нь суларсан бөгөөд хамаг Израил сандран тэвдэв. 2 Саулын хүүд дээрэмчний хоёр толгойлогч байлаа. Нэгнийх нь нэр Баана, нөгөөгийнх нь нэр Рехаб бөгөөд хоёулаа Бениамин овгоос гаралтай, беерот хүн Риммоны хөвгүүд байв. (Учир нь Бееротыг ч бас Бениамины нэгэн хэсэг гэж үздэг байв. 3 Беерот хүмүүс Гиттаим руу зугтан ирж, энэ өдрийг хүртэл тэнд цагаачлан суурьшжээ.)
4 Саулын хүү Ионатанд нэгэн хөл муутай хөвгүүн байв. Саул болон Ионатаны тухай мэдээ Иезреелээс ирэх үед тэр хүү таван настай байж. Асрагч нь түүнийг тэврэн зугтсан бөгөөд яарч сандран гүйж яваад хүүг унагаснаас болж хүү хазганах болжээ. Тэр хүүгийн нэрийг Мефибошет гэдэг байв.*
5 Беерот хүн Риммоны хөвгүүд болох Рехаб, Баана нар өдрийн халуунд Иш-Бошетын гэрт ирэхэд Иш-Бошет үд дээр орондоо хэвтэж байлаа. 6 Тэд буудай авах гэж байгаа мэтээр гэр дотор ороод түүний хэвлийг бүлэв. Тэгээд Рехаб болон түүний ах Баана нар зугтацгаалаа. 7 Тэднийг гэрт орох үед Иш-Бошет нойрсох танхимдаа орон дотроо хэвтэж байсан агаад тэд түүнийг алаад, толгойг нь огтолж авсан аж. Тэгээд толгойг нь авч, шөнөжингөө цөлийн замаар явжээ. 8 Тэд Иш-Бошетын толгойг Хебронд буй Давид хаанд авчраад
—Үүнийг хараач, таны аминд заналхийлж байсан таны дайсан Саулын хүү Иш-Бошетын толгой энэ байна. ЭЗЭН өнөөдөр Саул болон түүний үр удмаас эзэн хааны минь төлөө ийнхүү өшөөг авуулав гэж айлтгав. 9 Беерот хүн Риммоны хөвгүүд болох Рехаб болон түүний ах Баана нарт Давид хариулан
—Миний амийг зовлон шаналан бүхнээс аварсан ЭЗЭН амьд! 10 Нэгэн хүн надад “Харагтун, Саул үхэв” гэж мэдэгдэж, өөрийгөө сайхан мэдээ авчирлаа гэж тооцоход нь би түүнийг барьж, Зиклагт алсан. Мэдээнийх нь төлөө түүнд өгсөн шагнал тэр байлаа.* 11 Тэгвэл гэм бурууг үйлдэгч хүмүүс зөв шударга хүнийг өөрийнх нь гэрт, өөрийнх нь орон дээр алсан байхад, одоо би цусыг нь та нарын гараас шаардаж, та нарыг хорвоогоос арчиж хаяхгүй юм гэж үү? гэв. 12 Тэгээд Давид залууст тушаахад залуус нь тэднийг алж, гар хөлийг нь цавчин, Хебронд цөөрмийн дэргэд дүүжлэв. Харин тэд Иш-Бошетын толгойг авч, Хеброн дахь Абнерын булшинд тавив.
- 4:4 2См 9:3
- 4:10 2См 1:1–16