Арван хоёр элч
(Мк 3:13–19; Лк 6:12–16)
10 Есүс арван хоёр шавиа дуудаад, тэдэнд бузар сүнснүүдээс дээгүүрх эрх мэдлийг өгсөн нь тэдгээрийг зайлуулах, бүх төрлийн өвчин эмгэгийг эдгээхийн тулд ажээ. 2 Арван хоёр элч нарын нэрс нь: Петр гэгддэг Симоноос эхлээд түүний дүү Андрей, Зебедеен хүү Иаков, түүний дүү Иохан, 3 Филип, Бартоломай, Томас, татвар хураагч Матай, Алфайн хүү Иаков, Таддай, 4 канаан хүна Симон болон Есүсээс урвасан Искариотын Иудас нар билээ.
Арван хоёроо илгээв
(Мк 6:7–13; Лк 9:1–6)
5 Есүс эдгээр арван хоёрыг илгээж, тэдэнд ийнхүү тушаан хэлжээ.
—Харийнхны замаар бүү яв. Самарийнхны хотоор ч бүү ор. 6 Харин Израилын гэрийн төөрсөн хоньд дээр оч. 7 Та нар явахдаа “Тэнгэрийн хаанчлал айсуй” гэж тунхаглагтун.* 8 Өвчтэйг нь эдгээ, үхэгсдийг босго, уяман өвчтэйг нь цэвэрлэ, чөтгөрийг зайлуул. Үнэгүй авснаа үнэгүй өг. 9 Бүсэндээ алт ч, мөнгө ч, зэс ч бүү авч яв. 10 Аян замдаа богц ч, хос дээл ч, гутал ч, таяг ч бүү ав. Учир нь ажилчин хоол хүнсээр хангагдах нь зохистой.* 11 Ямар ч хот тосгонд очсон тэндхийн зохистой хүнийг олж мэдээд, явтлаа тэндээ бай. 12 Айлд орохдоо мэндийг нь мэд. 13 Айл чинь зохистой бол амар амгалан чинь тэдэнд хүрэг. Харин зохисгүй бол амар амгалан чинь та нарт буцаж ирэг. 14 Та нарыг хүлээн авахгүй,үгийг чинь үл сонсох хүний гэрээс эсвэл хотоос нь гарахдаа хөлийнхөө тоосыг сэгсэрч унага.* 15 Үнэнээр Би та нарт хэлье. Шүүлтийн өдөр Содом ба Гоморра нутаг нь тэр хотоос илүү хүлцмээр байх болно.*
Хавчлага зовлон айсуй
(Мк 13:9–13; Лк 21:12–17)
16 Харагтун, Би та нарыг сүрэг чонон дундах хонь мэт илгээж байна. Тиймээс могой мэт ухаалаг, тагтаа мэт гэмгүй бай.* 17 Харин хүмүүсээс болгоомжил. Учир нь тэд та нарыг шүүхэд тушааж, синагогуудад та нарыг ташуурдана.* 18 Та нар Миний төлөө захирагчид ба хаадын өмнө хүргэгдэж, тэдэнд болоод харийнханд гэрчлэл болно. 19 Тэд та нарыг баривчлах үед яаж, юу ярих билээ гэж бүү санаа зов. Ярих зүйл чинь тэр цагт та нарт өгөгдөнө. 20 Яригч нь та нар бус, та нарын дотор яригч Эцэгийн чинь Сүнс юм. 21 Ах нь дүүгээ, эцэг нь хүүгээ үхэлд тушаана. Хүүхдүүд нь эцэг эхийнхээ эсрэг босож, тэднийг үхэлд хүргэнэ.* 22 Миний нэрээс болж бүгд та нарыг үзэн ядна. Харин эцсийг хүртэл тэссэн нь аврагдах болно.* 23 Та нарыг энэ хотод хавчвал өөр хот руу зугтацгаа. Үнэнээр Би та нарт хэлье. Хүний Хүүг ирэхээс нааш та нар Израилын хотуудаар явж дуусахгүй. 24 Шавь нь багшийнхаа, боол нь эзнийхээ дээр байдаггүй.* 25 Шавь нь багшийнхаа адил, боол нь эзнийхээ адил болох нь л хангалттай. Хэрэв тэд гэрийн тэргүүнийг Беелзебүл хэмээн нэрлэсэн бол гэрийнхнийг нь түүнээс ч илүүгээр хэлэх бус уу?*
Хэнээс айх вэ?
(Лк 12:2–7, 12:8–9)
26 Иймд тэднээс бүү ай. Илчлэгдэхгүй байхаар далдлагдсан, мэдэгдэхгүй байхаар нууцлагдсан юм гэж огт үгүй билээ.* 27 Харанхуйд та нарт юу хэлснийг минь гэрэлд ярь, чихэнд чинь шивнэснийг минь дээвэр дээр тунхагла. 28 Махбодыг хөнөөвч, сэтгэлийг хөнөөж үл чадах хүнээс бүү ай. Харин махбод болоод сэтгэлийг хоёуланг нь тамд устгаж чадах Түүнээс айгтун. 29 Хоёр бор шувууг задгай зоосоор худалддаг бус уу? Эцэгийн чинь зөвшөөрөлгүйгээр тэдний нэг нь ч газарт унахгүй. 30 Та нарын толгой дээрх ширхэг үс чинь хүртэл тоологдсон. 31 Тиймээс бүү ай! Та нар олон бор шувуунаас ч эрхэм үнэтэй. 32 Тиймээс хүмүүсийн өмнө Намайг хүлээн зөвшөөрөгч хүн бүрийг Би тэнгэр дэх Эцэгийнхээ өмнө мөн хүлээн зөвшөөрнө. 33 Харин хүмүүсийн өмнө Намайг үгүйсгэсэн хэнийг ч болов, Би тэнгэр дэх Эцэгийнхээ өмнө үгүйсгэнэ.*
Энхийг бус илдийг
(Лк 12:51–53, 14:26–27)
34 Намайг газар дээр энх тайвныг авчрахаар ирсэн гэж бүү бод. Би энх тайвныг бус харин илд авчрахаар ирсэн юм. 35 Хүүг эцгийнх нь эсрэг, Охиныг эхийнх нь эсрэг, Бэрийг хадам эхийнх нь эсрэг болгохын тулд Би ирсэн.* 36 Хүний дайсан нь гэр бүлийнхэн нь болно. 37 Эцгээ юм уу, эхээ Надаас илүү хайрлагч нь Миний хувьд зохистой нэгэн биш. Хүүгээ эсвэл охиноо Надаас илүү хайрлагч ч Миний хувьд зохистой нэгэн биш ээ. 38 Загалмайгаа үүрэлгүйгээр Миний хойноос дагагч нь Миний хувьд охистой нэгэн биш.* 39 Амиа ологч нь түүнийгээ алдах болно. Миний төлөө амиа алдсан нь түүнийгээ олох болно.*
Шагнал
(Мк 9:41)
40 Та нарыг хүлээн авах нь Намайг хүлээн авсан хэрэг юм. Намайг хүлээн авах нь Намайг Илгээгчийг хүлээн авсан хэрэг юм.* 41 Эш үзүүлэгчийн нэрээр эш үзүүлэгчийг хүлээн авах хэн боловч эш үзүүлэгчийн шагналыг хүлээн авна. Зөвт хүнийг зөвт хүний нэрээр хүлээн авах хэн боловч зөвт хүний шагналыг хүлээн авна. 42 Үнэнээр Би та нарт хэлье. Энэ өчүүхэн хүмүүсийн нэгэнд, шавийнх нь хувьд уух аяга хүйтэн ус өгсөн хэн ч шагналаа эс алдана гэв.
- а10:4 эсвэл Зеалотын
- 10:7–15 Лк 10:4–12
- 10:10 1Ко 9:14; 1Тм 5:18
- 10:14 Үйл 13:51
- 10:15 Мт 11:24; Эх 19:24–28
- 10:16 Лк 10:3
- 10:17–20 Мк 13:9–11; Лк 12:11–12, 21:12–15
- 10:21 Мк 13:12; Лк 21:16
- 10:22 Мт 24:9,13; Мк 13:13; Лк 21:17
- 10:24 Лк 6:40; Иох 13:16, 15:20
- 10:25 Мт 9:34, 12:24; Мк 3:22; Лк 11:15
- 10:26 Мк 4:22; Лк 8:17
- 10:33 2Тм 2:12
- 10:35–36 Мик 7:6
- 10:38 Мт 16:24; Мк 8:34; Лк 9:23
- 10:39 Мт 16:25; Мк 8:35; Лк 9:24, 17:33; Иох 12:25
- 10:40 Мк 9:37; Лк 9:48, 10:16; Иох 13:20