Сүмийн сүйрлийг зөгнөв
(Мк 13:1–2; Лк 21:5–6)
24 Есүсийг сүмээс гараад холдон явах гэтэл шавь нар нь сүмийн барилгыг үзүүлэхээр хүрч ирэв. 2 Тэр тэдэнд
—Та нар энэ бүгдийг харахгүй байна уу? Үнэнээр Би та нарт хэлье. Энд нэг ч чулуу нөгөө дээрээ үлдэхгүй бүгд нурах болно гэв.
Үеийн төгсгөлийн тэмдэг
(Мк 13:3–13; Лк 21:7–19)
3 Түүнийг Чидун ууланд сууж байхад шавь нар Түүн дээр хувьчлан очиж
—Энэ нь хэзээ болох вэ? Таны залрал болон үеийн төгсгөлийн тэмдэг юу байх вэ? Бидэнд хэлээч гэсэнд 4 Есүс хариуд нь
—Хэн нэг нь та нарыг төөрөлдүүлэх вий, болгоомжил. 5 Учир нь олон хүн “Христ бол би байгаа юм” хэмээн нэрээр минь ирж, олныг төөрөлдүүлнэ. 6 Та нар дайн ба дайны сураг чимээг сонсоно. Бүү цочирд. Тэдгээр нь болох учиртай боловч төгсгөл нь хараахан биш юм. 7 Үндэстэн үндэстнийхээ эсрэг, хаанчлал хаанчлалынхаа эсрэг босох бөгөөд энд тэндгүй өлсгөлөн хийгээд газар хөдлөлт болно. 8 Энэ бүгд нь төрөх өвдөлтийн зөвхөн эхлэл юм.
Хавчлага зовлонг зөгнөв
9 Тэгэхэд та нарыг зовлон гамшигт тушааж, та нарыг ална. Миний нэрээс болж та нарыг бүх үндэстэн үзэн ядах болно.* 10 Тэр үед олноороо бүдрэх бөгөөд нэг нэгнээ тушааж, нэг нэгнээ үзэн ядна. 11 Олон хуурамч эш үзүүлэгч гарч ирж, олныг бүдрүүлнэ. 12 Ёс бус явдал өссөнөөс болж олонхын хайр хөрнө. 13 Харин эцсийг хүртэл тэвчсэн нь аврагдах болно.* 14 Хаанчлалын энэхүү сайнмэдээ дэлхий даяар тунхаглагдаж, бүх үндэстэнд гэрчлэл болно. Тэгэхэд л төгсгөл ирнэ.
Хоосролын бузар
(Мк 13:14–23; Лк 21:20–24)
15 Иймд эш үзүүлэгч Даниелын хэлсэн хоосролын бузрыг та нар ариун газарт зогсохыг харах аваас (уншигч нь ойлгог)* 16 Иудейд байгсад нь уулс руу зугтаг. 17 Дээвэр дээр байгаа нь гэрээсээ юмаа авахаар доош бүү бууг.* 18 Талбайд байгаа нь дээлээ авахаар бүү буцаг. 19 Харин тэр өдрүүдэд жирэмсэн болон хөхүүл эмэгтэйчүүд золгүй еэ! 20 Зугтах чинь өвөл эсвэл Амралтын өдөр таарахгүйн тулд залбир. 21 Учир нь ертөнцийн эхнээс өнөөг хүртэл болоогүй мөн хэзээ ч болохгүй их гамшиг болно.* 22 Хэрэв тэр өдрүүдийг богиносгоогүй бол нэг ч махбод аврагдахгүй байх байлаа. Харин сонгогдсон хүмүүсийн төлөө тэр өдрүүдийг богиносгоно. 23 Хэрэв хэн нэгэн та нарт “Хараач, Христ энд байна” эсвэл “Тэнд байна” гэвэл бүү итгэ. 24 Хуурамч Христүүд ба хуурамч эш үзүүлэгчид гарч ирж, боломжтой бол сонгогдсон хүмүүсийг хүртэл төөрөлдүүлэхийн тулд агуу тэмдгүүд, гайхамшгуудыг үйлдэнэ. 25 Үзэгтүн. Би та нарт урьдаас хэлэв. 26 Тиймээс тэд та нарт “Хараач, Тэр цөлд байна” гэвэл бүү оч эсвэл “Хараач, Тэр дотоод өрөөнд байна” гэвэл бүү итгэ.* 27 Аянга зүүн зүгээс цахилж, баруун зүг хүртэл гялбуулдаг шиг, Хүний Хүүгийн залрал тийм байх болно. 28 Сэг хаана байна, тэнд тас цуглана.*
Хүний Хүүгийн залрал
(Мк 13:24–27; Лк 21:25–28)
29 Гамшгийн тэр өдрүүдийн дараа
Гэнэт нар харанхуйлж,
Сар гэрлээ эс гарган,
Одод тэнгэрээс унаж,
Тэнгэрийн хүчнүүд сэгсрэгдэх болно.*
30 Тэгээд Хүний Хүүгийн тэмдэг тэнгэрт илэрхийлэгдэхэд газрын бүх овог гашуудан уйлж, Хүний Хүүг тэнгэрийн үүлэн дунд аугаа сүр хүч, цог жавхлантайгаар залрахыг харна.* 31 Тэр тэнгэрэлч нараа их бүрээн дуугаар илгээхэд тэд сонгогдсон хүмүүсийг нь тэнгэрийн нэг хязгаараас нөгөө хязгаар хүртэл дөрвөн салхинаас цуглуулах болно.
Инжрийн модноос авах сургамж
(Мк 13:28–31; Лк 21:29–33)
32 Одоо инжрийн модноос сургамж ав. Инжрийн модны мөчир хэдийн зөөлөрч, навчсаа дэлгэхэд зун ойртсоныг та нар мэддэг. 33 Түүнчлэн та нар энэ бүхнийг хараад, үүдэн дээр чинь үүний ойрхон байгаагй бас мэдэгтүн. 34 Үнэнээр Би та нарт хэлье. Энэ бүхнийг тохиолдохоос нааш энэ үеийнхэн өнгөрөн одохгүй. 35 Тэнгэр газар өнгөрөн одно, харин Миний үгс өнгөрөн одохгүй.
Сонор сэрэмжтэй бай
(Мк 13:32–37; Лк 17:26–30,34–36)
36 Харин тэр өдөр, цагийг хэн ч эс мэднэ. Тэнгэрэлч нар ч, Хүү ч мэдэхгүй.к Зөвхөн Эцэг л мэднэ. 37 Учир нь Хүний Хүүгийн залрал Ноагийн өдрүүдтэй адил байх юм.* 38 Үерийн өмнөх өдрүүдэд буюу Ноаг хөвөгч онгоцонд орох өдөр хүртэл тэд идэж ууж, гэрлэж, нөхөрт гарцгааж байлаа. 39 Үер бууж, бүгдийг хаман одох хүртэл тэд мэдээгүй юм. Хүний Хүүгийн залрал ийм байх болно.* 40 Тэр үед хоёр хүн талбайд байхад нэгийг нь авч, нөгөөг нь үлдээнэ. 41 Хоёр эмэгтэй тээрэмдэж байхад нэгийг нь авч, нөгөөг нь орхино. 42 Тиймээс Эзэн чинь ямар өдөр ирэхийг та нар мэдэхгүй тул сонор соргог бай. 43 Харин үүнийг мэд. Хэрэв гэрийн эзэн шөнийн аль манааны үед хулгайч ирэхийг мэдсэн сэн бол тэрээр сонор соргог байж, гэрээ ухуулахгүй байх байсан.* 44 Тиймээс та нар ч мөн бэлэн бай. Хүний Хүү та нарын санаагүй цагт ирнэ.
Итгэмжит ба итгэмжит бус зарц
(Лк 12:41–48)
45 Эзэн нь бусад зарц нарынхаа хоол ундыг цагт нь өгүүлэхээр гэрийнхээ дээгүүр тавьсан, итгэмжит, ухаалаг зарц хэн бэ? 46 Тийнхүү үйлдэж байхад эзэн нь ирээд харвал тэр зарц ерөөлтэй еэ! 47 Үнэнээр Би та нарт хэлье. Эзэн хамаг хөрөнгөө түүнд даатгана. 48 Харин зарц нь өөдгүй муу бол дотроо “Эзэн маань ирэхгүй удна” гээд, 49 анд нь болох зарц нараа зодож, архичидтай нийлэн идэж ууж эхэлтэл 50 бодоогүй өдөр, мэдээгүй цагт нь мөнөөх зарцын эзэн ирээд, 51 түүнийг тас хэрчиж,л хоёр нүүртнүүдтэй ижил хувь онооно. Тэнд уйлаан, шүд хавирах нь буй.
- 24:9 Мт 10:22
- 24:13 Мт 10:22
- 24:15 Дан 9:27, 11:31, 12:11
- 24:17–18 Лк 17:31
- 24:21 Дан 12:1; Илч 7:14
- 24:26–27 Лк 17:23–24
- 24:28 Лк 17:37
- 24:29 Иса 13:10, 34:4; Езк 32:7; Иое 2:10,31, 3:15; Илч 6:12–13
- 24:30 Дан 7:13; Зех 12:10–14; Илч 1:7
- й24:33 эсвэл цаг айсуйг, эхлэхэд бэлэн буйг эсвэл Тэр айсуйг, ирэх гэж буйг
- к24:36 Зарим гар бичмэлд: Хүү ч тэр гэж байхгүй.
- 24:37 Эх 6:5–8
- 24:39 Эх 7:6–24
- 24:43–44 Лк 12:39–40
- л24:51 эсвэл хэсэгчиж эсвэл гаргаж хаяж,