Гэр бүл салалт
(Мк 10:1–12)
19 Есүс эдгээрийг айлдсаны дараа Галилаас явж, Йорданы чанад Иудейн нутагт ирэв. 2 Хүмүүс үй олноороо Түүнийг дагахад Тэрээр тэднийг тэнд эдгээжээ.
3 Түүн дээр хэсэг фарисайчууд ирээд, Түүнийг сорьж
—Хүн ямар нэг шалтгаанаар эхнэрээсээ салж болох уу? гэж асуухад 4 Тэр хариуд нь
—Бүтээгч анхнаас нь тэднийг эр эмээр нь бүтээснийг та нар уншаагүй юу?* 5 “Тиймээс эр хүн эцэг эхээ орхин эхнэртэйгээ нийлж, хоёул нэг махбод болдог” гэсэн.* 6 Тиймд тэд цаашид хоёр бус, харин нэг махбод юм. Иймээс Бурханы хамтад нь нийлүүлснийг хэн ч бүү салгаг гэж айлдав. 7 Гэтэл тэд
—Тэгвэл Мосе яагаад цуцлалтын бичиг өгөөд, салахыг тушаасан юм бэ?* гэхэд 8 Тэр тэдэнд
—Зүрхний чинь хатуугаас болж эхнэрээсээ салахыг Мосе та нарт зөвшөөрсөн юм. Гэвч анхнаасаа ийм байгаагүй. 9 Би та нарт хэлье. Хэн садар самуунаас өөр шалтгаанаар эхнэрээсээ салж, өөр эмэгтэйтэй гэрлэнэ, тэр нь завхайрсан болно* гэв.
10 Шавь нар нь Түүнд
—Хэрэв нөхөр эхнэрийн харьцаа ийм байвал гэрлэхгүй байсан нь дээр юм гэхэд 11 Есүс харин тэдэнд
—Өгөгдсөнөөс бусад нь энэ үгийг хүлээн авах боломжгүй. 12 Учир нь эхийнхээ хэвлээс төрөхдөө тайган төрсөн хүн байдаг. Хүмүүсийн тайган болгосон тайган хүмүүс ч байдаг. Мөн тэнгэрийн хаанчлалын төлөө өөрсдийгөө тайган болгосон тайган ч байдаг юм. Үүнийг хүлээж авч чадах нь аваг гэж айлдав.
Есүс хүүхдүүдийг ерөөв
(Мк 10:13–16; Лк 18:15–17)
13 Хүмүүс Есүсээр гар тавиулж, залбируулахаар хүүхдүүдээ Түүн дээр авчирсанд шавь нар хүмүүсийг загнажээ. 14 Харин Есүс
—Хүүхдүүд Над руу ирэг. Тэднийг бүү хоригло. Учир нь тэнгэрийн хаанчлал нь эдний адил хүмүүсийнх юм гээд 15 хүүхдүүд дээр гар тавьсны дараа тэндээс оджээ.
Баян залуу
(Мк 10:17–31; Лк 18:18–30)
16 Үзэгтүн, нэгэн хүн ирээд, Түүнд
—Багш аа, мөнх амийг олохын тулд би ямар сайн юм хийх ёстой вэ? гэж асуухад 17 Есүс
—Чи Надаас юунд сайн нь юу болох тухай асууна вэ? Сайн Нэгэн нь цорын ганц бий. Чи амьтай болохыг хүсэж байгаа бол тушаалуудыг сахь гэв. 18 Тэр Түүнд
—Алийг нь? гэхэд* Есүс
—Чи хүн бүү ал. Чи бүү завхайр. Чи бүү хулгайл. Чи худал хуурмаг бүү гэрчил. 19 Эцэг эхээ хүндэл. Чи хөршөө өөрийн адил хайрла* гэжээ. 20 Залуу эр Түүнд
—Энэ бүхнийг би сахисан. Надад өөр юу дутагдаж байна вэ? гэхэд 21 Есүс
—Чи төгс байхыг хүсэж байвал явж, хөрөнгөө зарж ядууст өг. Тэгвэл чи тэнгэрт эрдэнэстэй болно. Тэгээд ирж, Намайг дага гэлээ. 22 Залуу энэ үгийг сонсоод гунигтайгаар холдон явлаа. Учир нь тэрээр маш их хөрөнгөтэй байв.
23 Есүс шавь нартаа
—Үнэнээр Би та нарт хэлье. Баян хүн тэнгэрийн хаанчлалд орох нь нэн бэрх. 24 Би та нарт дахин хэлье. Баян хүн Бурханы хаанчлалд орохоос тэмээ тэвнийн сүвэгчээр нэвтрэх нь илүү хялбар гэв. 25 Шавь нар нь үүнийг сонсоод ихэд гайхан
—Тэгвэл хэн аврагдаж чадах вэ? гэцгээхэд 26 Есүс тэднийг хараад
—Энэ нь хүмүүст боломжгүй, харин Бурханд бүх юм боломжтой гэж айлдав. 27 Тэгтэл Петр Түүнд
—Хараач, бид бүхнийг орхиод Таныг дагасан. Тэгээд бид юу хүртэх вэ? гэхэд 28 Есүс айлдсан нь
—Үнэнээр Би та нарт хэлье. Хүний Хүү сүр жавхлант сэнтийдээ залран бүх юм шинэчлэгдэх үед Намайг дагасан та нар ч мөн арван хоёр сэнтийд залран Израилын арван хоёр овгийг шүүх болно.* 29 Миний нэрийн төлөө гэр орон, ах, эгч, дүүсээ эсвэл эцэг эхээ, хүүхдүүдээ эсвэл эдлэн газраа орхисон хүн бүр зуу дахин ихийг хүртэх бөгөөд мөнх амийг өвлөх болно. 30 Харин эхэнд байгаа олон нь сүүлчийнх, сүүлчийнх нь эхнийх болох болно.*
- 19:4 Эх 1:27, 5:2
- 19:5 Эх 2:24
- 19:7 Дх 24:1–4; Мт 5:31
- 19:9 Мт 5:32; 1Ко 7:10–11
- 19:18 Гэт 20:13–16; Дх 5:17–20
- 19:19 Гэт 20:12; Дх 5:16; Лев 19:18
- 19:28 Мт 25:31; Лк 22:30
- 19:30 Мт 20:16; Лк 13:30