Йерусалимд сүр жавхлантай орж ирлээ
(Мк 11:1–11; Лк 19:28–40; Иох 12:12–19)
21 Тэд Йерусалимд дөхөж, Чидун уулын бэл дэх Бетфагт ирэв. Есүс хоёр шавиа илгээж 2 тэдэнд
—Эсрэг талд чинь байгаа тосгонд оч. Та нар тэр даруй уяатай илжиг дудрантайгаа байгааг олно. Тэднийг тайлаад Надад авчир. 3 Хэрэв хэн нэгэн та нарт юм хэлбэл “Эд нар Эзэнд хэрэгтэй” гэж хэлээрэй. Тэгвэл тэр хүн тэднийг даруй явуулна гэв. 4 Энэ нь эш үзүүлэгчээр хэлүүлсэн нь биелэгдэхийн тулд билээ. Юу гэвэл
5 «Харагтун, Хаан чинь чам руу
Даруухнаар, илжиг буюу эдэлгээний адгуусны төл,
Дудран унаад айсуй гэж
Сион охинд дуулга»*
гэсэн юм. 6 Тэгээд шавь нар явж, Есүсийн захисан ёсоор гүйцэтгэв. 7 Тэд илжгийг дудрантай нь авчраад дээр нь дээлүүдээ тохож Есүсийг мордуулав. 8 Үй олон хүн дээлээ зам дээр дэвсэж зарим нь модноос мөчир огтлон зам дээр дэлгэж байлаа. 9 Өмнө хойно нь явж буй хурсан олон
Давидын Хүүд Хосанна!a
Эзэний нэрээр Ирэгч нь ерөөлтэй еэ!
Хамгийн Дээдэд Хосанна!
гэж хашхиралдаж байлаа.* 10 Түүнийг Йерусалимд ороход хотынхон бүгд үймэлдэж,
—Энэ хэн бэ? гэцгээв. 11 Ард олон
—Энэ чинь Галилын Назараас ирсэн эш үзүүлэгч Есүс байгаа юм гэж байв.
Сүмийг цэвэрлэв
(Мк 11:15–19; Лк 19:45–48; Иох 2:13–22)
12 Есүс сүмд ороод, худалдаачдыг болон худалдан авагсдыг бүгдийг нь хөөн гаргаж, мөнгө солигчдын ширээнүүд ба тагтаа худалдагсдын сандлыг хөмөрч орхиод 13 тэдэнд
—“Миний гэр залбирлын гэр гэж нэрлэгдэх болно” гэж бичигдсэн байдаг. Гэтэл та нар түүнийг нь дээрэмчдийн үүр болгож байна* гэв.
14 Сүмд байхад нь Түүн дээр хараагүй, доголон хүмүүс ирэхэд Тэр тэднийг эдгээжээ. 15 Харин ахлах тахилчид, хуулийн багш нар Түүний үйлдсэн гайхамшигт зүйлсийг болон сүм дотор
—Давидын Хүүд Хосанна! гэж хашхиралдах хүүхдүүдийг хараад ихэд зэвүүцэн 16 Түүнд
—Та эдний юу хэлж буйг сонсож байна уу?* гэхэд Есүс
—Тийм ээ, “Хөхүүл хүүхдүүд нялхсын аманд Та Өөртөө магтаалыг бэлдсэн” гэснийг та нар огт уншаагүй юм уу? гэв. 17 Тэгээд тэднийг орхин хотоос гарч, Бетанд ирээд тэндээ хоноглов.
Инжрийн модыг хараасан нь
(Мк 11:12–14,20–24)
18 Өглөө хот руу буцах үед Тэр өлсжээ. 19 Тэгээд замын хажуу дахь инжрийн ганц модыг хараад очтол навчнаас өөр юу ч олсонгүй. Есүс тэр модонд
—Чамд үр жимс хэзээ ч бүү ургаг гэхэд тэр даруй инжрийн мод хувхайрчээ. 20 Шавь нар нь үүнийг хараад мэл гайхаж,
—Энэ инжрийн мод яаж ийм хурдан хувхайрав? гэцгээв. 21 Есүс тэдэнд хариулан
—Үнэнээр Би та нарт хэлье. Та нарт итгэл байгаад эргэлзэхгүй бол зөвхөн энэ инжрийн модонд тохиолдсоныг үйлдэх байтугай энэ ууланд ч хүртэл “Дээш өргөгдөж, тэнгист хаягд” гэж хэлэхэд л тийнхүү биелэх болно.* 22 Та нар итгэлтэйгээр юуны төлөө залбиран гуйна, түүнийгээ хүлээн авах болно гэв.
Есүсийн эрх мэдлийг асуусан нь
(Мк 11:27–33; Лк 20:1–8)
23 Түүнийг сүмд ороод зааж байхад нь ахлах тахилч нар ба ард олны ахлагчид Түүн дээр ирж,
—Та ямар эрх мэдлээр эдгээрийг үйлдэнэ вэ? Хэн Танд энэ эрх мэдлийг өгөв? гэж асуухад 24 Есүс тэдэнд
—Би мөн та нараас нэг зүйл асууя. Хэрэв Надад хариуг хэлбэл Би ч гэсэн ямар эрх мэдлээр эдгээрийг үйлдэж байгаагаа та нарт хэлье. 25 Иоханы баптисм хаанаас байсан бэ? Тэнгэрээс үү эсвэл хүмүүсээс үү? гэхэд тэд хоорондоо эргэцүүлэн ярилцаж
—Хэрэв бид “Тэнгэрээс” гэчихвэл Тэр бидэнд “Тэгвэл та нар яагаад түүнд итгээгүй юм бэ?” гэнэ. 26 Харин бид “Хүмүүсээс” гэвэл энэ хурсан олноос бид айж байна. Учир нь тэд бүгд Иоханыг эш үзүүлэгч гэж үздэг шүү дээ гээд, 27 Түүнд
—Бид мэдэхгүй гэж хариулахад нь Есүс тэдэнд
—Би ч гэсэн ямар эрх мэдлээр эдгээрийг үйлддэгээ та нарт хэлэхгүй.
Сургаалт зүйрлэл: Хоёр хүү
28 Харин та нар юу гэж бодож байна? Нэгэн хүн хоёр хүүтэй байжээ. Тэр ууган хүү дээрээ очиж “Хүү минь, өнөөдөр явж, усан үзмийн талбай дээр ажилла” гэсэнд 29 хүү нь “Үгүй” гэв. Гэвч дараа нь гэмшээд, явжээ. 30 Тэрээр удаах хүүдээ мөн тэгж хэлэхэд хүү нь “За” гэсэн атлаа явсангүй. 31 Тэр хоёрын аль нь эцгийнхээ хүслийг биелүүлсэн бэ? гэхэд тэд
—Эхнийх нь гэв. Есүс тэдэнд хандан
—Үнэнээр Би та нарт хэлье. Татвар хураагчид ба янхнууд та нараас урьтаж Бурханы хаанчлалд орно. 32 Учир нь Иохан зөвт байдлын замаар та нар дээр ирсэнд та нар түүнд итгээгүй. Харин татвар хураагчид ба янхнууд түүнд итгэсэн юм. Та нар үүнийг үзээд гэмшсэнгүй, дараа нь ч түүнд итгэсэнгүй.*
Сургаалт зүйрлэл: Олиггүй түрээслэгчид
(Мк 12:1–12; Лк 20:9–19)
33 Өөр нэгэн сургаалт зүйрлэлийг сонсоцгоо. Нэгэн газрын эзэн усан үзмийн талбай байгуулж, тойруулан хашаа барьж, шахуурга суулган, цамхаг босгожээ. Тэгээд үүнийгээ тариаланчдад түрээслээд явав гэнэ.* 34 Ургац хураах цаг ойртоход эзэн усан үзэм авчруулахаар зарц нараа тариаланчид руу илгээжээ. 35 Тариаланчид зарц нарыг нь бариад, нэгийг нь зодож, нөгөөг нь алж, бас нэгийг нь чулуугаар цохив. 36 Эзэн эхнийхээсээ олон зарц нарыг дахин илгээсэнд тэд мөн л адил үйлдэв. 37 Эцэст нь тэр “Тэд хүүг минь хүндэлнэ” гээд хүүгээ илгээв. 38 Харин тариаланчид хүүг хараад, өөр хоорондоо “Энэ чинь өв залгамжлагч нь байна. Нааш ир, түүнийг алж, өв хөрөнгийг нь булааж авъя” гэжээ. 39 Тэгээд тэд түүнийг барьж, усан үзмийн талбайн гадна гаргаад алав. 40 Тэгвэл усан үзмийн талбайн эзэн ирээд тэдгээр тариаланчдыг яах вэ? гэсэнд 41 тэд
—Тэр эзэн олиггүй муу тэр хүмүүсийг муугаар төгсгөж, хугацаанд нь усан үзмийг тушааж өгөх өөр тариаланчдад усан үзмийн талбайгаа түрээсэлнэ гэв. 42 Есүс тэдэнд
—“Барилгачдын голсон чулуу
Булангийн чулуу болжээ.
Энэ нь Эзэнээс ирсэн бөгөөд
Бидний нүдэнд гайхалтай”
гэснийг та нар Бичвэрээс огт уншаагүй юу?* 43 Иймээс Би та нарт хэлье. Бурханы хаанчлалыг та нараас авч, түүний үр жимсийг ургуулах үндэстэнд өгөх болно. 44 Хэн энэ чулуун дээр унана, тэр бутрах бөгөөд хэний дээр энэ чулуу унана, тэр нь няцарна гэж айлдав.b
45 Фарисайчууд ба ахлах тахилч нар Түүний сургаалт зүйрлэлүүдийг сонсоод, өөрсдийнх нь тухай ярьсныг мэдэв. 46 Тэд Түүнийг барихыг санаархсан авч хүмүүс Түүнийг эш үзүүлэгч гэж үздэг тул ард олноос айв.
- 21:5 Зех 9:9
- a21:9 Хосанна: “Биднийг авраач” гэх үг боловч магтаал хүндэтгэлийн уухай болон хэрэглэдэг болжээ.
- 21:9 Дуу 118:25–26
- 21:13 Иса 56:7; Иер 7:11
- 21:16 Дуу 8:2 (LXX)
- 21:21 Мт 17:20; 1Ко 13:2
- 21:32 Лк 3:12, 7:29–30
- 21:33 Иса 5:1–2
- 21:42 Дуу 118:22–23
- b21:44 Зарим гар бичмэлд энэ эшлэл байгаа (Лк 20:18 үз.)