2 Шастир

Микаиа ялагдлыг зөгнөв
(1Ха 22:1–28)

18 ¹ Иехошафат асар их эд баялаг, нэр хүндтэй байлаа. Тэрээр Ахабтай ураг холбож түүнтэй нэгдэв. ² Хэдэн жилийн дараа тэрээр Ахабтай уулзахаар Самарид ирэв. Ахаб түүнд болон түүнтэй хамт ирсэн хүмүүст зориулан маш олон хонь, үхэр нядалж, Рамот-Гилеадыг довтлохоор явахад түүнийг ятгав. ³ Израилын хаан Ахаб, Иудагийн хаан Иехошафатад
—Чи надтай хамт Рамот-Гилеадыг довтлохоор явах уу? гэхэд Иехошафат түүнд
—Би бол чи, миний хүмүүс чиний хүмүүс бид тулаанд чамтай хамт байна гэв.
⁴ Тэгээд Иехошафат, Израилын хаанд
—Өнөөдөр ЭЗЭНий үгийг асууж өгөөч гэж хэлэв. ⁵ Тэгэхэд Израилын хаан дөрвөн зуун эш үзүүлэгчийг цуглуулаад, тэднээс
—Бид Рамот-Гилеадын эсрэг байлдахаар мордох уу эсвэл би түдгэлзэх үү? гэж асуусанд тэд
—Явагтун! Учир нь Бурхан тэр хотыг хааны гарт өгнө гэж хариулцгаав. ⁶ Гэвч Иехошафат
—Бидэнд асуучихмаар, ЭЗЭНий өөр эш үзүүлэгч энд алга уу? гэж асуулаа. ⁷ Израилын хаан Иехошафатад
—ЭЗЭНээс асууж болох өөр нэгэн хүн бий. Гэвч тэр миний талаар сайныг хэзээ ч эш үзүүлдэггүй, харин мууг л хэлдэг учир би түүнийг үзэн яддаг юм. Тэр бол Имлахын хүү Микаиа гэгч юм гэж хэлжээ. Харин Иехошафат түүнд
—Хаан хүн ингэж ярьж боломгүй гэжээ. ⁸ Тэгэхэд Израилын хаан албатаа дуудан
—Имлахын хүү Микаиаг даруй авчрагтун гэж тушаав. ⁹ Израилын хаан болон Иудагийн хаан Иехошафат нар ёслолын дээлээ өмсөж, Самарийн гулдан хаалганы үүдэнд, нэгэн талбайд өөр өөрсдийн сэнтийд заларсан байв. Эш үзүүлэгчид бүгд л тэдний өмнө эш үзүүлцгээж байлаа. ¹⁰ Хенаанагийн хүү Зедекиа өөртөө төмөр эврүүд хийгээд
—ЭЗЭН ийн айлдаж байна. Эдгээрээр та арамчуудыг устаж дуустал нэвт сүлбэх болно гэжээ. ¹¹ Бүх эш үзүүлэгчид
—Рамот-Гилеад руу явж, ялагтун. Учир нь ЭЗЭН тэр хотыг хааны гарт өгнө гэж эш үзүүлцгээж байлаа.
¹² Микаиаг дуудахаар явсан элч түүнд
—Харагтун, эш үзүүлэгчдийн үгс нэгэн дуугаар хааны талд байна. Үгээ тэдний нэгнийх нь үг шиг болгож, сайныг яригтун гэв. ¹³ Харин Микаиа
—ЭЗЭН амьд! Миний Бурхан надад юу хэлнэ, түүнийг л би ярих болно гэлээ. ¹⁴ Түүнийг хааны өмнө ирэхэд хаан түүнээс
—Микаиа, бид Рамот-Гилеадыг довтлохоор хөдлөх үү эсвэл би түдгэлзэх үү? гэж асуусанд Микаиа түүнд
—Явж, ялагтун. Тэд таны гарт өгөгдөх болно гэжээ. ¹⁵ Хаан харин түүнд
—ЭЗЭНий нэр дээр надад зөвхөн үнэнээс өөр юуг ч хэлэхгүй байхыг би чамаас хэчнээн удаа гуйх юм бэ? гэхэд нь ¹⁶ Микаиа ингэж хариулжээ.
Бүх Израил хоньчингүй хоньд мэт
Уулсын оройгоор тархан явахыг би харлаа.
ЭЗЭН айлдахдаа “Тэдэнд эзэн байхгүй.
Тэд бүгд өөр өөрсдийн гэртээ амар тайван харьцгааг” гэв.*
¹⁷ Тэгэхэд Израилын хаан, Иехошафатад
—Тэр миний тухай сайн юм эш үзүүлдэггүй, харин ёрын мууг л эш үзүүлдэг гэж би чамд хэлсэн биш бил үү? гэв. ¹⁸ Микаиа
—Тиймээс ЭЗЭНий үгийг сонсогтун! ЭЗЭН сэнтийдээ залран Түүний баруун, зүүн талаар тэнгэрийн бүх дайчид хүрээлэн зогсож байхыг би харсан юм. ¹⁹ ЭЗЭН “Хэн Израилын хаан Ахабыг явуулж, Рамот-Гилеадад унагахаар уруу татах вэ?” гэж асуулаа. Нэг нь ийм гэхэд нөгөө нь тийм гэж байлаа. ²⁰ Тэгтэл нэг сүнс урагш гарч ирэн ЭЗЭНий өмнө зогсоод, “Би түүнийг уруу татъя” гэсэнд ЭЗЭН түүнээс “Яаж?” гэж асуув. ²¹ Тэрээр “Би явж, түүний бүх эш үзүүлэгчийн аманд хуурдаг сүнс болно” гэв. ЭЗЭН түүнд “Чи түүнийг уруу татагтун. Үүнийгээ чи бас чадах болно. Явж, үүнийгээ хийгтүн” гэлээ. ²² Тиймээс одоо, үзэгтүн, ЭЗЭН энэ эш үзүүлэгчдийн чинь аманд хуурдаг сүнсийг хийсэн билээ. ЭЗЭН таны эсрэг гай гамшгийг тунхаглажээ гэв. ²³ Тэгэхэд Хенаанагийн хүү Зедекиа дөхөн ирж, Микаиагийн хацрыг алгадаад
—ЭЗЭНий Сүнс чамтай ярих гээд миний хаагуур зөрсөн хэрэг вэ? гэв. ²⁴ Микаиа
—Үзэгтүн, дотоод өрөөнд нуугдахаар орох тэр өдөр чи мэдэх болно гэв. ²⁵ Израилын хаан
—Микаиаг аваад, хотын захирагч Амон ба хааны хүү Иоаш руу буцаагтун. ²⁶ Мөн “Намайг эсэн мэнд буцаж иртэл энэ хүнийг шоронд байлган, хомсхон талх, усаар өл залгуул гэж хаан тушаав” гэж хэл гэв. ²⁷ Микаиа
—Хэрэв та үнэхээр эсэн мэнд буцаж ирвэл ЭЗЭН надаар дамжуулан яриагүй гэсэн үг гээд
—Бүх ард түмэн, та нар үүнийг сонсогтун гэв.

Ахабын ялагдал ба үхэл
(1Ха 22:29–35)

²⁸ Ингээд Израилын хаан ба Иудагийн хаан Иехошафат нар Рамот-Гилеад өөд хөдлөв. ²⁹ Израилын хаан, Иехошафатад
—Би зүсээ хувиргаад, тулалдаанд орно, харин та өөрийн хувцсаа өмсөгтүн гэв. Израилын хаан зүсээ хувиргаад, тэд тулалдаанд орлоо. ³⁰ Арамын хаан тэрэгт цэргийнхээ ахмадуудад тушаан
—Та нар багатай нь ч, ихтэй нь ч бүү тулалд, харин зөвхөн Израилын хаантай л тулалдагтун гэв. ³¹ Тэрэгт цэргийн ахмадууд Иехошафатыг хараад
—Энэ яг Израилын хаан мөн байна гээд, түүнийг дайрахаар эргэв. Тэгэхэд нь Иехошафат тусламж гуйн хашхирсанд ЭЗЭН түүнд тусалж, Бурхан тэднийг түүнээс холдуулав. ³² Тэрэгт цэргийн ахмадууд түүнийг Израилын хаан биш болохыг харангуутаа түүнээс эргэв. ³³ Харин нэгэн цэрэг нум сумаараа харваад орхитол, Израилын хааныг хуягийнх нь завсраар оножээ. Хаан дэлбэгчдээ^a
—Эргээрэй, намайг тулалдааны талбараас авч гар. Би хүнд шархадлаа гэж хэлэв. ³⁴ Тэр өдөр тулаан ширүүсэж, Израилын хаан арамчуудыг харсан чигтээ тэргэн дотроо түшүүлж байгаад, нар жаргах үеэр үхэв.

• 18:16 Тоо 27:17; Езк 34:5; Мт 9:36; Мк 6:34
• ^a18:33 Морин тэрэг жолоодогч.