ЭЗЭНий өргөөний бэлтгэл ажил
(1Ха 5:1–18)
2 1 Соломон ЭЗЭНий нэр алдарт зориулсан өргөөг, мөн өөрийнхөө хаант засгийн ордныг босгохоор шийджээ. 2 Иймээс ачаа зөөх далан мянга, ууланд чулуу бэлтгэх наян мянга, тэднийг хянах гурван мянга зургаан зуун хүнийг Соломон томилов.
Тирийн Хурамтай хамсав
3 Тэгээд Соломон, Тирийн хаан Хурамд үг илгээн
—Та миний эцэг Давидад сайн хандаж, амьдрах өргөө барихад нь зориулан хуш мод илгээж байсан билээ. Надад ч мөн илгээгээч. 4 Үзэгтүн, ЭЗЭН Бурханыхаа нэрд зориулахаар, өглөө орой, Амралтын өдрүүд, шинэ сар мөн манай Бурхан ЭЗЭНий баяр ёслолуудын үеэр Түүний өмнө анхилуун үнэрт утлага ба байнгын тавиг талхыг өргөж, шатаалт тахилууд тахихын тулд Түүнд би өргөө босгож байна. Энэ нь Израилд мөнхөд ногдсон билээ. 5 Манай Бурхан бүх бурхнаас агуу учир, миний барих гэж буй өргөө агуу байх ёстой. 6 Гэвч тэнгэр болон тэнгэрсийн тэнгэр ч Түүнийг багтааж чадахгүй байхад Түүнд зориулан хэн өргөө барьж чадах юм бэ? Түүний өмнө утлага уугиулахаас биш, Түүнд өргөө барьж өгөх гэдэг би хэн юм бэ?* 7 Тиймээс алт, мөнгө, хүрэл, төмөр болон хөх ягаан, хүрэн улаан, нил ягаан бөс, зотонгоор юм хийх ур чадвартай, сийлбэр сийлэхийг мэддэг хүнийг надад илгээнэ үү? Миний эцэг Давидын бэлтгэсэн, Иуда, Йерусалимд байгаа миний урчуудын хамт тэр хүн чинь ажиллаг. 8 Мөн Ливанаас хуш, майлс, улаан модод илгээнэ үү? Таны зарц нар Ливаны моддыг унагахдаа гаргууд гэдгийг би мэднэ. Миний зарц нар таны зарц нартай хамт, 9 надад их хэмжээгээр гуалин бэлтгэх болно. Учир нь миний барьж буй өргөө маш сүрлэг, гайхамшигтай юм. 10 Харагтун, мод тайрдаг модчид болох таны зарц нарт би тээрэмдсэн буудай хорин мянган кор, арвай хорин мянган кор, дарс хорин мянган бат, тос хорин мянган батыг өгье гэв. 11 Тирийн хаан Хурам, Соломонд захидал илгээн хариулахдаа
—ЭЗЭН ард түмнээ хайрладаг учир чамайг тэдний хаан болгожээ гэв. 12 Хурам цааш нь
—ЭЗЭНд өргөө, өөртөө хаант засгийн ордон барих санаатай, хэрсүү, ухаалаг, мэргэн хүүг Давид хаанд заяагч, тэнгэр, газрыг бүтээсэн Израилын Бурхан ЭЗЭН магтагдах болтугай. 13 Одоо би ур чадвар, мэдлэгтэй Хурам-Аби гэх хүнийг илгээе. 14 Тэрээр Даны удмын нэгэн эмэгтэйн хөвгүүн бөгөөд эцэг нь тир хүн. Тэр хүн алт, мөнгө, хүрэл, төмөр, чулуу, мод болон нил ягаан, хөх, цагаан маалинга, хүрэн улаан бөс даавуугаар юм хийхийг мөн ямар ч сийлбэр сийлэхийг, өөрт нь даалгасан ямар ч зүйлийг хэрхэн урлахыг мэддэг юм. Түүнийг та өөрийн урчууд болон миний эзэн, эцэг Давидынхаа урчуудтай хамт ажиллуул. 15 Одоо эзэн минь амласнаараа буудай, арвай, тос, дарсыг өөрийн зарц нартаа илгээнэ үү. 16 Бид танд хэрэгтэй бүх модыг Ливанаас огтолж, тэднээр сал хийж тэнгисээр хөвүүлэн Иоппад хүргээд, та тэднийг Йерусалим руу татаж авна биз ээ гэв.
17 Эцэг Давидынхаа хийсэн тооллогоос хойш Израилын нутагт байсан цагаачдыг Соломон бүгдийг нь тоолсон бөгөөд зуун тавин гурван мянга зургаан зуун хүн байлаа. 18 Соломон тэдний далан мянгыг нь ачаа зөөхөд, наян мянгыг нь ууланд чулуу бэлтгэхэд мөн уг хүмүүсийг ажиллуулахаар гурван мянга зургаан зуун харгалзагчийг томилов.
- 2:6 1Ха 8:27; 2Шс 6:18