ЭЗЭНий өргөөг Иоаш засварлав
(2Ха 12:1–16)
24 1 Иоаш хаанаар өргөмжлөгдөхдөө долоон настай байсан бөгөөд тэрээр Йерусалимд дөчин жил хаанчилжээ. Түүний эхийг Беершебагаас гаралтай Зибиа гэдэг байв. 2 Тахилч Иехоиадагийн бүх өдрийн турш Иоаш ЭЗЭНий мэлмийд зөв зүйтэйг үйлдэв. 3 Иехоиада түүнд хоёр эхнэр авч өгсөн бөгөөд тэр хөвгүүд, охидын эцэг болов.
4 Үүний дараа Иоаш, ЭЗЭНий өргөөг сэргээн босгохоор шийджээ. 5 Тэрээр тахилч нар болон левичүүдийг цуглуулан тэдэнд
—Иудагийн хотууд руу явцгаа. Жил бүр Бурханыхаа өргөөг сэргээн босгоход зориулж бүх Израилаас мөнгө цуглуул. Та нар үүнийг яаралтай үйлдэгтүн гэв. Гэвч левичүүд шуурхай хөдөлсөнгүй. 6 Иймээс тэргүүн тахилч Иехоиадаг хаан дуудан түүнд
—Израилын чуулган дээр ЭЗЭНий боол Мосегийн ногдуулсан гэрчлэлийн майхны алба гувчуурыг Иуда, Йерусалимаас авчрахыг та яагаад левичүүдээс шаардахгүй байна вэ? гэв.* 7 Учир нь балмад эм Аталиагийн хөвгүүд Бурханы өргөөнд цөмрөн орж, ЭЗЭНий өргөөний ариун юмсыг хүртэл Баалуудад ашигласан байлаа.
8 Ингээд хаан тушаасанд тэд хайрцаг хийж, түүнийг гадна талд ЭЗЭНий өргөөний гулдан хаалганы дэргэд тавив. 9 Цөлд, Бурханы зарц Мосегийн Израилд ногдуулсан алба гувчуурыг ЭЗЭНд авчрахыг Иуда, Йерусалимд тэд тунхагласан билээ. 10 Бүх удирдагчид болон бүх ард түмэн баярлав. Тэгээд тэд авчирч хайрцагт хийсээр түүнийг дүүргэжээ. 11 Левичүүд хааны түшмэд рүү хайрцгийг авчрах бүрд тэд тэнд маш их мөнгө байгааг хардаг байв. Хааны гүүш болон тэргүүн тахилчийн түшмэл ирж, хайрцгийг хоослон суллаад, буцааж байранд тавьдаг байлаа. Тэд өдөр бүр ийнхүү ажиллаж, маш их мөнгө хураав. 12 Хаан, Иехоиада нар уг мөнгийг ЭЗЭНий өргөөний үйлчлэлийн ажлыг хийж байсан хүмүүст өгчээ. Тэд ЭЗЭНий өргөөг сэргээн засварлахын тулд чулуучид, мужаанууд болон төмөр, хүрлээр урлах ажилчдыг хөлсөлсөн билээ. 13 Ажилчид хөдөлмөрлөсөөр, сэргээн босголтын ажил ч тэдний гарт урагшилж, тэд Бурханы өргөөг хэлбэр төрхийнх нь дагуу засварлаж, бат бөх болголоо. 14 Тэд ажлаа дуусгаад, үлдсэн мөнгийг хаан, Иехоиада нарын өмнө авчирчээ. Уг мөнгийг ЭЗЭНий өргөөний хэрэглэл буюу үйлчлэл болон шатаалт тахилд зориулах хэрэглэл, алт мөнгөн сав, хэрэглэлийг хийхэд ашигласан билээ. Тэд Иехоиадаг амьд сэрүүн байхад ЭЗЭНий өргөөнд шатаалт тахилуудыг байнга өргөж байв.
Иоашийн урвалт
15 Иехоиада насныхаа тоог гүйцээгээд үхэв. Өөд болохдоо тэрээр зуун гучин настай байлаа. 16 Тэд түүнийг Давидын хотод хаадын дунд нутаглуулсан билээ. Учир нь тэрээр Бурхан ба Түүний өргөөнд Израилд сайныг үйлджээ.
17 Гэвч Иехоиадаг өөд болсны дараа Иудагийн түшмэд ирж, хаанд мэхийсэнд хаан тэднийг сонсов. 18 Тэд эцэг өвгөдийнхөө Бурхан болох ЭЗЭНий өргөөг орхин Ашерагийн модон шон болон шүтээнүүдэд үйлчилжээ. Тэдний энэ гэм буруугийн улмаас Иуда болон Йерусалим дээр ял бууж ирэв. 19 Гэсэн ч тэднийг ЭЗЭНд буцаан авчрахын тулд Тэрээр тэдэнд эш үзүүлэгчдийг илгээлээ. Эш үзүүлэгчид тэдний эсрэг гэрчилсэн хэдий ч тэд сонссонгүй.
20 Тэгэхэд Бурханы Сүнс тахилч Иехоиадагийн хүү Зехариа дээр буужээ. Тэрээр ардуудын дээр зогсоод, тэдэнд
—“Та нар яагаад ЭЗЭНий тушаалуудыг зөрчиж байна вэ? Ингэснээр та нар хөгжиж дэвжихгүй. Учир нь та нар ЭЗЭНийг умартсан учраас Тэр бас та нарыг умартсан билээ” гэж Бурхан айлдаж байна гэв.* 21 Тэгээд хүмүүс түүний эсрэг хуйвалдаж, хааны тушаалаар ЭЗЭНий өргөөний хашаан дотор түүн рүү үхтэл нь чулуу шидэв. 22 Түүний эцэг Иехоиадагийн өөрт нь үзүүлж байсан хайр энэрлийг Иоаш хаан дурсан саналгүй түүний хүүг алжээ. Зехариа үхэхдээ
—ЭЗЭН хараад, өшөө авах болтугай гэжээ.
Иоашийн үхэл
23 Дараа жилийн эхэнд арамчуудын цэрэг Иоашийн эсрэг дайран ирэв. Тэд Иуда, Йерусалимд хүрч ирээд, хүмүүсийн дундаас ард түмний удирдагчдыг бүгдийг алж, бүх олз омгоо Дамаскийн хаанд илгээжээ. 24 Үнэндээ арамчуудын цэрэг цөөхөн тооны дайчидтай байв. Гэтэл иудачууд эцэг өвгөдийнхөө Бурхан болох ЭЗЭНийг умартсан учраас тэдний үлэмж их цэргийг ЭЗЭН арамчуудын гарт оруулж өгчээ. Ингээд тэд Иоашийн дээр шийтгэлийг гүйцэлдүүлжээ.
25 Тэд түүнийг хүнд шархтай нь орхин түүнээс салж явахад зарц нар нь тахилч Иехоиадагийн хүүгийнa цуснаас болж түүний эсрэг хуйвалдаж, орондоо байхад нь түүнийг алжээ. Ингэж Иоаш үхсэн бөгөөд тэд түүнийг Давидын хотод нутаглуулсан боловч, түүнийг хаадын булшинд тавьсангүй. 26 Түүний эсрэг хуйвалдсан хүмүүс аммон эмэгтэй Шимеатын хүү Забад, моаб эмэгтэй Шимритийн хүү Иехозабад нар юм. 27 Иоашийн хөвгүүд, түүний авсан хатуу сануулга болон Бурханы өргөөг сэргээн засварласан тухай Хаадын номын тайлбарт бичигдсэн юм. Дараа нь түүний хүү Амазиа оронд нь хаан болов.
- 24:6 Гэт 30:11–16
- 24:20–21 Мт 23:35; Лк 11:51
- a24:25 эсвэл хөвгүүдийн