Шүтээнүүд Израилыг сүйрүүлэв
10 1 Израилын гэр ээ,
ЭЗЭНий чамд айлдаж буй үгийг сонс.
2 ЭЗЭН ингэж айлдаж байна.
“Үндэстнүүдийн замналыг бүү сур.
Үндэстнүүд тэнгэрийн тэмдгүүдээс айдаг бол
Чи харин тэдгээрээс бүү ай.
3 Тэр хүмүүсийн заншил хий хоосон юм.
Учир нь энэ нь ойгоос тайрсан мод,
Сийлбэрчин хүний багаж ба гарынх нь бүтээл юм.
4 Мөнгө болон алтаар чимснээс цаашгүй,
Ганхуузай хэмээн алхаар хадаж бэхэлсэн зүйл.
5 Өргөст хэмхний талбай дахь мануухай мэт
Үл ярьж, эс явах тул тэднийгээ
Өөрсдөө тэд өргөж зөөх болдог бус уу!
Хор агаад сайны алийг нь ч хийж үл чадах тул
Тэднээс бүү эмээ.”
6 ЭЗЭН, Тантай адил хэн ч үгүй.
Та аугаа бөгөөд Таны нэр хүч чадлаар аугаа.
7 Үндэстнүүдийн Хаан, Танаас
Хэн айхгүй байх билээ?
Үнэхээр энэ нь Танд зохистой.
Учир нь үндэстнүүдийн бүх мэргэн хүмүүсийн дунд
Бас тэдний бүхий л хаанчлалуудад
Тантай адил хэн ч үгүй.*
8 Харин тэд хамтдаа тэнэг
Төөрөгдлийн ёс журамдаа мунхаг.
Тэдний шүтээн бол мод.
9 Давтсан мөнгийг Таршишаас,
Алтыг Уфазаас авчирч,
Дархны болон алтны дархны гараар бүтээсэн.
Тэдний хувцас нь ягаан болон нил ягаан.
Тэд бүгд ур чадвартай хүмүүсийн бүтээл юм.
10 Харин ЭЗЭН бол жинхэнэ Бурхан.
Тэр амьд Бурхан бөгөөд мөнхийн Хаан.
Уур хилэнд нь дэлхий хөдөлж,
Үндэстнүүд дургүйцлийг нь тэсэж чаддаггүй.
11 Чи тэдэнд “Тэнгэрс ба газрыг бүтээгээгүй бурхад газраас ба тэнгэрсийн доороос устах болно” гэж хэл.
12 Хүч чадлаараа дэлхийг бий болгож,
Мэргэн ухаанаар ертөнцийг Тэр тогтоосон билээ.
Түүний ухаанаар тэнгэрс тэлсэн билээ.
13 Түүнийг дуугарахад тэнгэрс дээр ус хүржигнэдэг бөгөөд
Тэрээр дэлхийн төгсгөлөөс үүлсийг хөөргөдөг.
Тэрээр бороонд зориулж цахилгаан бүтээж,
Агуулхуудаасаа салхийг гаргадаг.
14 Хүн бүр тэнэг бөгөөд мэдлэггүй юм.
Дархан бүр хийсэн шүтээнээрээ ичгүүр болно.
Учир нь цутгамал хөргүүд нь хуурамч бөгөөд
Тэдэн дотор амьсгал үгүй.
15 Тэд дэмий хоосон, доог тохууны бүтээл.
Шийтгэлийнхээ цагт тэд устана.
16 Иаковын хувь эдгээртэй адил биш.
Учир нь Тэрээр бүхнийг Бүтээгч бөгөөд
Израил нь Түүний өвийн овог юм.
Түүний нэр нь түг түмдийн ЭЗЭН.
Айсуй цөллөг
17 Бүслэлтэд байдаг та нар
Газраас баглаатай юмаа ав!
18 Учир нь ЭЗЭН ингэж айлдаж байна.
“Харагтун, Би энэ цагт энэ нутгийн оршин суугчдыг хөсөр хаяж,
Тэдний дээр зовлон авчирна
Тэгээд тэд үүнийг амсах болно.”
19 Золгүй еэ! би гэмтэв!
Шарх минь эдгэршгүй.
Харин би “Энэ бол үнэхээр өвчин,
Би үүнийг тэсвэрлэх ёстой” гэсэн.
20 Майхан минь сүйтгэгдсэн бөгөөд
Бүх оосор минь тасрав.
Хөвгүүд минь надаас явж, хэн ч үлдсэнгүй.
Майхныг минь дэлгэж,
Хөшигнүүдийг минь тогтоох хэн ч алга.
21 Учир нь хоньчид тэнэг болж,
ЭЗЭНийг эрэлхийлсэнгүй.
Тиймээс тэд өсөж дэвжээгүй агаад
Хамаг хонин сүрэг нь тарж бутарчээ.
22 Мэдээ чимээ айсуй!
Иудагийн хотуудыг балгас, цөөвөр чонын үүр болгохоор
Их үймээн хойд зүгийн нутгаас ирж байна.
23 ЭЗЭН минь, хүн өөрөө замаа хардаггүйг би мэднэ.
Алхмаа хүн өөрөө чиглүүлдэггүйг ч бас мэднэ.
24 Намайг засаач ЭЗЭН, гэвч уур хилэнгээрээ бус,
Шударга ёсоороо засаач.
Эс тэгвэл Та намайг хэн ч биш болгоно.
25 Таныг мэддэггүй үндэстнүүд дээр
Таны нэрийг дууддаггүй овог ураг дээр
Уур хилэнгээ Та асгаач.
Учир нь тэд Иаковыг залгижээ.
Тэд түүнийг залгиж шатаагаад,
Орон байрыг нь эзгүйрүүлжээ.
- 10:7 Илч 15:4