Зедекиагийн тухай эш үзүүллэг
34 1 Вавилоны хаан Небухаднезар болон бүх цэргүүд нь, эрх мэдлийнх нь дор байсан дэлхийн бүх хаанчлал ба бүх ард түмний хамт Йерусалимын эсрэг, бүх хотынх нь эсрэг дайтаж байх үед Иеремиад ЭЗЭНээс үг ирж,* 2 “Израилын Бурхан ЭЗЭН ингэж айлдаж байна. Явж, Иудагийн хаан Зедекиатай ярьж, түүнд «ЭЗЭН ингэж айлдаж байна. Үзэгтүн, Би энэ хотыг Вавилоны хааны гарт өгч байгаа бөгөөд тэр үүнийг галаар шатаана. 3 Чи гараас нь зугтаахгүй. Учир нь чи лавтайяа олзлогдож, түүний гарт тушаагдана. Чи Вавилоны хааныг нүдээрээ харж, тэр чамтай нүүр нүүрээрээ ярьж, чи Вавилон руу явна» гэж хэл. 4 Түүнчлэн «Гэлээ ч ЭЗЭНий үгийг сонсогтун! Иудагийн хаан Зедекиа! ЭЗЭН чиний талаар ингэж айлдаж байна. Чи илдээр үхэхгүй. 5 Чи амар тайван үхнэ. Чиний өмнө байсан урьдын хаад, эцэг өвгөдөд чинь зориулж уугиулсан шиг тэд чамд зориулж ч мөн уугиулна. Тэд чиний төлөө ‘Ай хөөрхий, эзэн!’ гэж гашуудна. Учир нь Би үгээ айлдсан» гэж ЭЗЭН тунхаглаж байна” гэв.
6 Тэгээд эш үзүүлэгч Иеремиа эдгээр бүх үгийг Йерусалимд Иудагийн хаан Зедекиад хэлсэн бөгөөд 7 тэр үед Вавилоны хааны цэргүүд Йерусалимын эсрэг болон Иудагийн үлдсэн бүх хот, Лахиш, Азека зэргийн эсрэг тулалдаж байв. Учир нь тэд Иудагийн хотуудын дунд бэхлэлт хот болон үлджээ.
Итгэл эвдсэн боолчлол
8 Йерусалимд байсан бүх хүнд эрх чөлөөг тунхаглахын тулд Зедекиа тэдэнтэй гэрээ байгуулсны дараа ЭЗЭНээс Иеремиад үг иржээ. 9 Хүн бүр эрэгтэй, эмэгтэй боол нь болох еврей эрэгтэй эсвэл еврей эмэгтэйг чөлөөлөх ёстой байв. Ингэснээр хэн ч ах дүү нь болох иудей хүнийг боолчлолд барихгүй байв. 10 Хүн бүр эрэгтэй, эмэгтэй боолоо чөлөөлөх ёстой бөгөөд хэн ч тэднийг дахин боолчлолд барихгүй гэсэн гэрээнд нэгдсэн бүх түшмэл болон бүх хүн гэрээг дагалаа. Тэд гэрээ ёсоор тэднийг чөлөөлөв. 11 Гэвч дараа нь эргээд өөрсдийн чөлөөлсөн эрэгтэй, эмэгтэй боолуудаа буцаан аваад, тэднийг эрхшээлдээ оруулжээ.
12 Тэгэхэд ЭЗЭНий үг Иеремиад ЭЗЭНээс ирж, 13 “Израилын Бурхан ЭЗЭН ингэж айлдаж байна. Тэрээр «Би та нарын эцэг өвгөдийг боолчлолын гэрээс, Египет нутгаас гаргаж авчирсан тэр өдөр тэдэнтэй гэрээ байгуулж, 14 ‘Долоон жилийн эцэст та нарын хүн нэг бүр нь та нарт зарагдсан бөгөөд зургаан жил та нарт үйлчилсэн еврей ах дүүгээ чөлөөлж, түүнийг өөрөөсөө эрх чөлөөтэйгөөр явуулах ёстой’ гэж хэлсэн. Харин та нарын эцэг өвгөд Намайг дагаагүй, Надад чихээ тавиагүй.* 15 Хэдийгээр саяхан та нар эргэж, хүн нэг бүр хөршдөө эрх чөлөөг тунхаглан мэлмийд минь зөв зүйтэйг үйлдэж, нэрээр минь дуудагдсан өргөөнд Миний өмнө гэрээ байгуулсан боловч 16 та нар үүнээсээ буцаж, нэрийг минь бузарлаж, хүслийнх нь дагуу чөлөөлсөн эрэгтэй, эмэгтэй боолоо хүн нэг бүр буцааж авсан бөгөөд та нар тэднийг эрэгтэй, эмэгтэй боолоо болгож, эрхшээлдээ оруулсан байна» хэмээж байна.
17 Тиймээс ЭЗЭН ингэж айлдаж байна. «Хүн нэг бүр ах дүүдээ болон хөршдөө эрх чөлөөг тунхаглах талаар та нар Намайг дагасангүй. Үзэгтүн, Би та нарт илд, тахал болон өлсгөлөнг эрх чөлөө болгон тунхаглаж байна. Би та нарыг дэлхийн бүх хаанчлалд аймшиг болгоно» гэж ЭЗЭН тунхаглаж байна. 18 «Тэд тугалыг хоёр хэсэгт огтолж, хэсгүүдийнх нь дундуур өнгөрчээ. Миний өмнө өөрсдийн байгуулсан гэрээний үгсийг биелүүлээгүй, гэрээг минь зөрчсөн хүмүүсийг буюу 19 тугалын хэсгүүдийн дундуур өнгөрсөн Иудагийн түшмэд, Йерусалимын түшмэд, шүүхийн түшмэд, тахилч нарыг болон нутгийн бүх хүнийг 20 Би дайснуудынх нь гарт болон тэдний амийг эрэгч хүмүүсийн гарт тушаана. Тэдний хүүр тэнгэрийн шувууд, газрын араатны идэш болно. 21 Иудагийн хаан Зедекиаг болон түшмэдийг нь Би дайснуудынх нь гарт, тэдний амийг эрэгч хүмүүсийн гарт болон та нараас холдон явсан Вавилоны хааны цэргүүдийн гарт тушаана. 22 Үзэгтүн, Би тушаах гэж байгаа бөгөөд Би тэднийг энэ хотод буцааж авчирна. Тэд үүний эсрэг тулалдаж, үүнийг эзэлж аваад, галдан шатаана. Би Иудагийн хотуудыг оршин суугчгүй, зэлүүд газар болгоно» гэж ЭЗЭН тунхаглаж байна” гэжээ.
- 34:1 2Ха 25:1–11; 2Шс 36:17–21
- 34:14 Гэт 21:2; Дх 15:12