Их ган гачиг
14 1 Ган гачгийн талаар ЭЗЭНий үг Иеремиад ирэв.
2 “Иуда гашуудаж, үүд хаалганууд нь гудайна.
Тэд гашуудан газар хөсөр суух бөгөөд
Йерусалимын хашхираан дээш одов.
3 Ноёд нь зарц нараа усанд явуулав.
Нөөц сан дээр ирсэн боловч ус үл олдов.
Хоосон савтайгаа тэд буцаж ирэв
Ичгүүр, доромжлолд орж,
Толгойгоо тэд бүтээцгээв.
4 Хур үзээгүй нутгийн газар нь хагарав.
Ичгүүрт орсон тариачид
Толгойгоо бас бүтээцгээв.
5 Ургамал ногоогүй талд согоо хүртэл
Илийгээ төрүүлсэн нь зөвхөн хаяхын тулд ажээ.
6 Нүцгэн толгод дээр зогсож буй хулан
Цөөвөр чоно мэт аахилна.
Өвс ургаагүй тул нүднийх нь гал бөхнө.”
7 Хилэнц маань бидний эсрэг гэрчлэвч,
ЭЗЭН, нэрийнхээ төлөө хөдлөөч!
Урваж шарвасан маань үнэхээр олонтоо агаад
Таны эсрэг бид нүгэл үйлдэв.
8 Аяа, Израилын найдвар аа,
Зовлон шаналангийн үеийнх нь Аврагч аа,
Та хүний газар буй цагаач хүн мэт,
Хоног тойруулахаар майхнаа босгосон аялагч мэт байх гэж үү?
9 Айсан хүн мэт,
Аварч чадахгүй хүчтэн адил Та байх гэж үү?
Гэлээ ч Та бидний дунд байгаа,
Аяа ЭЗЭН, бид Таны нэрээр дуудагдсан билээ.
Биднийгээ бүү орхиоч!
10 ЭЗЭН энэ хүмүүст ингэж айлдаж байна.
“Хэдий тийм ч гэсэн тэд хэрэн тэнүүчлэх дуртай болжээ.
Тэд хөлөө хорьж барьсангүй.
Тиймээс ЭЗЭН тэднийг хүлээн авдаггүй.
Одоо Тэрээр тэдний хилэнцийг санаж,
Тэдний нүглийг шийтгэнэ.”
11 Тиймээс ЭЗЭН надад “Энэ хүмүүсийн сайн сайхны төлөө бүү залбир. 12 Тэднийг мацаг барихад Би орилохыг нь сонсохгүй. Тэднийг шатаалт тахил болон идээн өргөлийг өргөхөд Би тэднийг хүлээн авахгүй. Харин Би илд, өлсгөлөн, тахлаар тэднийг төгсгөл болгоно” гэж айлдав.
Хуурамч эш үзүүлэгчдийг буруушаав
13 Харин би
—Аяа, Эзэн БУРХАН! Хараач, эш үзүүлэгчид “Та нар илдийг үзэхгүй, өлсгөлөнд ч нэрвэгдэхгүй, харин Тэр та нарт энэ газарт үргэлжийн амар амгаланг өгнө” гэж тэдэнд хэлж байна гэв. 14 Тэгтэл ЭЗЭН надад айлдахдаа
—Эш үзүүлэгчид нэрээр минь худал хуурмагийг эш үзүүлж байна. Би тэднийг илгээгээ ч үгүй, тэдэнд тушаагаа ч үгүй, тэдэнд айлдаа ч үгүй. Тэд та нарт худал үзэгдэл, мэргэ төлгө, хоосон зүйлс болон өөрсдийн санааны мэхийг эш үзүүлж байна. 15 Түүнчлэн Би тэднийг илгээгээгүй байхад нэрээр минь эш үзүүлж “Энэ газар нутагт илд ба өлсгөлөн учрахгүй” гэж буй эш үзүүлэгчдийн тухайд ЭЗЭН ингэж айлдаж байна. Тэдгээр эш үзүүлэгчид илд болон өлсгөлөнгөөр төгсөх болно! 16 Мөн тэдний эш үзүүллэгийг сонссон хүмүүс өлсгөлөн болон илдний улмаас Йерусалимын гудамжнуудад хаягдах болно. Тэднийг, эхнэрүүдийг нь, хөвгүүдийг нь бас охидыг нь оршуулах хэн ч үгүй байна. Учир нь Би тэдний хорон мууг өөрсөд дээр нь асгах болно.
17 Чи тэдэнд энэ үгийг хэлэх болно.
“Нүд минь шөнө ч өдөр ч
Нулимс урсгаг, нулимс бүү зогсог.
Ард түмэн гэдэг онгон охин минь хүчтэй цохиулж,
Хөндүүр, халдварт шархтай байна.
18 Хээр тал руу би гарч харвал,
Үзэгтүн, илдээр хядуулсан хүмүүс байна!
Хотод мөн орж ирвэл,
Харагтун, өлсгөлөнгийн өвчнүүд байна!
Учир нь эш үзүүлэгч, тахилч хоёрын аль аль нь
Өөрсдийн мэддэггүй нутгаар хэсүүчлэхээр явжээ” гэв.
Өршөөл эрэхүй
19 Та Иудагаас бүрмөсөн татгалзсан уу?
Эсвэл Та Сионыг жигшсэн үү?
Та биднийг юунд эдгэшгүйгээр цохив?
Амар амгаланг хүлээсэн боловч
Ямар ч сайн сайхан нь ирсэнгүй.
Эдгэрлийн цагийг хүлээсэн боловч,
Үзэгтүн, аймшиг ирэв!
20 Аяа ЭЗЭН, бид гэм буруугаа,
Эцэг өвгөдийнхөө хилэнцийг мэднэ.
Учир нь бид Таны эсрэг нүгэл үйлдсэн билээ.
21 Нэрийнхээ төлөө биднийг бүү жигшээч!
Алдрынхаа сэнтийг бүү шившиг болгооч!
Бидэнтэй байгуулсан гэрээгээ санаж,
Бүү цуцлаач!
22 Үндэстнүүдийн шүтээнүүд бороо оруулж чадах уу?
Тэнгэрс эсвэл аадар бороо хайрлаж чадах уу?
Энэ нь Та биш гэж үү,
Бидний Бурхан ЭЗЭН?
Тиймээс бид Танд найдаж байна.
Учир нь эдгээр бүх зүйлийг хийсэн нь Та билээ.