Дуулал

ТАВДУГААР НОМ
(Дуулал 107–150)
Түмэн зовлонгоос гэтэлгэсний талархал

107 ¹ ЭЗЭНд талархагтун!*
Тэрээр сайн бөгөөд
Түүний хайр энэрэл мөнхийнх.
² Өстний гараас Түүний зольсон,
ЭЗЭНээр золигдсон хүмүүс ийн өгүүлэг.
³ Өрнө хийгээд дорно,
Өмнө хийгээд умар,
Нутаг бүрээс тэднийг цуглуулсан билээ.

⁴ Тэд цөлд зэлүүд замаар тэнэж,
Оршин суугчидтай хотыг эс олов.
⁵ Өлсөж, цангаад сэтгэл нь сульджээ.
⁶ Гай зовлон дундаа тэд ЭЗЭН рүү хашхирахад,
Гамшиг зүдгүүрээс нь Тэр тэднийг аварчээ.
⁷ Оршин суугчидтай хот руу явуулахаар
Тэр бас тэднийг шулуун замаар хөтөлсөн.
⁸ Энэрэл хайрынх нь төлөө,
Хүний хөвгүүдэд үйлдсэн гайхамшгуудынх нь төлөө
ЭЗЭНд талархагтун!
⁹ Учир нь цангасан хүнийг
Тэрээр хангалуун болгож,
Өлссөн хүнийг сайн зүйлсээр дүүргэдэг билээ.

¹⁰ Зарим нь харанхуйд, үхлийн харанхуйд сууж
Зовлон зүдүүр, төмөр гинжний хоригдлууд болсон.
¹¹ Учир нь тэд Бурханы үгэнд тэрслэн
Хамгийн Дээд Нэгэний зөвлөгөөг зэвүүцсэн юм.
¹² Тэдний зүрх хүчир хөдөлмөрт номхорч,
Тэд бүдрэн унасан бөгөөд хэн ч туслаагүй юм.
¹³ Гай зовлон дундаа тэд ЭЗЭН рүү хашхирахад,
Гамшиг зүдгүүрээс нь Тэр тэднийг аварчээ.
¹⁴ Харанхуй, үхлийн харанхуйгаас тэднийг гаргаж,
Хүлээсийг нь Тэрээр тасалсан юм.
¹⁵ Энэрэл хайрынх нь төлөө,
Хүний хөвгүүдэд үйлдсэн гайхамшгуудынх нь төлөө
ЭЗЭНд талархагтун!
¹⁶ Хүрэл гулдан хаалгыг Тэрээр хэмхэлж,
Хөндөл төмрийг нь хугалсан билээ.

¹⁷ Тэрслүү зам, хилэнцээсээ болж
Тэнэгүүд зовжээ.
¹⁸ Тэдний сэтгэл бүхий л хоолонд дургүйцэж
Үхлийн үүд хаалганд ойртжээ.
¹⁹ Гай зовлон дундаа тэд ЭЗЭН рүү хашхирахад,
Гамшиг зүдгүүрээс нь Тэр тэднийг аварчээ.
²⁰ Үгээ илгээн тэднийг эдгээж,
Мөхлөөс нь Тэрээр аварсан юм.
²¹ Энэрэл хайрынх нь төлөө,
Хүний хөвгүүдэд үйлдсэн гайхамшгуудынх нь төлөө
ЭЗЭНд талархагтун!
²² Тэд бас талархлын тахилуудыг өргөг!
Түүний үйлсийг уухайн дуугаар тунхаглаг!

²³ Усан онгоцоор далайд гарагчид,
Их усан дээр наймаа эрхлэгчид
²⁴ ЭЗЭНий үйлсийг хийгээд
Гүнд буй гайхамшгуудыг нь харж байна.
²⁵ Учир нь Тэр тушаан салхи шуургыг босгоод,
Түүгээр давлагааг хуйлруулав.
²⁶ Тэд тэнгэр өөд гарч,
Оёоргүй гүнд эргэн буужээ.
Гамшгийн улмаас тэдний сэтгэл мохжээ.
²⁷ Тэд согтуу хүн шиг дороо эргэлдэн гуйвж,
Оюун ухаан нь самуурчээ.
²⁸ Гай зовлон дундаа тэд ЭЗЭН рүү хашхирахад,
Гамшиг зүдгүүрээс нь Тэр тэднийг аварчээ.
²⁹ Шуургыг Тэрээр намжааж,
Далайн давлагаануудыг аядуулжээ.
³⁰ Шуурга намжсанд тэд баярлалдаж,
Хүссэн боомт руу нь Тэрээр замчилсан.
³¹ Энэрэл хайрынх нь төлөө,
Хүний хөвгүүдэд үйлдсэн гайхамшгуудынх нь төлөө
ЭЗЭНд талархагтун!
³² Ард түмнүүдийн цуглаанд Түүнийг өргөмжлөг,
Ахмадуудын чуулаанд Түүнийг магтаг.

³³ Тэрээр гол мөрнүүдийг цөл,
Усан булгуудыг улайдмал шороо,
³⁴ Шимтэй газрыг хужиртай болгодог нь
Тэнд оршин суугчдын ёрын муугаас болдог юм.
³⁵ Тэрээр цөлийг усны цөөрөм,
Хагсмал газрыг усны булгууд болгож,
³⁶ Тэнд өлссөн хүмүүсийг суулгадаг бөгөөд
Тэднээр оршин суугчидтай хот босгуулан
³⁷ Талбайд тариа тариулдаг.
Үр жимс арвинтай ургацыг хураалгахын тулд
Усан үзмийн талбай байгуулуулдаг.
³⁸ Машид олшруулахаар тэднийг бас ерөөдөг бөгөөд
Мал сүргийг нь ч Тэрээр эс хорогдуулдаг.

³⁹ Дарамт, арчаагүйдэл, уй гашуугаар
Тэд цөөрч, доройтсон үед нь
⁴⁰ Тэрээр ноёдод зэвүүцлээ юүлж,
Замгүй, зэлүүд газраар
тэднийг тэнүүчлүүлдэг.
⁴¹ Харин Тэрээр гачигдагсдыг
Зовлон зүдүүрээс өндөрт өргөж,
Тэдний гэрийнхнийг хонин сүрэг мэт өсгөдөг.
⁴² Чигч шударга хүн үүнийг хараад баяртай байна.
Хамаг гэмт байдал амаа хамхина.
⁴³ Мэргэн хэн боловч
Эдгээр зүйлийг анхаарч,
ЭЗЭНий хайр энэрлийг ойлгогтун!

• 107:1 1Шс 16:34; 2Шс 5:13, 7:3; Езр 3:11; Дуу 100:5, 106:1, 118:1, 136:1; Иер 33:11