Дуулал

ГУРАВДУГААР НОМ
(Дуулал 73–89)
Дарлагчаас чөлөөлөгдөхийн төлөө гуйлт
Асафын дуулал.

73 ¹ Бурхан Израилд үнэхээр сайн.
Зүрх цэвэр хүнд бас сайн.
² Харин би хөл алдах шахав.
Алхам минь халтирах дөхөв.
³ Учир нь гэм буруутны амжилтыг хараад
Сайрхагчид би атаархсан юм.

⁴ Тэд үхэх цагтаа зүдүүргүй агаад
Бие хаа нь тарган цатгалан.
⁵ Тэд бусад хүмүүс шиг зовлонгүй,
Хүн төрөлхтөн шиг ч гай гамшиггүй.
⁶ Тиймээс бардамнал нь
Тэдний хүзүүний зүүлт болж,
Хүчирхийллийн хувцас тэднийг нөмөрдөг.
⁷ Таргалснаас болж нүд нь бүлтэрч
Тэдний зүрх нүглээр урсдаг.
⁸ Элэглэж, дарангуйлал, мууг өгүүлэлцэж,
Ихэмсгээр бас ярьцгаана.
⁹ Ам нь тэнгэрсийг эсэргүүцнэ,
Хэл нь газар дэлхийгээр хэсүүчилнэ.

¹⁰ Тиймээс Түүний хүмүүс эргэн ирж,
Тэдний бялхам их усыг^a ууна.
¹¹ Тэд “Бурхан яаж мэддэг юм бэ?
Хамгийн Дээд Нэгэнд мэдлэг байдаг уу?” гэцгээнэ.
¹² Харагтун, эдгээр нь гэмт хорон хүмүүс юм.
Үргэлж тэд санаа амар байж
Эд хөрөнгөө арвижуулдаг.
¹³ Гэтэл үнэндээ би зүрхээ
Дэмий л зэмгүй цэвэр байлгаж,
Гараа гэмгүй байдал дотор дэмий л угаалаа.
¹⁴ Өдөржин би сахилгажуулагдаж,
Өглөө бүр гэсгээл хүртэж байна.

¹⁵ Хэрвээ би “Би ингэж ярина” гэсэн бол,
Харагтун, би Таны хүүхдүүдийн үе удмаас урвах байсан.
¹⁶ Үүнийг ойлгохоор бодох үед минь
Надад маш хэцүү байлаа.
¹⁷ Бурханы ариун газарт орох хүртэл минь
Энэ бүхэн үргэлжиллээ.
Тэгээд л би тэдний эцсийг ухаарсан юм.
¹⁸ Үнэндээ Та тэднийг халтиргаатай газар байлгаж
Мөхөл рүү тэднийг хаяжээ.
¹⁹ Хоромхон зуур тэд сүйрчээ!
Гэнэтийн аймшгаар бүрмөсөн сүйтгэгджээ!
²⁰ Зүүднээс сэрэх мэт ЭЗЭН Та босоод,
Тэдний дүр төрхийг нь ч үл ойшоожээ.

²¹ Зүрх минь гашуудан
Дотроо би цоо хатгагдах үедээ
²² Би тэнэг, ухвар мөчид байж
Таны өмнө би адгуус адил байжээ.
²³ Гэсэн ч би үргэлж Тантай хамт
Та баруун гараас минь барьдаг.
²⁴ Та намайг зөвлөгөөгөөрөө удирдаж,
Хожим намайг сүр жавхланд угтан авна.
²⁵ Тэнгэрт Танаас гадна
Хэн надад байгаа вэ?
Танаас өөр юуг ч
Газар дээр би үл хүснэ.
²⁶ Бие махбод хийгээд зүрх минь
Бүтэлгүйтэж болох хэдий ч,
Бурхан мөнхөд зүрхний минь хад
Хувь ногдол минь юм.

²⁷ Учир нь, харагтун,
Танаас хол байгчид нь сөнөх болно.
Танд итгэлгүй бүгдийг
Та устгасан билээ.
²⁸ Харин Бурханд ойр байх нь надад сайн.
Таны бүх үйлсийг тунхаглахын тулд
Би Эзэн БУРХАНыг
Хоргодох газраа болгосон.

• ^a73:10 бялхам их усыг: Өмнөх эшлэлд гарч буй хүмүүсийн яриаг Бурханы хүмүүс шимтэн сонсох тухай илэрхийлж байна.