Дуулал

Зөрүүд Израилд хандсан Бурханы уриалга
Удирдаачид: Гит дээр. Асафын дуулал.

81 ¹ Хүч маань болсон Бурханд баярлан дуул.
Иаковын Бурханд баярлан хашхир.
² Дуу өргөж, товшуур цохиж,
Сонсголонт ятгыг босоо ятгатай хамт дуугарга.
³ Бидний баярын өдөр, шинэ сар,
Тэргэл сартайд бүрээ үлээгтүн!*
⁴ Учир нь Израилд зориулсан зарлиг,
Иаковын Бурханы шийдвэр энэ юм.
⁵ Тэрээр Египет нутаг даяар явахдаа
Иосефын дотор зарчмыг^a тогтоосон.

Би мэдэхгүй хэлээ сонсов.
⁶ “Би мөрнөөс нь ачааг буулгаж,
Гарыг нь сагснаас чөлөөлөв.
⁷ Зовлон шаналан дотор
Чи хашхирсан бөгөөд
Би чамайг мултруулав.
Аянгын нууц газраас чамд хариу өгч
Чамайг Мерибагийн усны дэргэд Би туршсан. * Села
⁸ Хүмүүс ээ, Намайг гэрчилж байхад сонсогтун.
Израил аа, чи Намайг сонссон ч болоосой!
⁹ Дунд чинь гаднын бурхан бүү байг.
Харийн бурханд та нар бүү мөргө.*
¹⁰ Египет нутгаас та нарыг удирдан гаргасан
ЭЗЭН Бурхан чинь Би юм.
Амаа том ангайлга,
Би дүүргэе.

¹¹ Гэвч Миний хүмүүс дууг минь сонссонгүй
Израил ч Намайг дагасангүй.
¹² Иймээс Би тэднийг зоргоор нь явуулахын тулд
Зүрхнийх нь зөрүүдлэлд тушаасан.
¹³ Хүмүүс минь Намайг сонсож,
Израил Миний замаар явсан ч болоосой!
¹⁴ Тэгсэн бол Би дайснуудыг нь хурдан дарж,
Мутраа өстнүүдийнх нь эсрэг эргүүлэх байсан.
¹⁵ ЭЗЭНийг үзэн ядагсад
Түүнд сөхрөн бөхийх байсан
Тэдний цаг мөнхөд үргэлжлэх байсан.
¹⁶ Дээд зэргийн буудайгаар тэднийг хооллож,
Хаднаас гарсан балаар Би хангах байсан.”

• 81:3 Тоо 10:10
• ^a81:5 евр. гэрчлэл
• 81:7 Гэт 17:7; Тоо 20:13
• 81:9–10 Гэт 20:2–3; Дх 5:6–7