Дуулал

Дайсагнал ба шаналлаас гэтлэх гуйлт
Удирдаачид. Аиелет Хашшахар дээр. Давидын дуулал.

22 ¹ Бурхан минь, Бурхан минь,
Юунд Та намайг орхисон бэ?
Миний ёолох дуу, авралаас минь
Юунд Та хол байна вэ?*
² Бурхан минь ээ, би өдрөөр хашхирдаг ч
Та хариулдаггүй
Шөнөөр бас хашхирдаг ч
Надад хариу алга.

³ Гэвч Израилын магтаалд залрагч,
Та ариун юм.
⁴ Эцэг өвгөд маань Танд итгэсэн
Тэд итгэсэн тул Та тэднийг аварсан.
⁵ Тэд Тан руу хашхирч, аврагдаж байв.
Тэд Танд итгэсэн бөгөөд ичгүүрт унасангүй.

⁶ Харин би өт, хүн биш!
Би хүмүүсийн буруушаал болж
Ард олонд жигшигдсэн юм.
⁷ Намайг хардаг бүхэн
Намайг тохуурхан инээдэг
Тэд уруулаа нээж, толгой сэгсрэн*
⁸ “Тэр өөрийгөө ЭЗЭНд даатгасан
Тэр түүнийг авраг!
Тэр түүнийг таалдаг тул авраг!” гэж байна.*

⁹ Гэсэн ч Та намайг эхийн хэвлийгээс гаргасан
Эхийнхээ хөхөөр байх үед
Та намайг итгүүлсэн.
¹⁰ Би төрөхөөсөө Танд даатгагдсан
Эхийнхээ хэвлийд байх үеэс минь
Та миний Бурхан байсан.
¹¹ Зовлон шаналан ойрхон
Туслагч ганц ч алга тул
Надаас бүү холдооч.

¹² Олон үхэр намайг хүрээлжээ.
Башаны хүчтэнүүд намайг бүсэлжээ.
¹³ Хүү татахаар архиран байгаа арслан шиг
Тэд над руу амаа том ангайлгаж байна.

¹⁴ Намайг ус шиг асгасан бөгөөд
Бүх яс минь мултарсан.
Зүрх минь лааны тос адил
Дотор минь хайлсан.
¹⁵ Хүч^a минь шаазангийн хэлтэрхий шиг хатаж,
Хэл минь түүшиндээ наалдав
Та намайг үхлийн шороонд оруулав.

¹⁶ Учир нь, намайг ноход хүрээлжээ.^b
Ёрын мууг үйлдэгчдийн бүлэглэл
Намайг бүсэлжээ.
Тэд гар, хөлийг минь нэвт хатгалаа.
¹⁷ Би бүх ясаа тоолж чадна.
Тэд над руу гөлрөн ширтэнэ.
¹⁸ Гадуур хувцсыг минь дундаа хувааж,
Дотуур хувцасны минь төлөө шодов.*

¹⁹ Харин, ЭЗЭН, Та бүү холдооч
Миний хүч чадал аа, надад туслахаар хурдлаач.
²⁰ Сэтгэлийг минь илднээс,
Ганц амийг минь нохойн эрхшээлээс авраач.
²¹ Намайг арслангийн амнаас авраач.
Зэрлэг үхрийн эврээс аварч,
Надад хариу өгөөч.

²² Таны нэрийг би
Ах дүүстээ хэлэх болно.
Чуулган дунд би
Таныг магтах болно.*
²³ ЭЗЭНээс эмээгчид ээ, Түүнийг магт.
Иаковын үр удам болох та бүгд
Түүнийг алдаршуул.
Израилын үр удам болох та бүгд
Түүнийг хүндэтгэ.
²⁴ Учир нь, Тэр зовогсдын зовлонг
Жигшээ ч үгүй, үзэн ядаа ч үгүй.
Тэр нүүрээ нуугаа ч үгүй.
Харин тусламж гуйн түүнийг хашхирахад
Тэр сонссон юм.

²⁵ Их чуулганы дунд магтаал минь
Танаас ирдэг.
Түүнээс эмээгчдийн өмнө
Би тангаргаа биелүүлнэ.
²⁶ Ядуу нэгэн идэж, цадна.
ЭЗЭНийг эрэн хайгчид
Түүнийг магтах болно.
Сэтгэл зүрх чинь мөнхөд орших болтугай!

²⁷ Газрын бүх зах хязгаар
ЭЗЭНийг санаж, Түүн рүү эргэх болно
Улс үндэстнүүдийн бүх овог
Таны өмнө хүндэтгэн мөргөнө.
²⁸ Учир нь хаанчлал нь ЭЗЭНийх
Тэрээр улс үндэстнүүдийг захирдаг.

²⁹ Дэлхийн бүх хүн мэхийн хүндэтгэх болно
Чинээлэг нь ч, иддэгүүд ч
Шороон доор орогчид ч,
Амиа хамгаалах чадалгүй нь ч
Өмнө нь бүгд сөгдөнө.
³⁰ Үр хойчис Түүнд зарагдах болно
Эзэний тухай ирэх үеүдэд яригдах болно.
³¹ Тэд ирж, Тэр үүнийг үйлдсэн гэдгийг,
Ирээдүйд төрөх хүмүүст
Түүний зөв шударгыг зарлана.

• 22:1 Мт 27:46; Мк 15:34
• 22:7 Мт 27:39; Мк 15:29; Лк 23:35
• 22:8: Мт 27:43
• ^a22:15 эсвэл хоолой
• ^b22:16 ЭЗО: тэд өвтгөв. эсвэл арслан мэт.
• 22:18 Мт 27:35; Мк 15:24; Лк 23:34; Иох 19:24
• 22:22 Евр 2:12