Бурханы хамгааллын баталгаа
91 1 Хамгийн Дээд Нэгэний халхавчинд оршигч нэгэн
Төгс Хүчит Нэгэний сүүдэр дор амьдарна.
2 Би ЭЗЭНд “Миний хоргодох газар, бат цайз минь,
Миний итгэдэг Бурхан минь” гэнэ.
3 Учир нь чамайг анчны урхинаас,
Хорлолын тахлаас авардаг нь Тэр юм.
4 Тэр чамайг өдөөрөө хучих бөгөөд
Түүний жигүүр дор чи хоргодох болно.
Түүний итгэмж нь бамбай хийгээд бэхлэлт юм.
5 Чи шөнийн аймшгаас ч,
Өдөр исгэрэх сумнаас ч эс айна.
6 Харанхуйд явагч тахлаас ч,
Үд дунд цөлжүүлэх мөхлөөс ч үл айна.
7 Мянган хүн чиний дэргэд,
Түмэн хүн баруун гар талд чинь унавч,
Энэ нь чамд эс тусна.
8 Чи зөвхөн нүдээрээ хараад л
Гэм буруутны амсах хариуг үзэх болно.
9 Учир нь чи хоргодох газар минь болох ЭЗЭНийг,
Хамгийн Дээд Нэгэнийг орших газраа болгосон юм.
10 Ямар ч хор хөнөөл чамд эс учирна.
Ямар ч гамшиг майханд чинь үл ойртоно.
11 Учир нь бүх замд чамайг хамгаалахын тулд
Тэр тэнгэрэлч нартаа чиний талаар тушаана.*
12 Чамайг хөлөө чулуунд цохичих вий гэсэндээ
Тэд чамайг гар дээрээ өргөөд явна.*
13 Чи арслан, наж могойг гишгэж,
Залуу арслан, могойг хөлөөрөө дэвсэлнэ.*
14 “Тэр Намайг хайрласан учир
Би түүнийг аварна.
Тэр нэрийг минь мэдсэн учир
Би түүнийг өргөмжилнө.
15 Тэр Намайг дуудах агаад
Би түүнд хариулна.
Зовлон шаналанд Би түүнтэй хамт байна.
Би түүнийг чөлөөлж, хүндлэлд аваачих болно.
16 Би түүнийг урт амьдралаар хангаж,
Түүнд авралаа үзүүлнэ.”
- 91:11 Мт 4:6; Лк 4:10
- 91:12 Мт 4:6; Лк 4:11
- 91:13 Лк 10:19