Дуулал

Ялалтын дуу

118 1 ЭЗЭНд талархал өргө.
Тэрээр сайн бөгөөд,
Түүний хайр энэрэл мөнхийнх.*

² “Түүний хайр энэрэл мөнхийнх” гэж Израил хэлэг.
³ “Түүний хайр энэрэл мөнхийнх” гэж Аароны гэр хэлэг.
⁴ ЭЗЭНээс эмээгчид нь
“Түүний хайр энэрэл мөнхийнх” гэж хэлэг.

⁵ Энэлэл шаналал дундаасаа
ЭЗЭН рүү би хашхирлаа.
ЭЗЭН надад хариулж,
Уудам газар авчирлаа.
⁶ ЭЗЭН миний талд, би айхгүй.
Хүн надад юу хийж чадах вэ?*
⁷ ЭЗЭН надад туслагчдын дунд байна.
Тиймээс намайг үзэн ядагсад руу
би харах болно.
⁸ Хүнд итгэхээс
ЭЗЭНий дотор хоргодох нь дээр.
⁹ Ноёдод итгэхээс
ЭЗЭНий дотор хоргодох нь дээр.

¹⁰ Бүх үндэстэн намайг бүсэлжээ.
ЭЗЭНий нэрээр би тэднийг тас цохино.
¹¹ Тэд намайг хүрээлжээ,
Тийм ээ, намайг хүрээлжээ.
ЭЗЭНий нэрээр би тэднийг тас цохино.
¹² Тэд намайг зөгийнүүд мэт хүрээлэвч
Өргөст бутны дундах гал мэт тэд унтарсан.
ЭЗЭНий нэрээр би тэднийг тас цохисон.
¹³ Та нар намайг унагахаар хүчээр түлхсэн боловч
ЭЗЭН надад тусалжээ.
¹⁴ ЭЗЭН миний хүч ба миний дуу,
Тэр миний аврал болсон.*

¹⁵ Зөвтүүдийн майханд уухайн чимээ хийгээд аврал байна.
ЭЗЭНий баруун мутар эрэлхгээр үйлддэг.
¹⁶ ЭЗЭНий баруун мутар өргөгдсөн байна.
ЭЗЭНий баруун мутар эрэлхгээр үйлддэг.
¹⁷ Би үхэхгүй, харин амьдрах бөгөөд
ЭЗЭНий үйлсийг тунхаглах болно.
¹⁸ ЭЗЭН намайг хүндээр гэсгээсэн.
Гэлээ ч үхэлд хүргээгүй.

¹⁹ Надад зөвтийн үүд хаалгыг нээгээч.
Би түүгээр орж, ЭЗЭНд талархал өргөнө.

²⁰ ЭЗЭНий үүд хаалга энэ юм.
Зөвт нэгэн түүгээр орно.

²¹ Та надад хариулж,
Аврал минь болсон учраас
Би Танд талархана.
²² Барилгачдын голсон чулуу
Булангийн тулгуур чулуу болов. * *
²³ Энэ нь ЭЗЭНээс ирсэн бөгөөд
Бидний нүдэнд гайхалтай.
²⁴ Энэ нь ЭЗЭНий бүтээсэн өдөр
Үүнд хөгжилдөн баярлацгаая.
²⁵ Аяа ЭЗЭН, гуйж байна, авраач.*
Аяа ЭЗЭН, гуйж байна, амжилтыг соёрхооч!

²⁶ ЭЗЭНий нэрээр Ирэгч нь ерөөлтэй еэ!*
Бид ЭЗЭНий өргөөнөөс та нарыг ерөөлөө.
²⁷ ЭЗЭН бол Бурхан бөгөөд бидэнд гэрлийг өгсөн.
Тахилын ширээний эвэрт
тахилыг уяагаар холбогтун.

²⁸ Та миний Бурхан, би Танд талархал өргөе.
Бурхан минь, би Таныг өргөмжилье.

²⁹ ЭЗЭНд талархал өргө
Тэрээр сайн бөгөөд
Түүний хайр энэрэл мөнхийнх.

• 118:1 1Шс 16:34; 2Шс 5:13, 7:3; Езр 3:11; Дуу 100:5, 106:1, 107:1, 136:1; Иер 33:11
• 118:6 Евр 13:6
• 118:14 Гэт 15:2; Иса 12:2
• 118:22 Лк 20:17; Үйл 4:11; 1Пт 2:7
• 118:22–23 Мт 21:42; Мк 12:10–11
• 118:25 Мт 21:9; Мк 11:9; Иох 12:13
• 118:26 Мт 21:9, 23:39; Мк 11:9; Лк 13:35, 19:38; Иох 12:13