Дуулал

Дайснаас аврагдахын төлөө
Удирдаачид. Давидын дуулал.

31 ¹ ЭЗЭН, Таны дотор би хоргодсон
Намайг хэзээ ч ичгүүрт бүү унагаач,
Зөв шударгаараа намайг авраач!
² Сонор юугаа над руу хандуулан
Намайг хурдан авраач!
Миний хоргодох хад,
Намайг аврах хүчирхэг бэхлэлт минь болооч!

³ Учир нь Та миний хад,
Бат цайз минь билээ.
Нэрийнхээ төлөө Та
Намайг удирдаач, хөтлөөч!
⁴ Тэдний надад нууцаар тавьсан
Торноос намайг гаргаач!
Учир нь Та миний хамгаалалт билээ.
⁵ Таны гарт би сүнсээ даатгана.*
Үнэний Бурхан ЭЗЭН,
Та намайг зольсон.

⁶ Хуурмаг хоосон шүтээнүүдийг хүндэтгэгсдийг
Би үзэн ядна.
Харин би ЭЗЭНд итгэдэг.
⁷ Хайр энэрэлд тань би
Баясан баярлах болно.
Учир нь Та зүдүүрийг минь харсан.
Та сэтгэлийн минь зовлон шаналанг мэдсэн.
⁸ Та намайг дайсны гарт тушаагаагүй,
Та хөлийг минь уудам газарт тавьсан.

⁹ ЭЗЭН, намайг нигүүлсээч,
Учир нь би зовлон зүдүүр дунд байна.
Уй гашуугаас болж
Нүд, сэтгэл, бие минь сульджээ.
¹⁰ Учир нь амьдрал минь гаслантай хамт,
Он жилүүд минь
Санаа алдалттай цуг өнгөрчээ.
Миний хүч тэнхээ хилэнцээс^a минь болж сулран
Яс минь тамирдав.

¹¹ Бүх өстнөөсөө болж
Би хөршүүдийнхээ дунд доромжлол,
Танилуудынхаа дунд айдас төрүүлэхээр болсон.
Замд таарсан хүмүүс надаас зайлсхийнэ.
¹² Үхсэн хүн шиг би
Санаанаас гаран мартагджээ.
Хагарсан сав мэт болжээ, би.
¹³ Учир нь, олны базаахгүй үгийг
Би сонссон.
Тал бүрд аймшиг байна.
Миний эсрэг тэд зөвлөлдөж
Амийг минь авахаар хуйвалджээ.

¹⁴ Харин, ЭЗЭН Танд би итгэдэг,
“Та миний Бурхан” хэмээн
Би хэлдэг.
¹⁵ Цаг хугацаа минь
Таны гарт байна.
Дайснуудын минь гараас
Хавчигсдаас минь намайг авраач!
¹⁶ Зарцынхаа дээр царайгаа гэрэлтүүлээч,
Хайр энэрлээрээ намайг авраач.
¹⁷ Таныг би дуудсан тул,
Намайг ичгүүр бүү болгооч, ЭЗЭН,
Гэм буруутнуудыг харин ичгүүр болгож
Үхэгсдийн оронд тэднийг дуугүй байлгаач!
¹⁸ Бардамнал, жигшилтэйгээр
Зөв шударгын эсрэг ичгүүргүй ярьдаг
Худалч уруулыг дуугүй болгооч!

¹⁹ Танаас эмээгчдэд зориулан Таны хуримтлуулсан,
Таны дотор хоргодогчдод Таны соёрхсон
Сайн сайхан тань хүний хөвгүүдийн өмнө
Хэчнээн агуу вэ!
²⁰ Та тэднийг оршихуйнхаа нууц газарт
Хүний хуйвалдаанаас нуун
Та тэднийг хэл амны хараалаас
Майхандаа нууцалж хамгаалдаг.

²¹ ЭЗЭН магтагдах болтугай!
Учир нь Тэрээр бүслэгдсэн хотод
Энэрэл хайраа надад гайхамшигтайгаар үзүүлсэн
²² Би сандарч байхдаа
“Таны мэлмийн өмнөөс би таслагдлаа” гэсэн.
Гэсэн ч би Тан руу хашхирахад
Та миний гуйлтын дууг сонссон.

²³ Түүний итгэмжит хүмүүс ээ,
Та нар цөмөөрөө ЭЗЭНийг хайрлацгаа!
Итгэлтнийг ЭЗЭН хамгаалдаг,
Бардамнагч хүмүүст харин
Хариуг нь элбэг төлдөг юм.
²⁴ ЭЗЭНд найдагч хүмүүс ээ,
Тууштай байж, зүрх зоригтой байгтун.

• 31:5: Лк 23:46
• ^a31:10 ЭЗО: зовлонгоос