Ивээлээ сэргээхийг гуйхуй
Удирдаачид: Корагийн хөвгүүдийн дуулал.
85 1 Аяа ЭЗЭН Та
Өөрийн нутагт ивээлээ үзүүлсэн.
Та Иаковын олзлогдогсдыг буцааж ирүүлсэн.
2 Та ард түмнийхээ хилэнцийг уучилсан.
Та бүх нүглийг нь далдалсан. Села
3 Та бүх уураа зайлуулсан.
Та шатаж буй хилэнгээсээ эргэж буцсан.
4 Аяа бидний авралын Бурхан,
Биднийг сэргээж, бидэнд хандсан
хилэнгээ зогсоогооч.
5 Та бидэнд мөнхөд унтууцах юм уу?
Та бүх үеийнхэнд хилэгнэсээр байх уу?
6 Таны хүмүүс Танд баярлахын тулд
Та Өөрөө биднийг сэргээхгүй гэж үү?
7 Аяа ЭЗЭН, хайр энэрлээ бидэнд үзүүлж,
Авралаа бидэнд хайрлаач!
8 Бурхан ЭЗЭНий айлдахыг
Би сонсохыг хүснэм.
Учир нь Тэр Өөрийн ард түмэн хийгээд
Итгэмжит хүмүүстээ амар тайвныг айлдана.
Харин тэд мунхаглал руугаа бүү эргээсэй!
9 Газар нутагт маань сүр жавхлан оршихын тулд
Түүнээс эмээгчдэд аврал нь үнэхээр ойр байна.
10 Энэрэл хайр ба үнэн хамтдаа уулзжээ.
Зөвт байдал ба амар тайван бие биеэ үнсжээ.
11 Газраас үнэн соёолж
Тэнгэрээс зөв шударга байдал өнгийн харжээ.
12 Үнэндээ ЭЗЭН сайныг өгөх бөгөөд
Газар нутаг маань ургацаа ургуулна.
13 Зөвт байдал Түүний өмнө явж,
Зүг замд нь алхмыг нь бэлтгэнэ.