Дуулал

Бурханы ариуныг магтахуй

99 ¹ ЭЗЭН захирдаг.
Ард түмэн чичрэгтүн!
Тэрээр херүбүүдийн дээр заларна.
Газар дэлхий ганхагтун!*
² ЭЗЭН Сионд аугаа бөгөөд
Бүх ард түмний дээр өргөмжлөгдсөн.
³ Таны аугаа, сүрдмээр нэрийг
Тэд магтан дуулаг.
Тэр ариун.
⁴ Хүч чадлын Хаан,
Шударгыг хайрлагч Та
Чигч шударгыг батжуулсан.
Та Иаковт шүүлт ба зөвт байдлыг гүйцэлдүүлсэн.
⁵ Бидний Бурхан ЭЗЭНийг өргөмжилж,
Түүний хөлийн гишгүүрийн өмнө мөргөгтүн!
Тэр ариун.

⁶ Мосе, Аарон нар Түүний тахилч нарын дунд,
Мөн Самуел Түүний нэрийг дуудагчдын дунд байсан.
Тэд ЭЗЭНийг дуудахад Тэрээр хариулдаг байсан.
⁷ Үүлэн багана дундаас Тэрээр тэдэнд айлдсан
Өгсөн зарчмууд^a ба зарлигийг нь тэд сахин биелүүлсэн.*

⁸ Бидний Бурхан ЭЗЭН,
Та тэдэнд хариулсан.
Та тэднийг уучилдаг Бурхан,
Мөн тэдний үйлдэлд өшөө авагч байсан.
⁹ Бидний Бурхан ЭЗЭНийг өргөмжилж,
Түүний ариун ууланд мөргөгтүн!
Учир нь ЭЗЭН Бурхан маань ариун.

• 99:1 Гэт 25:22
• ^a99:7 евр. гэрчлэлүүд
• 99:7 Гэт 33:9