Дуулал

Дайснаасаа ангижрах итгэлийн залбирал
Удирдаачид. Давидын дуулал, лимбэнд.

5 ¹ ЭЗЭН, үгэнд минь чих тавьж,
Ёолохыг минь анхаараач.
² Хаан минь, Бурхан минь,
Хашхиран тусламж гуйхыг минь сонсооч,
Учир нь Тандаа би залбирч байна.
³ ЭЗЭН, өглөөд Та дуу хоолойг минь сонсоно.
Өглөөгүүр би Танд бараалхан, хүсэн хүлээх^a болно.

⁴ Буруу явдлыг Та үл таалдаг Бурхан тул
Бузар муу нь Таны дэргэд байж чадахгүй
⁵ Сагсуурагчид мэлмийн тань өмнө үл зогсоно
Ёс бусыг үйлдэгчдийг Та үзэн яддаг
⁶ Та худал яригчдыг устгадаг
Цус урсгагч, залилж мэхлэгчдийг
ЭЗЭН жигшдэг.

⁷ Харин Таны бялхам хайр энэрлээр
Таны өргөөнд би орно.
Ариун сүмд тань би Таныг мэхийн хүндэтгэнэ.
⁸ ЭЗЭН, дайснуудын минь улмаас
Та намайг зөв шударгаараа хөтлөөч.
Та миний өмнө замаа тэгшитгээч.

⁹ Тэдний хэлж байгаа зүйлсэд итгэх юм юу ч алга.
Зүрх сэтгэл нь хорлол, хоолой ам нь онгорхой булш,
Хэл нь зусардал зулгуйдал юм.*
¹⁰ Бурхан, тэдний гэмтэйг тунхаглаач!
Өөрсдийнхөө төлөвлөгөөнд өөрсдөө унаг
Өөдөөс тань тэд тэрсэлдэг тул
Үй олон гэмт үйлдэлд нь тэднийг зайлуулаач.

¹¹ Харин Таны нөмөрт хоргодогчид баяр хөөртэй байж,
Та хамгаалсан учир
Мөнхөд баярлан дуулаг.
Таны нэрийг хайрлагчид
Танд баясна.
¹² Учир нь зөвт хүнийг ерөөдөг нь
ЭЗЭН, Та билээ.
Бамбайгаар халхлах мэт
Таалал тань түүнийг хүрээлнэ.

• ^a5:3 залбирал өргөнө эсвэл тахил өргөнө
• 5:9 Ром 3:13