Израилын сэргэлтийн төлөө залбирал
Удирдаачид: Шошанним Едутын дагуу. Асафын дуулал.
80 1 Иосефыг хонин сүрэг мэт удирддаг
Израилын хоньчин оо, чих тавиач.
Херүбүүдийн дээр залрагч аа, гэрэлтээч.
2 Бениамин, Ефраим,
Бас Манассегийн өмнө хүчээ босгож
Биднийг аврахаар ирээч!
3 Бурхан, биднийгээ дахин босгооч,
Нүүр царайгаа гэрэлтүүлээч,
Тэгвэл бид аврагдана.
4 Түг түмдийн Бурхан ЭЗЭН,
Хэдий болтол хүмүүсийнхээ залбиралд
Та уураа уугиулах вэ?
5 Тэднийг нулимсан талхаар хооллож,
Тэдэнд Та нулимсыг ихээр уулгалаа.
6 Та биднийг хөршийн маань маргааны бай болгожээ.
Дайснууд маань дундаа шоолон хөхөрч байна.
7 Түг түмдийн Бурхан,
Биднийгээ дахин босгооч,
Нүүр царайгаа гэрэлтүүлээч,
Тэгвэл бид аврагдана.
8 Үзмийн модоо Та Египетээс гаргаж
Үндэстнүүдийг хөөгөөд, түүнийгээ суулгасан.
9 Өмнө нь Та хөрсийг нь цэвэрлээд
Үндэслүүлж түүгээр өнөөх нутгийг дүүргэсэн.
10 Түүний сүүдэр уулсыг бүрхсэн,
Мөчрүүд нь Бурханы хушийг бүрхсэн.
11 Мөчрөө далай хүртэл,
Салаагаа мөрөн хүртэл сунгасан.
12 Замаар явж өнгөрөгч бүхэн
Түүнийг зулгааж болохуйцаар
Юунд Та хашлагыг нь нураав?
13 Ойн зэрлэг гахай түүнийг тасчиж,
Хээрийн амьтан бүхэн түүгээр хооллож байна.
14 Түг түмдийн Бурхан, эргэн ирээч.
Тэнгэрээс өнгийн, энэ үзмийн модоо хараач.
15 Таны баруун мутрын тарьсан усан үзмийн нахиаг хараач.
Өөртөө бат бэх болгосон мөчрөө харан айлчлаач.
16 Тэрээр галд шатаж, цавчигдсан.
Нүүрний тань зэмлэлээс болж тэд сөнөнө.
17 Мутар тань Таны баруун гар дахь хүний дээр,
Таны Өөртөө бат бэх болгосон
Хүний хүүгийн дээр байх болтугай.
18 Тэгвээс бид Танаас ухрахгүй.
Биднийг амилуулаач,
Бид нэрийг тань дуудна.
19 Түг түмдийн Бурхан ЭЗЭН,
Биднийгээ дахин босгооч!
Нүүр царайгаа гэрэлтүүлээч!
Тэгвэл бид аврагдана.