Дуулал

Гутралын эсрэг залбирал
Дуу. Корагийн хөвгүүдийн дуулал. Удирдаачид: Махалат Леаннотын дагуу. Езра хүн Хеманы маскил.

88 ¹ Аяа ЭЗЭН, авралын минь Бурхан,
Би өдрөөр болон шөнөөр ч
Таны өмнө хашхирсан.
² Миний залбирлыг өмнөө авчраач!
Миний хашхиралтад чихээ тавиач!

³ Учир нь сэтгэл минь
Зовлон бэрхшээлээр дүүрч
Амь минь Үхэгсдийн оронд ойртов.
⁴ Би нүх рүү буугчдын дунд тоологдов.^a
Би хүч чадалгүй хүн адил,
⁵ Үхэгсдийн дунд хаягдсан,
Булшинд тавигддаг үхдэлтэй адил болсон.
Үхэгсдийг Та дахин үл дурсана.
Учир нь тэд Таны мутраас таслагдсан юм.
⁶ Та намайг хамгийн гүнзгий нүхэнд,
Харанхуй газруудад, гүнд тавив.
⁷ Таны хилэн намайг хүндээр дарсан бөгөөд
Та бүх давлагаагаараа намайг зовоов. Села

⁸ Та танилуудыг минь надаас холдуулав.
Та намайг тэдэнд жигшүүрт зүйл болгов.
Би түгжигдээд гарч эс чадав.
⁹ Зовлон зүдүүрээс болж нүд минь ч сульдана.
Аяа ЭЗЭН, би Таныг өдөр бүр дуудна.
Би Тан руу гараа сунгана.
¹⁰ Үхэгсдэд Та гайхамшиг үйлдэх үү?
Үхэгсдийн сүнснүүд босоод, Таныг магтах уу? Села
¹¹ Хайр энэрэл тань булшинд,
Таны үнэн Сүйрлийн газарт тунхаглагдах уу?
¹² Гайхамшгууд тань харанхуйд мэдэх үү?
Зөвт байдал тань марталтын газар санагдах уу?

¹³ Харин ЭЗЭН, би тусламж гуйн
Тан руу хашхирна.
Өглөөд залбирал минь Таны өмнө ирэг.
¹⁴ Өө ЭЗЭН, Та юунд амийг минь хаяна вэ?
Юунд Та надаас нүүрээ нууна вэ?
¹⁵ Би залуугаасаа зовж, үхэх шахсан.
Би Таны аюумшгуудыг амсаж тэвдсэн.
¹⁶ Таны шатаж буй хилэн
Дээгүүр минь өнгөрсөн.
Таны аймшгууд намайг устгасан.
¹⁷ Тэдгээр нь намайг ус мэт өдөржин хүрээлж
Тэд хамтдаа намайг бүсэлсэн.
¹⁸ Амраг хайрт, бас анд нөхрийг Та холдуулсан.
Танилууд минь ч таг харанхуйд байна.

• ^a88:4 эсвэл Надад тусламж үгүй.