Дуулал

Бурханы дуу хоолой
Давидын дуулал.

29 ¹ Тэнгэрлэг биес ээ,
ЭЗЭНийг өргөмжлөгтүн!
Алдар хийгээд хүч чадлаар нь
ЭЗЭНийг өргөмжлөгтүн!
² Алдар нэрийнх нь учир
ЭЗЭНийг өргөмжил!
Ариун хувцсыг өмсөн^a
ЭЗЭНд мөргөгтүн!

³ ЭЗЭНий дуу хоолой
Усан дээгүүр байх ажээ.
Алдрын Бурхан нүргэллээ
Асар их усан дээгүүр ЭЗЭН байна.
⁴ ЭЗЭНий дуу хоолой хүчтэй,
ЭЗЭНий дуу хоолой сүр жавхлантай.

⁵ ЭЗЭНий дуу хоолой хуш модыг ч хугалдаг.
Тийм ээ, ЭЗЭН
Ливаны хуш модыг зомгол болгодог.
⁶ Ливаныг тугал шиг,
Сирионыг зэрлэг үхрийн тугал шиг
Тэрээр оодгонуулдаг билээ.

⁷ ЭЗЭНий дуу хоолой
Галын дөлийг салгадаг.
⁸ ЭЗЭНий дуу хоолой
Цөл газрыг чичрүүлдэг.
ЭЗЭН, Кадешийн цөлийг чичрүүлдэг.

⁹ ЭЗЭНий дуу хоолой согоог тугаллуулж,
Ой шугуйг нүцгэртэл хуу татдаг.
Сүмд нь байгч бүхэн
“Алдар” гэж хэлцгээх ажээ.

¹⁰ ЭЗЭН, үерийн усан дээр суусан
Тийм ээ, ЭЗЭН сэнтийдээ
Мөнхөд хаанчлан заларна.
¹¹ ЭЗЭН, хүмүүстээ хүчийг хайрлана
ЭЗЭН, ард түмнээ
Амар амгалангаар ерөөнө.

• ^a29:2 Түүнийг үзэгдэх үед эсвэл Түүний ариун сүмд.