Дуулал

Тусламж эрсэн гуйлт
Бениамин хүн Кушийн талаар ЭЗЭНд дуулсан Давидын шигаион.

7 ¹ ЭЗЭН Бурхан минь,
Таны дотор би хоргодсон билээ.
Намайг мөшгөж буй бүгдээс
Намайг авран чөлөөлөөч.
² Эс тэгвээс арслан мэт
Тэд намайг тасчиж,
Аврах хүнгүйд тэд намайг чирнэ.

³ ЭЗЭН Бурхан минь, хэрэв би үүнийг хийсэн бол,
Хэрэв гарт минь гэм нүгэл байгаа бол,
⁴ Анддаа хорон муу хариу барьж,
Өстнөө шалтаггүйгээр цөлмөсөн^a бол
⁵ Дайсан минь намайг мөшгөн бариг.
Амийг минь тэрээр газарт гишгэлэн
Алдрыг минь тэрээр тоос шороонд унагааг. Села

⁶ ЭЗЭН, ууран дотроо босооч.
Өстнүүдийн минь хилэнгийн эсрэг
Өөрийгөө Та өргөөч.
Та шийтгэлийг товлосон билээ.
⁷ Үндэстэн хотол түмнээр
Өөрийгөө Та хүрээлүүлж,
Тэдний дээгүүр өндөртөө буцаж залраач.^b
8 ЭЗЭН ард түмнүүдийг шүүдэг.
Миний гэмгүй шударга, үнэнч байдлын минь дагуу,
ЭЗЭН, намайг зөвтгөөч.

⁹ Гэм буруутны хорон мууг төгсгөж,
Харин зөвт хүнийг бат тогтоогооч.
Зөв шударга Бурхан
Зүрх ба оюун бодлыг шалгадаг. *
¹⁰ Миний бамбай болсон Бурхан
Зөв шударга зүрхтнийг авардаг.
¹¹ Бурхан шударга шүүгч бөгөөд
Өдөр бүр хилэгнэдэг Бурхан.

¹² Хэрвээ хүн гэмшихгүй бол
Тэрээр илдээ ирлэнэ, нумаа хөвчилж бэлдэнэ.
¹³ Тэрээр бас үхлийн зэвсгүүдийг бэлтгэж
Сумаа галт сум болгоно.
¹⁴ Харагтун! Тэд хорон муугаар жирэмсэлж,
Хорсол хөнөөлийг тээгээд
Худал хуурмагийг төрүүлдэг аж.
¹⁵ Ухаж тэд нүх малтаад
Унаж өөрсдөө тэндээ ойчжээ.
¹⁶ Хөнөөл нь эргээд толгой дээр нь буужээ.
Хүчирхийлэл нь буцаад зулай дээр нь унажээ.

17 Харин би ЭЗЭНд зөв шударгынх нь учир талархаж,
Хамгийн Дээд ЭЗЭНий нэрд магтаалыг би дуулна.

• ^a7:4 эсвэл шударга бусаар намайг буруутгасан хүнд өршөөл үзүүлсэн
• ^b7:7 эсвэл Тэднийг дээрээс захираач
• 7:9 Илч 2:23