Дуулал

Хамгаалал тусламжийн залбирал

71 ¹ ЭЗЭН, Таны дотор би хоргодсон
Намайг хэзээ ч ичгүүрт бүү унагаач!
² Зөв шударгаараа намайг авран суллаач,
Сонор юугаа над руу хандуулан
Намайг авраач!
³ Миний байнга очих хоргоддог хад болооч.
Миний хад, бат цайз минь учраас
Намайг аврахыг Та тушаасан^a билээ.

⁴ Бурхан минь ээ, намайг
Гэм буруутны гараас,
Ёс бусыг үйлдэгч болон харгис хүний нударгаас авраач!
⁵ Учир нь Та миний найдвар
Багаас минь л Эзэн БУРХАН
Та миний итгэл байсан.
⁶ Төрөхөөсөө би Таныг түшсэн,
Та намайг эхийн минь хэвлийгээс гаргаж авсан^b.
Таныг би үргэлж магтана.

⁷ Олон хүнд би гайхширал болжээ.
Та миний бат бэх хоргодох газар.
⁸ Ам минь Таны магтаалаар,
Таны алдраар бүхэл өдөржин дүүрэн.
⁹ Хөгшрөх үед минь
Намайг бүү орхиоч.
Хүч чадал минь барагдах үед
Намайг бүү хаяач!
¹⁰ Учир нь дайснууд минь
Миний эсрэг ярилцжээ.
Миний амийг отогчид
Хамтран хуйвалджээ.
¹¹ Тэгэхдээ тэд “Бурхан түүнийг хаясан.
Аврах хүн байхгүй учраас
Түүнийг хөөж, барь” гэцгээнэ.

¹² Бурхан, надаас бүү хол байгаач.
Бурхан минь ээ, надад туслахаар хурдлаач.
¹³ Сүнсийг минь буруутгагчдыг
Ичгүүрт унаган сөнөөгөөч.
Намайг хорлохыг хүсэгчид дээр
Доромжлол, ичгүүрийг нөмөргөөч.
¹⁴ Харин би үргэлж найдаж,
Таныг улам ихээр магтах болно.
¹⁵ Ам минь Таны зөв шударга,
Таны авралыг өдөржин ярина.
Учир нь би тоог нь ч эс мэднэ.
¹⁶ Би Эзэн БУРХАНы хүчит үйлсийг авчирна.
Би Таны зөвт байдлыг магтана.
Зөвхөн Таныг л магтана.

¹⁷ Бурхан, Та залуугаас минь эхлэн
Намайг сургасан.
Эдүгээ хүртэл би
Таны гайхамшигт үйлсийг тунхагладаг.
¹⁸ Бурхан, хөгширч бууралтах үед минь ч
Намайг бүү орхиоч,
Таны мутрыг би үр хойчист,
Таны хүчийг ирээдүйн бүх хүнд
Тунхаглах хүртэл бүү орхиоч!
¹⁹ Учир нь аугаа зүйлсийг хийсэн Бурхан,
Таны зөвт байдал тэнгэрт хүрсэн.
Бурхан, хэн Тантай адил вэ?

²⁰ Надад олон зовлон шаналанг үзүүлсэн Та
Намайг дахин сэргээж,
Газрын гүнээс дахин татан гаргана.
²¹ Та агуу байдлыг минь улам өсгөж,
Намайг тайвшруулахаар эргэнэ.

²² Бурхан минь ээ, би Таны үнэнийг,
Таныг босоо ятгаар магтана.
Израилын Ариун Нэгэн,
Би Танд ятга хөгжмөөр магтан дуулна.
²³ Би Танд магтан дуулах үед
Уруул минь баярлан хашхирна.
Таны аварсан миний сэтгэл баясна.
²⁴ Хэл минь ч өдөржин
Таны зөвт байдлыг өгүүлнэ.
Учир нь намайг хорлохыг хүсэгчид
Доромжлол ба ичгүүрт унасан билээ.

• ^a71:3 ЭЗО: Таны тушааснаар намайг явахыг
• ^b71:6 ЭЗО: би хамгаалагдсан